လိုၚ်ဗၠဲ၊ မာတ် ၁
ပ္ဍဲကဵုတိဍာ်ဒပ်မဟာ ၇ ခရိုၚ်ဘာအၚ် ဗော်သွးကောန်ဂကူကရေၚ် KNU ဂှ်မပါလုပ် ပ္ဍဲကဵု ၃ ခရိုၚ်ဂှ် အကြာဒပ်ပံၚ်ကောံ KNLA ကဵု ဒပ်ကံၚ်ဇြဳပၞာန်တံဂှ် အကာဲအရာပရေၚ်ပၞာန်ၜါလ္ပာ် သာကြံၚ်မ္ၚိုဟ်ကၠုၚ်တုဲ ညးဍုၚ်ကွာန်ကောန်အရာပ်ဒေသဂမၠိုၚ် ဆက်ဒးဂြိပ်ဒဴပါဲဒလေတ်ဒၟံၚ်ရောၚ် တမ်ရိုဟ်ပရိုၚ်အပ္ဍဲဒေသဂမၠိုၚ် ဟီုရ။
ပ္ဍဲဂိတုဖေဖဝ်ဝါရဳ ၂၇ တေံ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန်မွဲ ပ္ဍဲကဵုတိဍာ်ဒပ်မဟာ ၇ ခရိုၚ်ဘာအၚ် KNU တွဵုရးကရေၚ် ပွိုၚ်ဍုၚ်လိုၚ်ဗၠဲ နွံဗ္ဒါဲပယျဵုသေံဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်တုဲ ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာရ။
ဟိုတ်နူဒပ်ကံၚ်ဇြဳပၞာန် ဗ္တိုက်ထောံကၠုၚ်ကဵုမခတိုဟ်ဂှ်တုဲ ညးဍုၚ်ကွာန်ဒေသ ၃၀၀ ပြၚ် နူပိကွာန် ပ္ဍဲကဵုပွိုၚ်ဍုၚ်လိုၚ်ဗၠဲဂှ်ဝွံ တတ်ကၠောံၜဳ(သောၚ်ရၚ်း) တုဲ ပါဲဒလေတ်ကၠုၚ် လ္ပာ်ဍုၚ်သေံတံနွံတုဲ ညးပါဲဘဲပၞာန်လ္ၚဵုတံလေဝ် ဒးဂြိပ်ဒဴပါဲဒလေတ်ဒၟံၚ် လ္ပာ်ဒၞါဲဗၠးဘဲတံဂှ် ညးဒေသတံ သ္ဂးရ။
ပ္ဍဲခရိုၚ်ဘာပန် KNU တိဍာ်ဒပ်မဟာ ၅ ဍုၚ်ကမမံၚ်ဂှ်လေဝ် ပ္ဍဲဂိတုဖေဖဝ်ဝါရဳ ၂၆ တေံ အကြာဒပ်မဟာ ၅ KNLA ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ၜါလ္ပာ် ထပ်က္တဵုဒှ်ဒၟံၚ်တုဲ ဒပ်ကံၚ်ဇြဳပၞာန် ထပ်ပန်ဒၟံၚ်ကဵုလွဟ်ဇၞော် ကေုာံ ပၞာန်ကျာ အပ္ဍဲကွာန်ဂမၠိုၚ်ဂှ်တုဲ ညးဍုၚ်ကွာန်ဒေသဂမၠိုၚ် ထပ်ဒးပါဲဒလေတ်ဒၟံၚ်ရ။
စနူဂိတုဖေဖဝ်ဝါရဳ သတ္တာဟတတိယဂှ်တုဲ ဒပ်ပံၚ်ကောံ ဒပ်မဟာ ၅ KNLA တံ လုပ်တရပ်စိုပ်ကၠုၚ် လ္ပာ်ဗ္ဒါဲဍုၚ်ကမမံၚ်ဂှ်ဂးတုဲ ဒပ်ကံၚ်ဇြဳပၞာန် ပန်ပှော်ကၠုၚ်လဝ် လ္တူကွာန်တံဏံ နကဵုလွဟ်ဇၞော်၊ သီုကဵုပၞာန်ကျာတံဂှ် အဆက်က်တုဲ သ္ၚိဒၟံၚ်ဂမၠိုၚ် ဇီုကပိုက်လီုလာ်အာလဝ်တုဲ ညးဍုၚ်ကွာန်ဒေသဂၠိုၚ်ကဵုလ္ၚီ ဒးပါဲဒလေတ်ဒၟံၚ် လ္ပာ်မျာၚ်ကျဳၚူရ။
ဒပ်ကံၚ်ဇြဳပၞာန်ဝွံ ညံၚ်ဗ္ဒိုပ်ဗျူဟာ ဍုၚ်ကမမံၚ် ဟွံဂွံစှ်ေအာဂှ် ကောန်ဒပ်ညးတံ ဗ္ဒါဲ ၇၀ ပြၚ် နွံပ္ဍဲဂၠံၚ်မျာၚ်ကျဳၚူ−မေဝ်တဝဝ်ဂှ် ကဵုကလေၚ်ရုပ်သီလဝ်တုဲ သွက်ဂွံဘိုၚ်ကဵုပၞာန်ရီု ဍုၚ်ကမမံၚ်ဂှ် ဗပေၚ်ဒၟံၚ်ဇြဟတ်တံ ကၠောန်ၜိုတ်ဒၟံၚ်ရ။
ပ္ဍဲတိဍာ်ဒပ်မဟာ ၆ KNU ဗ္ဒါဲဍုၚ်ကအ်ကြိက် ပ္ဍဲ ၃ ဒၞါဲဂှ်လေဝ် အကြာကရောၚ်ပၞာန်အံၚ်ဇေယျ ဒပ်ကံၚ်ဇြဳပၞာန်တံကဵု ဒပ်ပံၚ်ကောံပၠန်ဂတး KNLA တံဂှ် ကၞောတ်ဂိတုဏံဂှ် ပေါဲဗ္တိုက်ဂမၠိုၚ် သ္ကာတ်မြဟ်ဒၟံၚ် အဆက်က်တုဲ မကမ်လွဟ်ဇၞော်လ္ၚဵုတံဝွံ ဒတုံဗ္တိုဟ်ထ္ကးအာလဝ် အပ္ဍဲဍုၚ်ကအ်ကြိက်ရ။
သ္အာၚ်နူဂှ်ပၠန် ပ္ဍဲတိဍာ်ဒပ်မဟာ ၆ ပ္ဍဲကဵုပွိုၚ်ဍုၚ်လှာဒကှ် ကွာန်အနာန်ကွေန်၊ ကွာန်ခုနစ်ဝါ၊ ကွာန်ပါန်အံၚ်တံဂှ် တ္ၚဲအကြာတံဏံ ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုပၞာန်ကျာတုဲ ဒးအာလဝ် စမြိုၚ်သာသနာ ကေုာံ သ္ၚိဒၟံၚ်ဂမၠိုၚ်တုဲ လီုလာ်အာလဝ်နွံတုဲ ကောန်အရာပ်မွဲတၠ ချိုတ်တုဲ ညးဍုၚ်ကွာန် ဗ္ဒါဲ ၁၀ တၠ ပါလုပ်သီုကဵုခမဳသၚ်တံဂှ် ဇီုကပိုက်ကလိဂွံအာဝပ် နွံရောၚ် သ္ဂးရ။
ပရိုၚ်−သြၚ်လောန်တိုၚ်(မ်)
ဗီု−KNLA