နေဗျဳဒဝ်၊ မာတ် ၁
အလုံဍုၚ်မွဲ တၞဟ်နဂွံရပ်စပ်ဖအောန်ဖျေံ မသြန်တံဂှ်တုဲ ရပ်စပ်အာ သၞောတ် MMQR ဏောၚ်ဂှ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် ဟီုဂးလဝ်ရ။
ပ္ဍဲဂိတုဖေဖဝ်ဝါရဳ ၂၇ တေံ ပ္ဍဲကဵုအသေအဟာန် စရပ်စပ် MMQR မဒှ် National QR Standard သွက်ဂွံစကာသြန်ဒဳဂျေတ်ဒဴဍုၚ်ဗၟာ မကၠောန်ဗဒှ်လဝ် ပ္ဍဲဍုၚ်နေဗျဳဒဝ်ဂှ် ဟီုကၠုၚ်လဝ် သာ်ဏံရ။
တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ နကဵုကံၚ်ဇြဳပၞာန်လၟုဟ် ပ္ဍဲအရာတက်ပ္တိတ်လှုဲတၞးတံဂှ် ဟိုတ်နူအခက်အခုဲနွံကၠုၚ်တုဲ ရပ်စပ်ကၠုၚ်သၞောတ်ဏံ မဒှ်တုဲ ပၟတ်ဓာတ်လလဳရဂှ် ဟွံဂွံမှာန်န်တုဲ ဂွံဒှ်သွက်ညးဂမၠိုၚ်ဂှ် ဒှ်ဟွံမာန်ပုဟ်ဂှ် ဟီုရ။
“ မွဲလ္ပာ်ဏံဂှ် ဟွံကလေၚ်ပ္တိတ်လှုဲတၞးတံဂှ်ရတုဲ ဂွံပ္တိတ်ဂှ်လေဝ် အခက်အခုဲနွံဒၟံၚ်ဏောၚ်။ လ္ပာ်ဍေံတံလေဝ် ဂွံရာန်သြန်စက္ခူတံကီု စပ်ကဵုသြန်ဍုၚ်သ္အာၚ်တံ အောန်စှ်ေကၠုၚ်ဂှ်တုဲ ဒဒှ်ရဍေံတံဝေၚ်ဒၟံၚ်သၞောတ်ဏံဂှ် ကောတအ် ညာတ်ကေတ်ရ။ ဇၟာပ်မၞိဟ် ရပ်စပ်သၞောတ်ဏံမာန်ဂှ်လေဝ် ဟွံသေၚ်ဏီပုဟ်။ စိုပ်လေဝ် ဟွံစိုပ်ကဆံၚ်ဏံဏီပုဟ်။ တုဲပၠန် စပ်ကဵုနဲကွတ်ပညာဒဳဂျေတ်ဒဴဏံဂှ်လေဝ် ပ္ဍဲဍုၚ်ဏံ နွံပၟိက်ဒၟံၚ် တၟာဂလိုၚ်ဏီဏောၚ်။ ဇၟာပ်ပ်ဒၞါဲ စနူကဵုပရေၚ်ဂွံပၟတ်တံဂှ်ရဏောၚ်။ ဆက်စပ်ဒၟံၚ်သီုဖအိုတ်တုဲ ဂွံအုပ်ဓလီုအာသီုညးဖအိုတ်ဂှ် ဒှ်ဟွံမာန်ဏီပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် သၞောတ် MMQR ကံၚ်ဇြဳပၞာန် ရပ်စပ်အာဂှ်ဝွံ ဟိုတ်နူဒှ်သၞောဝ်ဒဳဂျေတ်ဒဴတုဲ ဒးကေတ်အေန်တာနိတ်ဏောၚ်တုဲ အခိၚ်လၟုဟ်ဂှ်တှ်ေ ပ္ဍဲဒေသ အပ္ဍဲဍုၚ် ဒၞါဲလ္ၚဵုတံဂှ် ကံၚ်ဇြဳပၞာန် ထပိုတ်လဝ်အေန်တာနိတ်တံဂှ်ရ ဒှ်ကလောန်ဟွံသေၚ်ပုဟ်ဂှ် ညးထံက်ထ္ၜးလဝ်ရ။
