ရေဝ်၊ ဖေဖဝ်ဝါရဳ ၂၅
တွဵုရးဍုၚ်မန် ပ္ဍဲပွိုၚ်ဍုၚ်ရေဝ် ဒၞါဲဇြဟတ်ပၠန်ဂတးတံ ထိၚ်ဒက်လဝ်ဂှ်ကဵု ကွာန်မၞုံပွဳပွူဗ္ဒါဲဗ္ဒါဲတံဂှ် လ္ပာ်ကံၚ်ဇြဳပၞာန် ကၠောန်ကၠုၚ်ဒၟံၚ်ပရေၚ်ပြုပြေၚ်ပၞာန်ဒရုၚ်တံ ဂၠိုၚ်ကၠုၚ်ဂှ် ဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပေါဲဗ္တိုက်ဗလးတိတံ ဒပ်ကံၚ်ဇြဳပၞာန် မဒးကျဒၟံၚ်ပၞာန်ဂှ်ဝွံ ဒၟါနူဇြဟတ်လေၚ်ဒိုက်နွံဒၟံၚ်ဂှ်ကဵု သွက်ဂွံရပ်ဖအောန်ဖျေံခရိတ်အရပ်စပ်တံဂှ်တုဲ စနူသၞာံဏံမံက်တုဲ ထံၚ်ကၠုၚ်ပရိုၚ်ပၞာန်ကျာ ကုဒေသရေဝ် ဒၞါဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်ဂှ်ရ။
ကြဴနူဂှ်တုဲ စနူဂိတုဂျာန္နဝါရဳ သတ္တာဟလက္ကရဴအိုတ်ဂှ်တုဲ ပါဲနူကဵုဒၞါဲဂကောံဇြဟတ်ပၠန်ဂတးတံနွံမာန်ဂှ် သီုကဵုကွာန်ဒၞါဲကောန်အရာပ်တံ မံၚ်စံၚ်တံဂှ်လေဝ် နကဵုတၚ်ရန်တၟံနွံနွံ ကၠောန်ဗ္တိုက်ကၠုၚ်ဒၟံၚ် နကဵုဒရုၚ်တံ အဆက်က်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ခြာဟွံလအ်ဏံ လ္ပာ်ကံၚ်ဇြဳပၞာန် ကၠောန်ကၠုၚ်ပရေၚ်ပြုပြေၚ်ပၞာန်ဒရုၚ်တံ သာဂၠိုၚ်ကၠုၚ်မာန်တုဲ ကၠောန်ၜိုတ်ပလေဝ်ပလေတ်စွံလဝ် အရာမနွံပၟိက်တံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဗွဲကြဴဏံ ပရေၚ်ပန်ပှော်စပ်ကဵုပၞာန်ကျာတံ ဂၠိုၚ်ကၠုၚ်ဏောၚ်ဂှ် ပိုယ်တံချိၚ်ကေတ်ရ။ ပရေၚ်ထံၚ်ပရိုၚ်ဗလးတိ ဒၞါဲလဵု ဗ္ဒိုပ်ညးဂှ်နွံ သာ်ဏံတံဂှ် ဍေံတံကၠောန်ကၠုၚ်ဂှ်နွံ။ ဟိုတ်ဂှ်ရ ထောံမခတိုဟ်နကဵုပၞာန်ကျာတံဏံဂှ်တှ်ေ ခြာဟွံလအ် လ္ပာ်ပိုယ်တံဏံလေဝ် ဂၠိုၚ်ကၠုၚ်ဏောၚ်ဂှ် ဒးချပ်လဝ်ရ။ ဒးကၠောန်လဝ် ပရေၚ်ပလေဝ်ပလေတ်တံ နွံရ” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ပရေၚ်ဗ္တိုက်ပၞာန်ကျာ ပါလုပ်သီုဒရုၚ်တံ နွံကၠုၚ်မာန်ဂှ်ရ နကဵုညးဍုၚ်ကွာန်တံ စွံသတိတုဲ မံၚ်စံၚ်အိုတ်ဂှ်ကီု၊ သွက်ဂွံၜံက်ခါဲလဝ် ကတိုၚ်ပါဲဗုမ်ညးသ္ကအ်အိုတ်ဂှ် ညး ဖ္တိုက်ဖ္အောဝ်လဝ်ရ။
