မတ်မလီု၊ ဖေဖဝ်ဝါရဳ ၂၆
သွက်ဂွံကလေၚ်အုပ်ဓလီု လ္ဂုၚ်ကဵု ဒေသဗဂေါတံမာန်ဂှ် စထ္မံက်အာပေါဲဗ္တိုက်တံဏောၚ် သ္ကိုပ်ဝန်ဇၞော်ကၟိန်ဍုၚ် အလဵုအသဳညဳသၟဟ်ဂကူ NUG မာန်ဝေန်ခိုၚ်တာန် ဟီုလဝ်ဂလာန်ရ။
သ္ကိုပ်ဝန်ဇၞော် ဟီုလဝ်ဂလာန် စပ်ကဵုပရေၚ်ဂကောံဒပ်၊ တမ်ဒပ် နွံသၟဝ်ဒပ်စဵုဒၞါညးဍုၚ်ကွာန် PDF ဌာနဝန်ဇၞော်ကာစဵုဒၞါ NUG သ္ဂောံပြံၚ်ဆုဲတံဂှ်တုဲ ပ္ဍဲဂိတုဖေဖဝ်ဝါရဳ ၂၃ တေံ NUG လလောၚ်ပ္တိတ်လဝ်ပရိုၚ်ရ။
ပ္ဍဲကဵုတမ်ဒပ်မ္ဒးဆုဲပြံၚ်တံဂှ် တမ်ဒပ် ၅၁၀၁၊ တမ်ဒပ် ၅၁၀၂ နူသၟဝ်ဌာနပၞာန်ရးလ္ဂုၚ်၊ ဂကောံဒပ်ပရေၚ်ဗ္တိုက် လၟေၚ် ၄ ဂကောံစဵုဒၞါညးဍုၚ်ကွာန် (ပကဖ) တံကဵု ဒပ်ဗ္တိုက်တၟေၚ် ဒေသပၞာန်သၠုၚ်ကျာ SOF တံ ပါလုပ်ရ။
ကိုဝ်ဇြေန်ယဝ် သ္ပလဝ်ဇြဳဒဳအာမ် နူကဵုဒပ်တိုက် ကဆံၚ်ဗိုလ်ဇၞော်ဂှ် ပ္ဍဲရးဗဂေါ အကာဲအရာပရေၚ်ပၞာန်သ္ဂောံအံၚ်ဇၞးမာန် နွံကီုလေဝ် ဂွံဝေၚ်ပၞာန်ဗ္တိုက် ကုလ္ဂုၚ်မာန်ဂှ် ဒေသမဆက်စပ်ဂမၠိုၚ် ချဳဒရာၚ်ကၠုၚ်တုပ်ပ်မာန်မှ အာဂွံဏောၚ်ဂှ် သ္ၚဳဂၠိပ်လဝ်ရ။
“ဗဂေါဂှ်တှ်ေ ဂွံအံၚ်ဇၞးဂှ် ဒှ်မာန်ဒၟံၚ်ဏောၚ်။ သီုလ္ပာ်ဗၟံက် သီုလ္ပာ်ပလိုတ်ဂှ် တိုန်ကၠုၚ်နကဵုဗီုပြၚ်ၝောံတဲဂတာမ် ၚေပ်ကၟာတ်ကေတ်ဂှ်ရ ဟီုစုတ်လဝ်သီုလ္ဂုၚ်ဂှ်တှ်ေ ညံၚ်ကံၚ်ဇြဳပၞာန် ဂွံထုဲထံၚ်အာဂှ် ဒှ်ပြယာဲပၞာန်ရောၚ် ချိၚ်ကေတ်ရ။ ယဝ်ရဝေၚ်ပၞာန်ထ္ပက် ကုလ္ဂုၚ်မ္ဂး တိဍာ်မဆက်စပ်တံလေဝ် ယဝ်ရကၠောန်ကၠုၚ်ပရေၚ်ပၞာန်တုပ်ပ်တံဂှ်မ္ဂး ပ္ဍဲလ္ဂုၚ် ထ္မံက်အာမုက်ပၞာန်မွဲမာန်ဏောၚ်။ ဟွံသေၚ်မ္ဂး အန္တရာယ်လေဝ်ဂၠိုၚ် ဝါတ်လေဝ်ဝါတ်ဒၟံၚ်ဏောၚ်” သာ်ဝွံ သ္ဂးရ။
ပ္ဍဲကဵုပယျဵုရခေၚ်−ဗဂေါဂှ် ပရေၚ်ဗ္တိုက်ပံၚ်တောဲ ကု AA တံလေဝ် နွံဒၟံၚ်တုဲ သွက်ရးဗဂေါ သ္ကုတ်ဗၟံက်ကဵု သ္ကုတ်ပလိုတ်တံဂှ် ပ္ဍဲတိဍာ်ဌာန်ဂအုပ်ပၞာန်ရးသၠုၚ်ကျာတံဂှ်လေဝ် ထ္မံက်ကၠုၚ်ပေါဲဗ္တိုက်တံမာန်ဂှ် ညးထံက်ထ္ၜးလဝ်ရ။
နကဵုဒပ်ပၞာန်ရခေၚ် AA ထ္ပက်ပၞာန်ဗ္တိုက်ဒၟံၚ် ကုဗ္ဒိုပ်ဒပ်ကံၚ်ဇြဳပၞာန် မချဳဒရာၚ်ဖျေံဒၟံၚ်သ္ဇိုၚ် ပ္ဍဲကဵုဒေသမဆက်စပ်ကဵု တွဵုရးရခေၚ် မပ္တံကဵုရးဗဂေါ၊ ရးမဂွဵု ကေုာံ ရးဨရာဝတဳတံဂှ်လေဝ် နွံဒၟံၚ်ရ။
NUG ဂှ်လေဝ် ဂွံလုပ်စိုပ်တိဍာ်ဨရာဝတဳဂှ် တုဲကၠုၚ်ပ္ဍဲဂိတုဒဳဇြေမ်ဗာတေံ ဒက်ပ္တန်လဝ် ဌာနပၞာန်ရးဨရာဝတဳ နကဵုဗျူဟာအဆံၚ်ၚ်တုဲ ဂွံကေတ်ပေါဲအံၚ်ဇၞးမာန်ဂှ် ပံၚ်တောဲကဵု EROs မဟာမိတ်တံတုဲ လုပ်ဒၟံၚ်ပေါဲဗ္တိုက်ရောၚ် ကဵုလဝ်သမ္တီရ။
သ္ကိုပ်ဝန်ဇၞော် မာန်ဝေန်ခိုၚ်တာန်ဂှ်တှ်ေ ကၟိန်ဍုၚ်ဝွံ သၞောတ်တၠအဝဵုပၞာန်အိုတ်အးမှဟေၚ် ဖောအ်ဗြေဝ်တောတက်ဏောၚ်ဂှ်ရ မ္ဒးစွံအာတၚ်ရန်တၟံခိုၚ်ၚ်ဗိုန်န်တုဲ လ္တူပရေၚ်ပါ်ထ္ကးဆီ အကြာဂကောံပၠန်ဂတးတံဂှ်လေဝ် လ္ပပၠောပ်ကတောဝ်အိုတ်ညိဂှ်လေဝ် ကဵုလဝ်သတိရ။
ပ္တဝ်က္ဍိုပ်ကဵု ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်အိုတ်အးအာဂှ်ရတုဲ ဆုဲပြံၚ်ဒပ်ဂှ်ဝွံ ဒှ်တရဴကလိတ်ကလောတ်မွဲဟွံသေၚ်ဂှ်ရ ဒဒှ်ရစှ်ေစိုတ် ဒုၚ်ဒဝ်မာန်ဏောၚ်ဂှ် ဟီုလဝ်ကဵု ကောန်ဒပ် PDF မဆုဲပြံၚ်ဒပ်တံဂှ်ရ။
ညးခါတ်အကာဲပရေၚ်ပၞာန်တံဂှ်တှ်ေ အခါထ္မံက်ကၠုၚ်ပေါဲဗ္တိုက် ပ္ဍဲရးလ္ဂုၚ်ကဵု ရးဗဂေါတံဂှ်တှ်ေ ပ္ဍဲကဵုဒေသမဆက် ဒေသမန်ကဵု ကရေၚ်ဂှ်လေဝ် မွဲအခိၚ်ဓဝ် ယဝ်ထ္ပက်ကၠုၚ်ပၞာန်မာန်မ္ဂး လ္ပာ်ကံၚ်ဇြဳပၞာန် သာတုဲဒးဂိမာန်ရောၚ် သ္ၚဳဂၠိပ်လဝ်ရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ကရောၚ်ပၞာန်ရာမညဖျေံသ္ဇိုၚ်တွဵုရးဍုၚ်မန်ဂှ် ပ္ဍဲဗဂေါကဵု မန်တံဂှ် ဂွံထ္ပက်အာပၞာန် မွဲအခိၚ်ဓဝ်မာန် နကဵုမဟာမိတ်ဂမၠိုၚ် ညံၚ်ပရေၚ်ဆက်စၠောံဂွံနွံဂှ် နွံပၟိက်ဗွဲတၟေၚ်ရောၚ် ဟီုရ။
