ထဝါဲ၊ မာတ် ၁၁
ဗ္ဒိုပ်သၞေဟ်ကၚ်စၟဳတ်ကံၚ်ဇြဳပၞာန်ၜါ နွံအပ္ဍဲခရိုၚ်ထဝါဲ ရးတၞၚ်သဳဂှ် ဒးဒုၚ်လုပ်စိုပ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် မသုန်တၠ ချိုတ်အာလဝ်ရောၚ် ကရောၚ်ပၞာန်ဒူရက လလောၚ်ပ္တိတ်လဝ်ရ။
ပ္ဍဲဂိတုမာတ် ၇ တုဲကၠုၚ်တေံ ဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် သၞေဟ်ကၚ်ဒဒန်စၟဳတ် ဂၠံၚ်လုပ်ဍုၚ်ဍာ်ဗုကဵု ဗ္ဒိုပ်သၞေဟ်ကၚ်(ဟားလီးကွေ့) ကွာန်(မောၚ်မယ်ရှောၚ်) ပွိုၚ်ဍုၚ်ထဝါဲဂှ်ရ။
အပ္ဍဲပရေင်ဗ္တိုက် ဗ္ဒိုပ်သၞေဟ်ကၚ်စၟဳတ် (ဟားလီးကွေ့) ကွာန်မောၚ်မယ်ရှောၚ်ဂှ် က္တဵုဒှ်လဝ်ပေါဲဗ္တိုက် လလအ်ပွိုၚ်မွဲနာဍဳပြၚ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်အာလဝ်ရောၚ် သ္ဂးရ။
လအာတုပ်သာ်ဂှ်ကီု ပ္ဍဲကဵုတ္ၚဲဂှ်ရ အခိၚ်ဇိုၚ်သဝ်တ္ၚဲဂှ်လေဝ် ကောန်ဒပ်ကံၚ်ဇြဳပၞာန် နွံပ္ဍဲသၞေဟ်ကၚ်ဒဒန်စၟဳတ် ဂၠံၚ်လုပ်ဍုၚ်ဍာ်ဗုဂှ် ထပ်ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန်ပန်တၠ ချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အပ္ဍဲပရေၚ်ဗ္တိုက်ၜါဏံဂှ် လ္ပာ်ဒပ်ပံၚ်ကောံစဵုဒၞါညးဍုၚ်ကွာန်တံ ဇီုကပိုက်ဒးဟွံမွဲ ကလေၚ်ဆုတ်ကလေၚ်လဝ်ဂှ် သ္ဂးရ။
ပရေၚ်ဗ္တိုက်ဏံဂှ် ကရောၚ်ပၞာန်ဒူရက ဒပ်ပၞာန်ဗၠးၜးကောန်ဂကူထဝါဲ DNLA တံ သ္ကိုပ်သ္ကတုဲ ဒပ်စဵုဒၞါညးဍုၚ်ကွာန်ပွိုၚ်ဍုၚ်ဍာ်ဗု YPPDF တံ ပံၚ်တောဲဗ္တိုက်လဝ်ရ။
တုဲကၠုၚ်ပ္ဍဲဂိတုဂျာန္နဝါရဳ ၂၉ တေံဂှ်လေဝ် ဒပ်ပံၚ်ကောံစဵုဒၞါညးဍုၚ်ကွာန်တံ ဗ္တိုက်သီဂွံလဝ် သၞေဟ်ကၚ်စၟဳတ်ဒဒန်ယှိုဲဂူကံၚ်ဇြဳပၞာန် ပ္ဍဲပွိုၚ်ဍုၚ်တယိတ်ချံၚ် ခရိုၚ်ထဝါဲဂှ်တုဲ အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ဟွံအောန်နူမသုန်တၠ ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−ဒူရကစစ်ကြောင်း