ထာန်တပေန်၊ မာတ် ၁၁
ပ္ဍဲရးဗဂေါ ပွိုၚ်ဍုၚ်ထာန်တပေန်ဂှ် ဒပ်ကံၚ်ဇြဳပၞာန် အာစိုပ်ပလံၚ်ဒၟံၚ် မကမ်လွဟ်လက်နက်ဇွောံမတံဂှ် ဟိုတ်နူဒပ်ပံၚ်ကောံ KNLA KNDO PDF တံ ကၟာတ်လဒဵုဗ္တိုက်လဝ်တုဲ ကောန်ဒပ်ကံၚ်ဇြဳပၞာန်ဂမၠိုၚ် ဂြိပ်ထ္ကးပြးအာအိုတ်ဂှ် စစ်တောင်း Campaign လလောၚ်ပ္တိတ်လဝ်ပရိုၚ်ရ။
ကောန်ဒပ်ကံင်ဇြဳပၞာန် နူကဵုဗ္ဒိုပ်(ရေသုတ်ကြီး) မလုပ်စိုပ်ၜက်ၜေတ်ဖျေံလဝ်ဒပ် ပ္ဍဲပွိုၚ်ဍုၚ်(ထာန်တပေန်) တဝ်တထူ တိဍာ်ထိၚ်ဒဝ်ဒပ်မဟာ ၂ KNU ဂှ်ဝွံ အခိၚ်အာစိုပ်ပလံၚ်ဒၟံၚ် လွဟ်လက်နက်မကမ်ဇွောံမ ဇရေၚ်ဗ္ဒိုပ်ဒပ်နဝ်သဵု ပ္ဍဲဂိတုမာတ် ၉ အခိၚ်နူဂယး ၜိုတ် ၇ နာဍဳဂှ် ဒးဒုၚ်ဗ္တိုက်လဝ်ကဵု ဒပ်ပံၚ်ကောံ KNLA KNDO PDF တံရ။
ကောန်ဒပ်ကံၚ်ဇြဳပၞာန်တံဝွံ နူကဵုဗ္ဒိုပ်(ရေသုတ်ကြီး) အခိၚ်စိုပ်ဒၟံၚ်အကြာဗ္ဒိုပ်(နောစိုးစစ်) ကဵု ကွာန်(ခူလောၚ်) ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA, KNDO, PDF တံ ကြတ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်တံ ဂြိပ်ပြးထ္ကးအာအိုတ်တုဲ သီဂွံလဝ် MA-3 မွဲဇကိုအ်ကဵု MA-4 ပန်ဇကိုအ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
တုဲကၠုၚ် ပ္ဍဲဂိတုမာတ် ၈ အခိၚ်နူဂယး ၜိုတ် ၇ နာဍဳဂှ်လေဝ် ဒပ်ပံၚ်ကောံ KNLA PDF တံ သီဂွံလဝ် ဗ္ဒိုပ်တပျေညောအ် ဒပ်ကံၚ်ဇြဳပၞာန် ပ္ဍဲကဵုပွိုၚ်ဍုၚ်(သံတောၚ်ကြီး) ပယျဵုတွဵုရးကရေၚ်ကဵု ရးဗဂေါ တိဍာ်ဒပ်မဟာ ၂ ခရိုၚ်တံၚ်ဥူ KNU ဂှ်တုဲ လ္ပာ်ဒပ်ကံၚ်ဇြဳပၞာန် မၞိဟ်ချိုတ်အာ ဂၠိုၚ်လဝ်ရောၚ် ကရောၚ်ပၞာန် KNLA, PDF တံ လလောၚ်ပ္တိတ်လဝ်ပရိုၚ်ရ။
ပ္ဍဲဗ္ဒိုပ်တပျေညောအ်ဂှ် ဒှ်ဗ္ဒိုပ်ကောန်ဒပ်ကံၚ်ဇြဳပၞာန် သၟဝ်တဲတမ်ဒပ် ခလရ ၇၃ ဖျေံသ္ဇိုၚ်ဍုၚ်(ဇရပ်ကြီး) ပွိုၚ်ဍုၚ်ထာန်တပေန် မဒှ်တမ်ဒပ်သၟဝ်တဲ ဌာန်ဂအုပ်ပၞာန်ရးသၠုၚ်ကျာ ဖျေံသ္ဇိုၚ်ပွိုၚ်ဍုၚ်တံၚ်ဥူ၊ ရးဗဂေါဂှ်မွဲရ။
အပ္ဍဲပေါဲဗ္တိုက်ဗ္ဒိုပ်တပျေညောအ်ဂှ် သီဂွံလဝ် ဇရေၚ်ဒပ်ကံၚ်ဇြဳပၞာန်တံ လွဟ်ဇၞော်၊လွဟ်ဍောတ်၊ ကပေါတ်ဆက်စၠောံဂမၠိုၚ် ကေုာံ မကမ်ဗွဲမဂၠိုၚ်ဂၠေၚ်ရောၚ် ကရောၚ်ပၞာန်( ရိုးမ) လၟေၚ် ၂ တမ်ဒပ်ကောန်မာန်ဒိုဝ်တၟေၚ်ဂှ်လေဝ် လလောၚ်ပ္တိတ်လဝ်ပရိုၚ်တုဲ အခိၚ်ကာလသီဗ္ဒိုပ်တံကဵု အပ္ဍဲအခိၚ်သီဗ္ဒိုပ်တံဂှ် ဒပ်ကံၚ်ဇြဳပၞာန် ကၠောန်ကၠုၚ်ဒၟံၚ်ပရေၚ်ဗ္တိုက်ပၞာန်ကျာတံရ။
ပရိုၚ်−သြၚ်လောန်တိုၚ်(မ်)
ဗီု−စစ်တောင်း Campaign