ပရေၚ်ပြုပြေၚ်ပၞာန်ဒရုၚ် ကံၚ်ဇြဳပၞာန် ဗွဲကြဴဏံဝွံ မ္ၚးနူကဵုဒေသဒပၠန်ဂတးတံ ထိၚ်ဒက်လဝ်၊ ဗ္ဒိုပ်ဒပ်တံဂှ် ထံၚ်ကၠုၚ်ပရိုၚ် သီုကဵုကရောၚ်ပၞာန်ချဳဒရာၚ်တံဂှ်တုဲ ထောံကၠုၚ်ဒၟံၚ်မခတိုဟ်တံဂှ် ဂွံဆဵုကေတ်ရ။
ညးဒုၚ်တာလျိုၚ် ကရောၚ်ပၞာန်ဒဝ်ဏ ဒပ်ပၞာန်စဵုဒၞါညးဍုၚ်ကွာန် PDF မၞုံယၟု သဝ်ဒါကိုဝ်ဂှ်တှ်ေ ဒပ်ကံၚ်ဇြဳပၞာန်ဝွံ ဟိုတ်နူဇြဟတ်ဒပ်လေၚ်ဒိုက်တုဲ ပရေၚ်ပြုပြေၚ်ပၞာန်ဒရုၚ်တံ ကၠောန်ကၠုၚ်လဝ် လှဲလှဲလးလးရောၚ် ဟီုရ။
“ လ္ပာ်ကံၚ်ဇြဳပၞာန် ရပ်စပ်ကၠုၚ်ဒရုၚ် ဇၞော်ကဵုဇြဟတ်ဂှ်တှ်ေ ဍေံတံ ဒးဒုၚ်ကၠုၚ်လဝ်ကဵုဒရုၚ် ဗွဲအဓိကတုဲ အရာဍေံမစိုပ်တရဴဂှ်လေဝ် ဂွံဒၟံၚ်ဇြဟတ်ဏောၚ်။ ရပ်စပ်ကၠုၚ်ဒၟံၚ်ဒရုၚ်တံဂှ် ဂွံဆဵုကေတ်ရ။ ညအ်ဂှ်ချိုတ်ပၠိုတ်ရ။ ပ္ဍဲကဵုဍေံတံ ဇြဟတ်ဟွံမွဲရတုဲ ရပ်စပ်ကၠုၚ်ဒၟံၚ်ဒရုၚ် လှဲလှဲလးလးဂှ် ဂွံဆဵုကေတ်ရ” သာ်ဝွံ သ္ဂးရ။
နကဵုကံၚ်ဇြဳပၞာန် ပ္ဍဲကဵုဗလးတိဂှ် ဗ္တိုက်ကၠုၚ်ဟွံမာန်တုဲ သ္ပပဓာန်ကဵုပၞာန်ကျာ ပါလုပ်သီုကဵုဒရုၚ်တံဂှ်တုဲ ဗ္တိုက်ကၠုၚ်ဒၟံၚ်ဂှ်ရ မ္ၚးနူကဵုဒပ်ပၠန်ဂတးတံဂှ် ညးဍုၚ်ကွာန်တံလေဝ် ဇီုကပိုက်ချိုတ်အာတံ နွံဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် အပ္ဍဲသၞာံဏံ ဟိုတ်နူပရေၚ်ဗ္တိုက်ကံၚ်ဇြဳပၞာန် နကဵုဒရုၚ်တံဂှ်တုဲ ကောန်ဒပ်ပၠန်ဂတး ပါလုပ်သီုကဵုကောန်အရာပ်တံဂှ် ဟွံအောန်နူမသုန်တၠ ချိုတ်အာလဝ်တုဲ ၂၀ တၠပြၚ် ဇီုကပိုက်ကလိဂွံလဝ်ဝပ်ရ။
သ္အာၚ်နူဂှ်ပၠန် ဘာဗ္တောန်လိက်၊ ကျာ်စေတဳ၊ စမြိုၚ်ပရေၚ်ဘာသာ၊ ဆေၚ်ဖျာ၊ သ္ၚိမၞိဟ်ဒၟံၚ်တံမပါလုပ် စမြိုၚ်လ္ပာ်အရာပ် ဟွံအောန်နူပိစှော်မ ဒးလီုလာ်အာလဝ်ရ။
ပ္ဍဲပရေၚ်ပၞာန်ဗလးတိတံဂှ် ကံၚ်ဇြဳပၞာန် ဇြဟတ်ပရေၚ်ဗ္တိုက်ဍိုန်လျကၠုၚ်ဒၟံၚ်ဂှ်ဝွံ သၠုၚ်ပ္တိုန်ကၠုၚ်အသိၚ် ပရေၚ်ပြုပြေၚ်ပၞာန်ဒရုၚ်တံမာန်တုဲ နကဵုဒပ်ပၠန်ဂတးဂမၠိုၚ် သွက်ဂွံဒစးဒုၚ်ပလေဝ်ပလေတ်လဝ်ဂှ် ဗွိုၚ်ဒပ်ပၞာန်သ္ပလဝ်ဇြဳဒဳအာမ်တံ ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram