ကျာ်ထဝ်၊ ဖေဖဝ်ဝါရဳ ၂၆
ပ္ဍဲကဵုတမ်ဒပ်ကံၚ်ဇြဳပၞာန်ဂမၠိုၚ် ပါလုပ်သီုကဵုဌာန်ဂအုပ်ၝောံဒပ် ၄၄ အပ္ဍဲပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် ဗပေၚ်ကၠုၚ်ဒရုၚ်တုဲ မၚ်တောပ်ဗ္တိုက်ကၠုၚ် ပ္ဍဲကဵုဂၠံၚ်ကွဳစက်မတ်မလီု−လ္ဂုၚ်ဂှ် သာတုဲကၠောန်သ္ပကၠုၚ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
ဒပ်ကံၚ်ဇြဳပၞာန်ဝွံ စနူဂိတုဖေဖဝ်ဝါရဳ သတ္တာဟလက္ကရဴအိုတ်ဏံဂှ်တုဲ ပ္ဍဲကဵုဌာန်ဂအုပ်ၝောံဒပ် ၄၄၊ ခမရ ၂၀၇၊ အမတ ၃၁၀၊ ဒတရ ၆၀၂၊ ခမရ ၂ တံဂှ် မွဲတမ်ဒပ်မ္ဂး တြးလဝ်လၟိဟ်ဒရုၚ် အောန်အိုတ် ဒရုၚ် ၅ ဖ္ဍိုက်ရ။
ပ္ဍဲကဵုတမ်ဒပ်ဖျေံသ္ဇိုၚ်ကျာ်ထဝ်တံဂှ်လေဝ် ဗပေၚ်လဝ်ဇြဟတ် ကောန်ဒပ်စှ်ေနူတန်ဗ္တောန်ကွတ်ပၞာန် ဂၠိုၚ်ကဵုကၠံတုဲ နူကဵုရးဗဂေါဂှ် ပလံၚ်ဗစိုပ်ဒၟံၚ်ဇွောံမ ကေုာံ မကမ်လွဟ်လက်နက်တံ နွံဒၟံၚ်ရောၚ် ညးတာလျိုၚ် ဂကောံဒပ်ပၠန်ဂတးမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ဒေါအ်ဇူလဝ် ပရေၚ်ပန်ပှော်လွဟ်ဇၞော် ပွိုၚ် ၁၀ တ္ၚဲတုဲ စနူဂိတုဖေဖဝ်ဝါရဳ ၂၄ တုဲ ပ္ဍဲကဵုကွာန် ဒၞါဲဂကောံဒပ်ပၠန်ဂတးတံ နွံမာန်ဂမၠိုၚ် လ္ပာ်ကွာန် ခယဲ၊ သေတ်ကွေန်၊ အခိုၚ်၊ တုၚ်ခွတံဂှ် ပန်ပှော်ဒၟံၚ်လွဟ်ဇၞော် ၂၀ မပြၚ်ကီုလေဝ် လၟိဟ်မၞိဟ်ဇီုကပိုက်ဒး ဟွံမွဲဏီပုဟ်ဂှ် သ္ဂးရ။
သ္အာၚ်နူဂှ်ပၠန် ကဵုက္ၜၚ်ကျာ Y12 ၊ ကဵုဒရုၚ်တံလေဝ် ထံၚ်ကၠုၚ်ပရိုၚ်လၟေၚ်တ္ၚဲနွံတုဲ ထံၚ်ပရိုၚ်ဂၠိုက်ဂၠါဲဒၟံၚ် ပရိုၚ်ဗလးတိတံဂှ်လေဝ် ကၠောန်ကၠုၚ်ဒၟံၚ်အဆက်က်ရောၚ် ဂွံတီကေတ်ရ။
ဒပ်ကံၚ်ဇြဳပၞာန် ပလေဝ်ကၠုၚ်ပရေၚ်ပၞာန်သာ်ဏံဂှ်ဝွံ ဟိုတ်နူအလဵုအသဳညဳသၟဟ်ဂကူ NUG ဟီုကၠုၚ်ဒၟံၚ် ထ္မံက်အာပေါဲဗ္တိုက် ပ္ဍဲရးဗဂေါကဵု ရးလ္ဂုၚ်တံဂှ်ဏောၚ်ဂှ်တုဲ လ္ဂောံကဵုပရေၚ်ပၞာန် ညံၚ်ဂွံကဵုအရီုဗၚ်မာန်ဂှ် ဒစးဒုၚ်ပလေဝ်ပလေတ်ဒၟံၚ် ဒှ်မာန်ရောၚ် သ္ၚဳဂၠိပ်ဒၟံၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−SAC