(ဘုတ်ပြင်း) ၊ မာတ် ၁၂
ရးတၞၚ်သဳ ပ္ဍဲပွိုၚ်ဍုၚ်(ဘုတ်ပြင်း) ဂှ် ပေါဲဗ္တိုက်ဟွံမွဲမွဲသာ် ဟိုတ်နူပရေၚ်ကံၚ်ဇြဳပၞာန်တံ ဗ္တိုက်ကၠုၚ်ကဵုပၞာန်ကျာဂှ်တုဲ ကောန်ၚာ်အာယုက် ၉ သၞာံမွဲတၠမပါလုပ် ညးဗြဴၜါတၠ ဇီုကပိုက်ကလိဂွံအာလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၁၀ အခိၚ်ဇိုၚ်သဝ်တ္ၚဲ ၜိုတ် ၃ နာဍဳဂှ် ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုပၞာန်ကျာ ပ္ဍဲကွာန်(ခဲချောင်း) ပွိုၚ်ဍုၚ်(ဘုတ်ပြင်း) ရ။
ဟိုတ်နူဒးဒုၚ်ထောံလဝ်မခတိုဟ်ဂှ်တုဲ ဒတုံဗ္တိုဟ်ထ္ကးအာလဝ် အပ္ဍဲကွာန်(ခဲချောင်း) တုဲ သ္ၚိၜါမ နွံဗ္ဒါဲဗ္ဒမ်ဂဥုဲကွာန်(ခဲချောင်း) ဂှ်လေဝ် ဒးအာကဝေက်ဗုမ် လီုလာ်အာလဝ်ရောၚ် ညးတြုံဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ထောံမခတိုဟ်ဂှ် သၟတ်ဗြဴအာယုက် ၉ သၞာံမွဲတၠ ကလိဂွံအာဝပ် ပ္ဍဲဒဳတုဲ ဒုၚ်လွဳလွတ်ဒၟံၚ် ပ္ဍဲရုၚ်ဂဥုဲ ကွာန်ဒံၚ်ၚေဝ်ဂှ် ဂွံတီကေတ်ရ။
ပွိုၚ်ဍုၚ်(ဘုတ်ပြင်း) ဝွံ ညံၚ်ရဴပွိုၚ်ဍုၚ်တၞဟ်ဟ် အပ္ဍဲရးတၞၚ်သဳတံဂှ် က္တဵုဒှ်ပေါဲဗ္တိုက်ကီု၊ လ္ပာ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ကီုဂှ် အောန်တဴဗွဲမလောန်ရ။
တုဲကၠုၚ်ဂိတုမာတ် ၃ တေံဂှ်လေဝ် ပ္ဍဲပွိုၚ်ဍုၚ်တၞၚ်သဳကဵု ပွိုၚ်ဍုၚ်တယိတ်ချံၚ်ဂှ် ပေါဲဗ္တိုက်က္တဵုဒှ်ဟွံမွဲမွဲသာ် ဟိုတ်နူကံၚ်ဇြဳပၞာန် ထောံကၠုၚ်မခတိုဟ်ဗ္တိုက်ကၠုၚ်ကဵုပၞာန်ကျာတံဂှ်တုဲ ကောန်ၚာ်သၟတ်ပိတၠ မပါလုပ် ညးဍုၚ်ကွာန်ကောန်အရာပ် ၇ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