မုဟ်ဍုၚ်၊ မာတ် ၁၁
တွဵုရးဍုၚ်မန် ပွိုၚ်ဍုၚ်မုဟ်ဍုၚ် ပ္ဍဲကဵုကွာန်ကၠအ်သတ်ဂှ် ဒပ်ကံၚ်ဇြဳပၞာန် ပန်ဂစိုတ်လဝ် သၟတ်မန်ဍိုက်ကၠုၚ်ကွဳလိုန်ဓာတ်ၜါတၠ နကဵုသေနာတ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲဂိတုမာတ် ၁၀ အခိၚ်နူဂယး ၜိုတ် ၁ နာဍဳဂှ် ကံၚ်ဇြဳပၞာန်ကဵုဒပ်ပံၚ်ကောံပၞာန်မၚ်ကွာန်တံ ပန်ဂစိုတ်လဝ် သၟတ်မန်ၜါတၠ မဍိုက်ကၠုၚ်ကွဳလိုန်ဓာတ်ဂှ် ပ္ဍဲဗ္ဒါဲရုၚ်ဂဥုဲကွာန် နကဵုသေနာတ် တြဴလစုတ်ရ။
ဟိုတ်နူဒးဒုၚ်ပန်ဂစိုတ်လဝ်ကဵုသေနာတ်ဂှ်တုဲ သၟတ်မန်ၜါတၠဏံဝွံ ဒးအာဘဲ ဂွံအာဝပ် ပ္ဍဲကဵုက္ဍိုပ်၊ ဒူစး၊ ပ္ဍဲတဲတံဂှ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
သၟတ်မန်ချိုတ်အာၜါတၠဂှ်ဝွံ ဒှ်မန်ထာဲ အာယုက် ၂၅ သၞာံ နူကဵုကွာန်ကၠအ်သတ်ဂှ်ကဵု သၟတ်အာယုက် ၂၅ သၞာံမွဲတၠ နူကဵုကွာန်ကအ်ပဳထဝ်ရ။
သၟတ်ၜါတၠ နူကဵုဒပ်ပံၚ်ကောံကံၚ်ဇြဳပၞာန်တံ မပန်ဂစိုတ်ဏာလဝ် ကဵုသေနာတ်ဂှ် ကၠဟ်စွံလဝ်အတိုၚ်ဏံတုဲ စိုပ်ပယျာံဂယးဂှ်မှ ပလံၚ်ဗစိုပ်လဝ် ရုၚ်ဂဥုဲပွိုၚ်တိုက်ကၟာဝက် နကဵုအရီုဗၚ်ညးဒေသတံဂှ်တုဲ စံင်ဇွဂြးဇုတ်ပတုဲလဝ်ကာ ပ္ဍဲသုသာန်ကွာန်ကၠအ်သတ်ဂှ် ညးဒေသတံ ဟီုရ။
အတိုၚ်ဂလာန်ညးဒေသတံဂှ်မ္ဂး သၟတ်မန်ၜါတၠဂှ်ဝွံ ဒှ်ညးကလိလောန်ဒးလဝ် ပရေၚ်ကၠတ်ကွဳလိုန်ဓာတ် အပ္ဍဲဒေသတုဲ ကြဴနူဒပ်ပံၚ်ကောံကံၚ်ဇြဳပၞာန်တံ ရပ်ဂွံ ညးတံၜါတၠတုဲဂှ် ပန်ဂစိုတ်လဝ် နကဵုသေနာတ်ရောၚ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။
စပ်ကဵုလၟေၚ်ဒဒှ်သၟတ်မန်ၜါတၠ ဒးဒုၚ်ပန်ဂစိုတ်ဂှ်တုဲ လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် မမိက်ကဵုမွဲမွဲဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