နေဗျဳဒဝ်၊ မာတ် ၁၁
ဟိုတ်ဒၟါနူကဵုလဝ်အခေါၚ်အရာ ဒဳမဝ်ကရေဇြဳ၊ သီုကဵုအခေါၚ်အရာကောန်ဍုၚ်အရၚ်တံဂှ်ရတုဲ ဆလအ်မှ ကဵုအာအခေါၚ်အရာမွဲလ္ပာ်ဓဝ်တံ ဂွံဟွံသေၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် ဟီုလဝ်ရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် သဵုကဵုလဝ် မဳဒဳယျာပရိုၚ်အပ္ဍဲဍုၚ် မဒှ်မဳဒဳယျာထံက်ဂလာန်ဒပ်ပၞာန်တံ မသၟာန်ကၠုၚ်လဝ် လ္တူက္ၜၚ်ကျာ စပ်ကဵုပရေၚ်ၜိုဟ်လလမ် စဴနူလၟေၚ်တရဴရုယှာကဵု ဗဴလာရုသ်ဂှ်ရ။
နကဵုပရေၚ်ဍုၚ်ကွာန်ဂှ်တှ်ေ သ္ဂုတ်သွာတ်လဝ် သွက်ဂွံအာ နသၞောတ်ဒဳမဝ်ကရေဇြဳဗော်ဇဳ အတိုၚ်ညးဍုၚ်ကွာန်တံ မအာတ်မိက်လဝ်ဂှ်တုဲဂှ်ရ ဂွံထ္မံက်ရုပ်ရဴမာန်ဂှ် ဒးပံၚ်တောဲရေၚ်တၠုၚ်အာဏောၚ်တုဲ သီုကဵုဒးကၠောန် ပရေၚ်ၜိုဟ်လလမ်အပ္ဍဲဍုၚ်ဏောၚ်ဂှ်လေဝ် သ္ဂးရ။
နကဵုဂကောံရပ်လွဟ်ကောန်ဍုၚ်အရၚ် EAO တံဂမၠိုၚ် လ္ပဟီုၜိုတ်မိက်ဂွံဒှ်သၟးတုဲ အရာမထေက်ကဵုဒှ်၊ အရာဒှ်မာန်တံဂှ်ရ ဟီုအိုတ်ညိဂှ်ကီု၊ အရာတံဏံဂှ် လ္ပာ်ကောန်ဍုၚ်အရၚ်တံ ဒးချပ်လဝ်ထေက်ရောၚ် က္ဍိုပ်သ္ကိုပ်ပၞာန် ဟီုရ။
တိဍာ်ကောန်ဍုၚ်အရၚ်သှ်ေဒၟံၚ်တံဂှ် ကဵုက္ဍိုပ်ရေၚ်တၠုၚ်အာဏောၚ်တုဲ ယဝ်မိက်ဂွံဂွံသၞောတ်ဒဳမဝ်ကရေဇြဳဗော်ဇဳမ္ဂး လ္ပဒစဵုဒစးမွဲသာ် မိက်ဂွံကဵုပံၚ်တောဲရေၚ်တၠုၚ်ဂှ် သ္ဂးရ။
အခိၚ်လၟုဟ် ဟိုတ်နူပေါဲဗ္တိုက်ထပိုတ်ရိုဟ်ကၞက်သၞောတ်တၠအဝဵုပၞာန် အလုံဍုၚ်မွဲဂှ်တုဲ ကံၚ်ဇြဳပၞာန် ထိၚ်ဂွံလဝ် ပွိုၚ်ဍုၚ် ၜိုတ် ၉၀ ပွိုၚ်ဍုၚ်ဓဝ်ရ။
က္ဍိုပ်သ္ကိုပ်ပၞာန်ဂှ်တှ်ေ စဳဇန်လဝ် သွက်ဂွံကၠောန်ဗဒှ်ပေါဲရုဲမာဲ ပ္ဍဲသၞာံ ၂၀၂၅ ဏံ ဂိတုဒဳဇြေမ်ဗာတေံ ဟွံသေၚ်မ္ဂး ပ္ဍဲသၞာံ ၂၀၂၆ ဂိတုဂျာန္နဝါရဳတေံဂှ် ဟီုပ္တိတ်လဝ် ပ္ဍဲဍုၚ်ဗဴလာရုသ်ရ။
နူဍုၚ်ရုယှာ ကေုာံ ဍုၚ်ဗဴလာရုသ်တံ ကော်ဘိက်ကၠုၚ် တရဴပရေၚ်ဆာန်ကၟိန်ကဆံၚ်ကၟိန်ဍုၚ်ဂှ်တုဲ က္ဍိုပ်သ္ကိုပ်ပၞာန် ကေုာံ ကောန်ဂကောံဂမၠိုၚ်ဝွံ အာစိုပ်လဝ် နူဂိတုမာတ် ၃ စဵုကဵုဂိတုမာတ် ၉ ပွိုၚ်မွဲသတ္တာဟရ။
စပ်ကဵုပေါဲရုဲမာဲတုဲ အလဵုအသဳၜါလ္ပာ်တံဂှ်တှ်ေ လုပ်စိုပ်ထံက်ကဵုဂလာန် ဒုၚ်ကဵုလျိုၚ် လ္ပာ်ကံၚ်ဇြဳပၞာန်တုဲ ဒဒှ်ရဗလးကဵုအာ သီုဂကောံမၚ်လ္ၚတ်တံဂှ်ဏောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ဂကောံရပ်လွဟ်ကောန်ဍုၚ်အရၚ်တံကဵု ဂကောံဇြဟတ်ပၠန်ဂတးတံဂှ်တှ်ေ ပေါဲရုဲမာဲပတောံ ကံၚ်ဇြဳပၞာန် ဖန်ဇန်ဒၟံၚ် သ္ဂောံကၠောန်ဗဒှ်ဂှ် ဒစဵုဒစးဗ္တိုက်သရိုဟ်အာဏောၚ်ဂှ် လလောၚ်တြးလဝ်တုဲတုဲရ။
ပရိုၚ်−သြၚ်လောန်တိုၚ်(မ်)
ဗီု−MRTV