“လၟုဟ် ပ္ဍဲလ္ပာ်ဗဂေါကဵု လ္ပာ်မန်တံ ဂွံထ္ပက်ပၞာန်မွဲအခိၚ်ဓဝ် တုပ်ပ်မာန်ဂှ် နကဵုဒပ်မဟာမိတ်ပၠန်ဂတးဂမၠိုၚ် နကဵုပရေၚ်ဆက်စၠောံနွံနွံ ဗွဲမသိပ်ဂၠိပ်ဂှ် ပ္ဍဲ Change of Command (COC) မွဲဒှ်ဒှ်၊ ဟွံသေၚ်မ္ဂး နဒဒှ် Join Operation Command ( JOC) တံဒှ်ဒှ် ဟွံသေၚ်မ္ဂး နဒဒှ် Joint Special Operation Command ( JSOC) ဒှ်ဒှ် သွက်ဂွံကၠောန်လဝ် ပရေၚ်ကောံကလောံမစှ်ေကဵုဗျူဟာတံဂှ် နွံပၟိက်ဗွဲတၟေၚ်ရောၚ်” သ္ဂးရ။
ဟိုတ်နူပရေၚ်ပၞာန် ၁၀၂၇ နူကဵုဂကောံမဟာမိတ်ကောဒေံပိဂကောံ မထ္ပက်ကၠုၚ်လဝ်ပၞာန် မွဲအခိၚ်ဓဝ်ဂှ်တုဲ ပ္ဍဲရခေၚ်ကဵု ပ္ဍဲရးသေံသ္ကုတ်သၟဝ်ကျာတံဂှ် ကံၚ်ဇြဳပၞာန် ဒးဗလးလဝ်တဲ ဗ္ဒိုပ်ဒပ်ဂမၠိုၚ် ပါလုပ်သီုကဵုဌာန်ဂအုပ်ပၞာန်ရးၜါ သီုကဵုတိဍာ်အုပ်ဓုပ်မဂၠိုၚ်ဂၠေၚ်ရ။
ဟိုတ်နူအသိၚ်ပရေၚ်ပၞာန်ဏံတုဲ ပ္ဍဲဒေသမဆက်စပ်ဂမၠိုၚ် ဒေသကချေၚ်၊ ချေၚ်၊ ကရေၚ်ဍာဲ၊ သက်ကိုၚ် ကေုာံ မဂွဵုတံဂှ်လေဝ် ပရေၚ်ပၞာန်မကြံၚ်မ္ၚိုဟ်ၜါလ္ပာ်တံ ဆက်နွံဒၟံၚ်တုဲ ဟိုတ်နူဝေၚ်မံၚ်ပေါဲဗ္တိုက်တံလေဝ် နွံဒၟံၚ်ဂှ်ရ လ္ပာ်ကံၚ်ဇြဳပၞာန် ဒးဂိဒၟံၚ်ဖိုဟ်ရ။
ဆ္ဂး ပ္ဍဲဒေသသ္ကုတ်သၠုၚ်ကျာ ပ္ဍဲကဵုဗဂေါ၊ မန်၊ ကရေၚ် ကေုာံ ပ္ဍဲကဵုရးတၞၚ်သဳတံဂှ် ဂကောံပၠန်ဂတးတံကဵု ဂကောံရပ်လွဟ်ကောန်ဍုၚ်အရၚ်ဇြဟတ်ဇၞော်တံ နွံဒၟံၚ်ကီုလေဝ် ပရေၚ်ပြုပြေၚ်ပၞာန်တံဂှ် ဝေၚ်ကၠုၚ်လဝ်တုပ်ပ်ဂှ် ဟွံမွဲဏီရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ အပ္ဍဲဒေသရဂှ် ဂကောံရပ်လွဟ်ဂမၠိုၚ် ပံၚ်တောဲတုဲ ထ္မံက်ကၠုၚ်ပေါဲဗ္တိုက်တုပ်ပ်ဂှ် ဟွံမွဲဏီပုဟ်ဂှ် ဟီုရ။
