ကျာ်မြဟ်၊ ဖေဖဝ်ဝါရဳ ၂၆
ဂြောဝ်ဂတာကောန်ထံၚ်ပရေၚ်ဍုၚ်ကွာန် မဒးဒၟံၚ်ထံၚ်ပ္ဍဲထံၚ်ကျာ်မြဟ် တွဵုရးဍုၚ်မန် နကဵုၝောံပိုဒ်ပရေၚ်ဍုၚ်ကွာန်တံဂှ် ကပေါတ်ညးတံပလံၚ်နၚ်တံဂှ် သ္ဇိုၚ်ဝန်ထံၚ် သၟဝ်တဲကံၚ်ဇြဳပၞာန်တံ သၞောတ်ဗ္ၜတ်ဒၟံၚ်ရောၚ် ဂွံတီကေတ် ဇရေၚ်ညးမစုက်လုက်ကဵု ဂြောဝ်ဂတာကောန်ထံၚ်ပရေၚ်ဍုၚ်ကွာန်တံရ။
သ္ဇိုၚ်ဝန်ထံၚ် သၟဝ်တဲကံၚ်ဇြဳပၞာန်လၟုဟ်တံဝွံ ကောန်ထံၚ်ဒးဒၟံၚ်ထံၚ် နကဵုဒုဟ်ဒဏ်တၞဟ်ဟ်တံဂှ်တှ်ေ အတိုၚ်သၞောဝ်အစောံ မဖျေံလဝ်ဂှ် ကဵုလဝ်အခေါၚ်ပလံၚ်ဗစိုပ်ကပေါတ်အပ္ဍဲထံၚ်တံကီုလေဝ် စပ်ကဵုကပေါတ်ကောန်ထံၚ်ပရေၚ်ဍုၚ်ကွာန်တံဂှ်တုဲ ပရေၚ်သၞောတ်ဗ္ၜတ်တံ နွံကၠုၚ်ရ။
ကပေါတ်နူဂြောဝ်ဂတာတံ ပလံၚ်ဗစိုပ်နၚ် သွက်ကောန်ထံၚ်ပရေၚ်ဍုၚ်ကွာန်တံဂှ်လေဝ် စၟဳတ်ဒၟံၚ်သီုသောဲသောဲဗြောဲဗြောဲတုဲ အတိုၚ်မစၟတ်လဝ်ကၠာတေံဂှ် ဟွံကဵုအခေါၚ်ပလံၚ်ဗစိုပ်ရတုဲ ၜိုတ်ပမာဏဟွံရုမ်ဂပ် ညိညတံရဟေၚ် ကဵုဒၟံၚ်အခေါၚ်ပၠောပ် အပ္ဍဲထံၚ် နကဵုတၚ်မသၞောတ်ဗ္ၜတ်လဝ်ဂမၠိုၚ်ဂှ် ဂွံတီကေတ်ရ။
ညးမစုက်လုက်ကဵု ဂြောဝ်ဂတာကောန်ထံၚ်ပရေၚ်ဍုၚ်ကွာန်မွဲတၠဂှ်တှ်ေ ဇွောံမစၞစကောန်ထံၚ်ပရေၚ်ဍုၚ်ကွာန်လၟုဟ်တံ နူကဵုမ္ၚးတံဂှ် ဗီုကဵုကၠာတေံ ၜိုတ်နွံပၟိက်ဂှ် ပၠောပ်ဟွံဂွံရတုဲ မ္ၚးနူကဵုပရေၚ်ကၟာတ်လဒဵုတံ နွံကၠုၚ်ဂှ် စနူကဵုလိက်အုပ်ဗှ်ဂမၠိုၚ်တံဒှ်တမ် ကၟာတ်လဒဵုကၠုၚ်လဝ်ဂှ် ဟီုရ။
“ဇွောံမစၞစ မဒှ်အထံက်အပၚ် နူမ္ၚးတံဂှ်လေဝ် ကၟာတ်လဒဵုလဝ်ရ။ ဗီုကဵုကၠာတေံဂှ် ၜိုတ်နွံပၟိက် ပၠောပ်ဟွံဂွံပုဟ်။ ပ္ကဴဂဝ်ဖဳပေက်စဂှ်တှ်ေ မွဲကရေက်ရဂွံ။ ပလံၚ်ဗြာတ်မွဲဟရးတှ်ေ ကဝက်ရပၠောပ်ဂွံ။ သၞောတ်ဗ္ၜတ်ကၠုၚ်သာ်ဏံရ။ တုဲပၠန် လိက်ဗှ်တံဂှ်တှ်ေ ပါဲနူလိက်ကျာ်တုဲ သှ်ေဂှ်တှ်ေ မုဟွံကဵုပၠောပ်ရပုဟ်။ သွဍေက်က်တံဂှ်တှ်ေ လျိုၚ် ၃၀ ဒ္ကေဝ်၊ ကဝ်ဖဳမေတ်တှ်ေ ၁၅ ထုပ်၊ ဍာ်တှ်ခၟိက်တံဂှ်တှ်ေ ပၠောပ်အတိုၚ်ထုပ်ဟွံဂွံရပုဟ်၊ ဖံက်တုဲ ဒးကလေၚ်စုတ်ကဵုပလတ်သတေတ်၊ ကွာၚ်(လမုန့်) တံ မုတံမ္ဂး ဒးဝးထောံလ္ဒေါဝ်တုဲ၊ စိုပ်အတေံတှ်ေ အတိုၚ်တြေံဂှ် ဟွံသှ်ေရပုဟ်။ သၠေက်အာအိုတ် ဒှ်ဒၟံၚ်ဗီုဏံရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာပလံၚ်ကပေါတ် ဇရေၚ်ကောန်ထံၚ်ပရေၚ်ဍုၚ်ကွာန်တံဂှ် ကောန်ဂြောဝ်ဂတာ ကောန်ထံၚ်ပရေၚ်ဍုၚ်ကွာန်တံ ဍာံ၊ ဟွံဍာံဂှ် စၟဳတ်ဒၟံၚ်တၞးကာဒ်ကောန်ဍုၚ်၊ သီုကဵုစရၚ်သ္ၚိကၟိန်တံ ဗွဲမတေၚ်ဂြတ်တုဲ ပရေၚ်ဒဒှ်ဟွံဂွံအခေါၚ်လုပ်ဆဵုပေၚ်ၚ်တံဂှ်လေဝ် နွံဒၟံၚ်ရောၚ် ညးဆက်ဟီုရ။
သ္ဇိုၚ်ဝန်ထံၚ် သၟဝ်ကံၚ်ဇြဳပၞာန်တံဝွံ ကပေါတ်အရပ်စပ်၊ ဗၞိက်စၞစသုၚ်၊ ဂဥုဲဇဗ နူကဵုဂြောဝ်ဂတာတံ မပလံၚ်ဗစိုပ်နၚ်တံဂှ်လေဝ် ပလံၚ်ဗစိုပ်ကဵုပေၚ်ၚ်ဂှ်ဟွံမွဲ ကပေါတ်မိက်ဂွံဂွံတံဂှ်တှ်ေ ၜိုတ်ဒးကအ် ကေတ်လဝ်တံ နွံဂှ် ဂွံတီကေတ်ရ။
ကပေါတ်ကေတ်လဝ်နူကဵုကောန်ထံၚ်ပရေၚ်ဍုၚ်ကွာန်တံဂှ် သ္ဇိုၚ်ဝန်ထံၚ်ဂမၠိုၚ် ရပ်စပ်ဒၟံၚ်သွက်အလဵုညးတံ နွံတုဲ ကေတ်သြန်တုဲ ကလေၚ်သွံတြးဒၟံၚ် ပ္ဍဲကဵုဆေၚ်အပ္ဍဲထံၚ်တံ နွံဂှ် ညးမစုက်လုက်ကဵုထံၚ်စာတ်ဂမၠိုၚ် ဟီုရ။
ပ္ဍဲလက်ထက်ကံၚ်ဇြဳပၞာန်ဏံ ကောန်ထံၚ်ပရေၚ်ဍုၚ်ကွာန်ဂမၠိုၚ်ဝွံ အခေါၚ်အရာကောန်ထံၚ်မွဲမွဲ ထေက်ကဵုမၞုံ ဗီုကၠာတေံဂှ် ဟွံဂွံရတုဲ ဒးဆေၚ်ဒၟံၚ်မုက်ကဵု ပရေၚ်ဍဵုဍိုက်အပ္ဍဲထံၚ် နာနာသာ်တုဲ ယဝ်အာတ်မိက်အခေါၚ်အရာတံဂှ်မ္ဂးလေဝ် ကၟာတ်တိုက်ကီု၊ ပြံၚ်ထံၚ်တံကီုဂှ် လေပ်ကၠောန်ဒၟံၚ်ရောၚ် ဂွံတီကေတ်ရ။
ပ္ဍဲကဵုထံၚ်ဗဟဵု ကျာ်မြဟ် တွဵုရးဍုၚ်မန်ဂှ်တှ်ေ ကောန်ထံၚ်ပရေၚ်ဍုၚ်ကွာန် ဒးဒၟံၚ်ထံၚ်နကဵုၝောံပိုဒ်ပရေၚ်ဍုၚ်ကွာန်နာနာသာ် နူကဵုရးလ္ဂုၚ်၊ မာန္တလေဝ်၊ ဗဂေါ၊ တွဵုရးကရေၚ်၊ တွဵုရးဍုၚ်မန်တံ သီုနူကဵုဒေသနာနာတံဂှ် အပံၚ်ဖအိုတ် ဗၞတ် ၃၀၀ ပြၚ် နွံရောၚ် ညးမစုက်လုက်ကဵု ထံၚ်စာတ်ဂမၠိုၚ် ဟီုရ။
ပရိုၚ်−သြၚ်လောန်တိုၚ်(မ်)
ဗီု−GAP