မာန္တလေဝ်၊ ဖေဖဝ်ဝါရဳ ၂၆
ပ္ဍဲထံၚ်အိုဝ်ဗိုဝ် ရးမာန္တလေဝ်ဂှ် ဟိုတ်နူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက် ဗွဲမရုမ်ဂပ်ဂှ်တုဲ ကောန်ထံၚ်ပရေၚ်ဍုၚ်ကွာန်မွဲတၠ ထပ်ဒးထောံအာလဝ်ဂှ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန် စပ်ကဵုအလုံဍုၚ်မွဲ PPNM ရ။
ကောန်ထံၚ်ပရေၚ်ဍုၚ်ကွာန် ကိုဝ်အံၚ်ထောန် ဒးမံၚ်ထံၚ် ပ္ဍဲထံၚ်အိုဝ်ဗိုဝ်တံဂှ်ဝွံ ဟိုတ်နူဟွံဂွံပရေၚ်မၚ်မွဲရံၚ်စံၚ်ပရေၚ်ထတ်ယုက် ဗွဲမရုမ်ဂပ်ဂှ်တုဲ တုဲကၠုၚ်ပ္ဍဲဂိတုဖေဖဝ်ဝါရဳ ၁၈ တေံ ဒးချိုတ်အာလဝ် အပ္ဍဲထံၚ်စာတ်ရ။
ကိုဝ်အံၚ်ထောန်ဝွံ အခိၚ်ဒးဒုၚ်ရပ်လဝ်ဂှ် ဒှ်ညးပရေၚ်ထတ်ယုက်ခိုဟ်မွဲတၠတုဲ မုယဲသာ်လဵုမွဲမှ ဟွံမွဲ စိုပ်ထံၚ်အိုဝ်ဗိုဝ်မှ ပ္ဍဲကဵုဇကုဇကောဝ်တံဂှ် ဒှ်တိုန်သရ စၟလုပ်ဂွံတုဲ ဒုၚ်လွဳလွတ်ဒၟံၚ် ပ္ဍဲရုၚ်ဂဥုဲထံၚ်ရ။
ကြဴနူဒုၚ်လွဳလွတ်ဒၟံၚ် ပ္ဍဲထံၚ်ရုၚ်ဂဥုဲ ဂွံၜိုတ်မွဲသတ္တာဟဂှ် ဒးချိုတ်အာလဝ် ပ္ဍဲရုၚ်ဂဥုဲဂှ်ရတုဲ ဇွရုပ်ညးရဂှ် ဟွံကဵုအခေါၚ်ကလေၚ်ယိုက်ဖျဴပုဟ်ဂှ် PPNM သ္ဂးရ။
တုဲကၠုၚ်သၞာံ ၂၀၂၂ ဂိတုဨပရဴဂှ် ကိုဝ်အံၚ်ထောန် ဒးဒုၚ်ရပ်လဝ် ပ္ဍဲရးမာန္တလေဝ် ပွိုၚ်ဍုၚ်အမရပူရဂှ်တုဲ ဒးဒုၚ်ဖျေံစၟတ်လဝ်ဒဏ်ထံၚ် ၃ သၞာံရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၀ တေံဂှ်လေဝ် ညးဗြဴကောန်ထံၚ်ပရေၚ်ဍုၚ်ကွာန် ဒဝ်သာန်ယဳ မဒးဒုၚ်ရပ်ထိၚ်လဝ် ပ္ဍဲထံၚ်အိုဝ်ဗိုဝ်ဂှ် ဟိုတ်နူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက် ဗွဲမရုမ်ဂပ်တုဲ ဒးချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