“အပ္ဍဲတွဵုရးဍုၚ်မန်ရဂှ် ထ္မံက်ကၠုၚ်ပေါဲဗ္တိုက်တံတုပ်ပ်ဂှ် ဟွံမွဲဏီပုဟ်။ လၟုဟ်ကရောၚ်ပၞာန်ရာမညတိတ်ကၠုၚ်ယျဟီုကီုလေဝ် ပ္ဍဲကရောၚ်ပၞာန်ဏံဂှ်လေဝ် ဒပ်မန်ပန်ဒပ်ရပါ။ PDF သှ်ေဒၟံၚ်တံ ဂကောံပၠန်ဂတးရပ်လွဟ်သှ်ေဒၟံၚ်တံဂှ်ဟီုဂှ် ပါလုပ်လဝ်ဟွံမွဲဏီပုဟ်။ ယဝ်ပါလုပ်ကၠုၚ်သာ်ဏံဟွံမွဲဏီပုဟ်ဟီုမ္ဂး ဂွံထ္မံက်ကၠုၚ်ပေါဲဗ္တိုက်တုပ်ပ်ဟီုဂှ် ဒှ်မာန်ဟွံသေၚ်ဏီပုဟ်ဂှ် နကဵုအဲ ညာတ်ကေတ်ရ” သာ်ဝွံ သ္ဂးရ။
နကဵုပရေၚ်ကဵုအမိၚ် COC တံကဵုဒှ် နကဵုပရေၚ်ပၞာန်ပံၚ်တောဲ ဒပ်မဟာမိတ် Military Alliance တံကဵုဒှ် ယဝ်ကၠောန်မာန်မ္ဂး သွက်ကံၚ်ဇြဳပၞာန် အကာဲအရာသာပရေံစှ်ေအာမာန်ရောၚ် နာဲနဂါ ထံက်ထ္ၜးလဝ်ရ။
ကရောၚ်ပၞာန်ရာမညဂှ်တှ်ေ ဒပ် MSRF ၊ ဒပ်ပၞာန်ဗၠးၜးဍုၚ်မန် MLA ၊ ဒပ်ပၞာန်ဗၠးၜးကောန်ဂကူမန် MNLA-AD ကေုာံ ဒပ်စဵုဒၞါဍုၚ်မန် MSDF တံ ပံၚ်တောဲဒက်ပ္တန်လဝ်ရ။
နကဵုကံၚ်ဇြဳပၞာန် အလုံဍုၚ်မွဲဂှ် ဒးဗလးလဝ်ပွိုၚ်ဍုၚ် ၅၅ တၟံကၠံတုဲ သှ်ေ ၂၄ တၟံကၠံဂှ်တှ်ေ ဒှ်ဒၟံၚ်ပေါဲဗ္တိုက်ဂှ်ရ အုပ်ဓုပ်ဂွံလဝ် ၜိုတ် ၃၂ တၟံကၠံရမာန်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် NUG ရ။
ကုဂကောံရပ်လွဟ်ဂမၠိုၚ် မထ္မံက်ကၠုၚ်ပေါဲဗ္တိုက် မသၠဲကၠုၚ်တိဍာ်တံဂှ် နကဵုဒပ်ပၞာန်ဗၟာ ဝေၚ်အာပၞာန်ဏောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုကြီုလဝ် ပ္ဍဲဂိတုဖေဖဝ်ဝါရဳ ၂၁ တေံရ။
ညးခါတ်အကာဲပရေၚ်ပၞာန်တံဂှ်တှ်ေ နကဵုဂကောံပၠန်ဂတးအပ္ဍဲဒေသဂမၠိုၚ် ဟၟဲကဵုအစောဲအလာံ ယဝ်ပံၚ်ကောံညးသ္ကအ် သၟဝ်ပရေၚ်ကောပ်ကာဲကဵုအမိၚ်မွဲဂှ်မာန်မ္ဂး မွဲအခိၚ်ဓဝ် ထ္မံက်အာပရေၚ်ပြုပြေၚ်ပၞာန်တံ မာန်ဏောၚ်ဂှ် ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MSDF