ၜဳကလေၚ်၊ ဖေဖဝ်ဝါရဳ ၂၆
ပ္ဍဲကဵုသၞေဟ်ကၚ်စၟဳတ်ဒဒန်ပသဲ လ္တူဂၠံၚ်ကွဳစက်လ္ဂုၚ်−မတ်မလီု ကွာန်တပျေနဳ ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် ညးသၟတ်အာတရဴ ၁၅ တၠ ဒးဒုၚ်ရပ်လဝ်ရောၚ် ညးဂွံညာတ်နမတ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဖေဖဝ်ဝါရဳ ၂၄ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် ကောန်ဒပ်ကံၚ်ဇြဳပၞာန် နူသၞေဟ်ကၚ်စၟဳတ်ဒဒန်ပသဲတံ ဗဒေါအ်လဝ် ကွဳစက်အာတရဴမွဲဖ္ဍိုက် မဒဳကၠုၚ်လ္ပာ်ပွိုၚ်ဍုၚ်ၜဳကလေၚ် ကၠုၚ်နူပွိုၚ်ဍုၚ်သဓီုဂှ်တုဲ ရပ်လဝ် ညးသၟတ်ပါကၠုၚ်လ္တူကွဳစက် ၁၅ တၠရ။
သၟတ်ဒးဒုၚ်ရပ်လဝ်တံဂှ် ကောန်ဒပ်ကံၚ်ဇြဳပာန်တံ ကဵုတိက်မပ် လ္တူဂၠံၚ်ကတ္တရာတုဲ စၟဳတ်လဝ်တုဲ ကြဴနူဂှ်တုဲ ကလေၚ်ဗလးကဵုလဝ် ကွဳစက်အာတရဴဂှ်ရောၚ် သ္ဂးရ။
အတိုၚ်ဂလာန် ညးဒေသဂွံညာတ်လဝ်နမတ်တံဂှ်မ္ဂး ညးသၟတ်ဒးဒုၚ်ရပ်လဝ်လ္ၚဵုတံ ဒးဒုၚ်ပန်ဂစိုတ်လဝ်နွံဒၟံၚ်ရောၚ် ဟီုကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ညးသၟတ်ဒးဒုၚ်ရပ်ဂမၠိုၚ်ဝွံ ဒှ်ရဲဒေသၜဳကလေၚ်တံဟွံသေၚ် ဟိုတ်နူရပ်ဒက်ကၟာတ်လဒဵုဒၟံၚ် ကမၠောန်ကျာဖျတံဂှ်တုဲ ဒှ်သၟတ်စှ်ေကၠုၚ်နူဗြဝတဳ ဒှ်ညးမအာလ္ပာ်လ္ဂုၚ်တံရောၚ် သ္ဂးရ။
ပ္ဍဲပွိုၚ်ဍုၚ်ၜဳကလေၚ်ဂှ် အပ္ဍဲအကြာတ္ၚဲတံဏံ ကံၚ်ဇြဳပၞာန် ရပ်ဒက် သၟတ်ကွာ်ဂၠံၚ်တံဂှ်တုဲ ပလံၚ်ဗစိုပ် ဇရေၚ်တန်ဗ္တောန်ကွတ်ပၞာန်တံကဵု ပရေၚ်ဘပဠအာတ်သြန်တံ နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