က္ဍိုပ်သ္ကိုပ်ပၞာန်ဂှ်တှ်ေ တိုက်သြန်ဗဟဵုလၟုဟ်ဝွံ ပ္ဍဲကဵုပရေၚ်ဖောအ်ဗြေဝ် သၞောတ်ကဵုကေတ်သြန်တံဏံဂှ် ဒှ်ဂကောံလျိုၚ်နွံ အဓိကဂှ်ရ ညံၚ်သၞောတ်ကဵုကေတ်သြန်ဍုၚ်ဗၟာဏံ ဂွံတောတက်ကၠုၚ် ဗွဲမဗဗွဲကဵုခေတ်ဍေံဂှ်ကီု၊ ဂွံရေၚ်တၠုၚ် ဗွဲမသၟဟ်ကဵုသၞောဝ်အစာံဍုၚ်နာနာတံကီု၊ ပ္ဍဲကဵုဘဝပရေၚ်မၞိဟ်ညးဍုၚ်ကွာန်ဂမၠိုၚ် ပ္ဍဲအရာကဵုကေတ်သောၚ်ကလးလှုဲတံဂှ် ပတှ်ေဖျေံစိုတ်ဂွံ ဂီုကၠီုနွံတုဲ ညံၚ်ဂွံမြက်ဇက်လောဲသွာဂှ် ရေၚ်တၠုၚ်ဒၟံၚ်ရောၚ် ဟီုရ။
သ္အာၚ်နူဂှ်ပၠန် ပ္ဍဲကဵုသၞောတ်သြန်လှုဲဏံ အိုဿီုကဵုညးဍုၚ်ကွာန်ဂမၠိုၚ် ဂွံပါလုပ်ကၠုၚ်မာန်ဂှ် သွက်ဂွံသၠုၚ်ပ္တိုန်အာကီု၊ ပွမရပ်စပ်သြန်တၞး အပ္ဍဲဍုၚ်တံဂှ် ဖအောန်ဖျေံတုဲ ညံၚ်ဂွံရပ်ဂလိုၚ်ပ္တိုန်အာ သၞောတ်ဒဳဂျေတ်ဒဴဏံမာန်ဂှ် ပ္ဍဲပရေၚ်သွံရာန်ဗၞိက်ဍုၚ်သ္အာၚ်၊ ပရေၚ်ဓလိုက်တမ်ရိုဟ်၊ ကမၠောန်အာတရဴတံကဵု ကိစ္စစပ်ကဵုပြၚ်လှုဲဍုၚ်သ္အာၚ်တံဂှ် ညံၚ်ဂွံကလိတ်ကလောတ် မ္ဒးကၠောန်လဝ် သၞောတ် MMQR ဏံဏောၚ် သ္ဂးရ။
ညးယိုက်ဝန်တိုက်သြန်မွဲတၠဂှ်တှ်ေ သၞောတ် MMQR လၟုဟ်ဝွံ ပကောံပကေဝ်ကၠေံ သၞောတ်ကဵုကေတ်လှုဲတိုက်သြန်တံ သီုဖအိုတ်ဂှ်တုဲ ဒှ်သဘဴတိုက်သြန်ဗဟဵု သၟဝ်တဲကံၚ်ဇြဳပၞာန်ဏံ ထိၚ်လဝ်ရောၚ် ဟီုရ။
“ QR Code ဍေံတံဂှ်တှ်ေ Pay လဵုဒှ်ဒှ် ဒုၚ်တဲဖအိုတ်။ လၟုဟ်တှ်ေ ဒုၚ်ဒၟံၚ်တဲ သီု KPay, သီု Wave Pay ၊ သီု Ayeyarwaddy ဖအိုတ်။ ဒြပ်ညးတံဏံဂှ်တှ်ေ ဒှ်သဘဴပကောံထောံလဝ် Pay တံဏံဖအိုတ်ရ၊ ဒှ်အာညးတံရ ထိၚ်လဝ်။ ညအ်ဂှ် မျာန်မာ Pay ဂးတုဲ တိုက်သြန်ဗဟဵု ထိၚ်ထောံရ။ လၟုဟ်တှ်ေ ပ္ဍဲကဵုဆေၚ်ဂမၠိုၚ် ပ္ဍဲကဵုဆေၚ်သတိုဝ်ပိုယ်တံဂှ်တှ်ေ သောၚ်လှုဲကဵု Wave Money လေဝ်ဂွံ၊ ဆေၚ်လ္ၚဵုတံတှ်ေ သွက် Wave Money ဂှ် ဒးကေတ် QR Code တၟိတၟိမွဲ။ KBZ Pay လေဝ် ဒးကေတ် QR Code တၟိမွဲ။ မဏံဂှ်တှ်ေ ဗီုဂှ်ဟွံသေၚ်၊ ဍေံမွဲဓဝ်ဂှ် ကမၠောန်တုဲဒၟံၚ်ရ။ ဒှ်အာဗီုပြၚ် ဍေံထိၚ်ထောံလဝ် Pay တံဏံဖအိုတ်ရ” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ မ္ဒးကၠောန်ကၠုၚ်လဝ် သၞောတ် MMQR ဂှ်ဝွံ ကမၠောန်တိုက်သြန်ဒဳဂျေတ်ဒဴတံ သာဖောအ်ဗြေဝ်တုဲ အကြာတိုက်သြန်ဂမၠိုၚ် အကြာညးမကဵုဒၟံၚ်ပရေၚ်ဒုၚ်ကာသြန်လှုဲမိုဝ်ဗိုၚ်နာနာသာ်တံ နွံပၟိက်ကဵု သၞောတ်မရေၚ်တၠုၚ်ဆက်စၠောံ မမြက်ဇက်မွဲဂှ်ရ ရပ်စပ်သၞောဝ်အစောံကောန်ဂကူဍုၚ်ဗၟာတုဲ ထ္မံက်ဒၟံၚ်ရုပ်ရဴ QR Code ဂှ် သ္ဂးရ။
မွဲလ္ပာ်ဂှ်ပၠန် က္ဍိုပ်သ္ကိုပ်ပၞာန်ဂှ်တှ်ေ ရပ်စပ်သၞောတ် MMQR တုဲ ပ္ဍဲကဵုပရေၚ်သောၚ်ကလးကဵုကေတ်သြန်တံ၊ အကံက်အခေါန်အလဵုအသဳ၊ ကဵုၚုဟ်မဳတာ၊ ပ္ဍဲကမၠောန်အာတရဴ ကေုာံ ပ္ဍဲပရေၚ်ကဵုသြန်ဂိတု ကုသ္ဇိုၚ်ဝန်ကၟိန်ဍုၚ်ဂမၠိုၚ်၊ ပွမပ္တိတ်ကဵုသြန်ပေန်သေန်၊ ကမၠောန်ပရေၚ်ပိုန်ဒြပ်ဍောတ်တံ၊ ဆေၚ်သွံကၠေၚ်စက်တံသၟးဟွံက ပ္ဍဲရုၚ်ဂဥုဲပူဂဵုတံလေဝ် ရပ်စပ်အာမာန်ဏောၚ် ဟီုလဝ်ရ။
သၞောတ် QR Code ဏံဂှ် လက်ထက်အလဵုအသဳ NLD တုဲကၠုၚ်တေံ အတိုၚ်မဟာဗျူဟာ သၞောတ်ရပ်စပ်သြန် ကောန်ဂကူ သၞာံ ၂၀၂၀−၂၀၂၅ ဂှ်မ္ဂး ကမၠောန်တိုက်သြန်ဒဳဂျေတ်ဒဴတံ ဖောအ်ဗြေဝ်တုဲ အကြာတိုက်သြန်ဂမၠိုၚ်ကဵု အကြာညးမရေၚ်တၠုၚ်ကဵုပရေၚ်ဒုၚ်ကာသြန်လှုဲမိုဝ်ဗိုၚ်နာနာတံဂှ် ဟိုတ်နူနွံပၟိက်ကဵုသၞောတ် မဆက်စၠောံရေၚ်တၠုၚ်ကဵု ဗွဲမပြဟ်မာန်တံဂှ်တုဲ ကၠောန်ကၠုၚ်လဝ်ရ။
ကြဴနူကၠောန်ကၠုၚ်လဝ်သာ်ဏံတုဲဂှ် သွက်သၞောတ်ရပ်စပ်သြန် QR Code ဏံဂှ် သၞာံတုဲကၠုၚ် ၂၀၁၉ နူလက်ထက်အလဵုအသဳ NLD တေံရ စဖျေံစၟတ်လဝ် Technical Specification Version 1.0 ဂှ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− MOI