ကအ်ကြိက်၊ မာတ် ၁၂
အကြာဒပ်ပံၚ်ကောံ KNLA PDF တံကဵု ကရောၚ်ပၞာန်ကံၚ်ဇြဳပၞာန် မလုပ်စိုပ်ကၠုၚ်ပ္ဍဲပွိုၚ်ဍုၚ်ကအ်ကြိက် တွဵုရးကရေၚ် နဒဒှ်ပရေၚ်ပြုပြေၚ်ပၞာန်အံၚ်ဇေယျ ကဆံၚ်ကၟိန်ဍုၚ်ဂှ် ပပ္တံနူသၞာံဏံ ဂိတုဖေဖဝ်ဝါရဳကြပ်အိုတ်တေံဂှ်တုဲ ပေါဲဗ္တိုက်ၜါလ္ပာ်တံ ကလေၚ်က္တဵုဒှ်ကၠုၚ်ဒၟံၚ် ဗွဲမသ္ကာတ်မြဟ်ရ။
သွက်ဂွံကလေၚ်ထိၚ်အုပ်ဓလီု ဒေသဗြဝတဳ၊ တေန်ဂါန်ညဳနံၚ်ကဵု ဂၠံၚ်ဇၞော်အာယှတံဂှ် သၞာံတုဲကၠုၚ် သၞာံ ၂၀၂၄ ပ္ဍဲဂိတုဨပရဴတေံ ဒပ်ကံၚ်ဇြဳပၞာန် စထ္မံက်ကၠုၚ်လဝ်ပရေၚ်ပြုပြေၚ်ပၞာန်အံၚ်ဇေယျ ကဆံၚ်ကၟိန်ဍုၚ်ဂှ်တုဲ သၞာံဏံ ၂၀၂၅ စဵုကဵုဂိတုမာတ်ဏံ ကြပ်ပွိုၚ်မွဲသၞာံဂှ် ပေါဲဗ္တိုက်ၜါလ္ပာ် ဆက်ဒှ်ဒၟံၚ်ရ။
အကြာဒပ်ပံၚ်ကောံပၠန်ဂတးတံကဵု ဒပ်ကံၚ်ဇြဳပၞာန် သၟဝ်တဲကရောၚ်ပၞာန်အံၚ်ဇေယျ ဖျေံဒၟံၚ်ဒပ် လ္ပာ်လ္တူဍာ်လဂေါဝ်တဝ်နဝ် လ္တူဂၠံၚ်ဇၞော်ကအ်ကြိက်−ဗြဝတဳ−အာယှဂှ် ပေါဲဗ္တိုက်ဂမၠိုၚ် ဆက်ဒှ်ဒၟံၚ်တုဲ အကြာဒပ်ကရောၚ်ပၞာန်အံၚ်ဇေယျ နွံဗွဲဒိုဟ်သၟဝ်ကျာဍုၚ်ကအ်ကြိက်ကဵု ဒပ်ပံၚ်ကောံတံဂှ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရ။
သ္အာၚ်နူဂှ်ပၠန် ၜိုတ်ကၞောတ်ဂိတုဖေဖဝ်ဝါရဳတုဲကၠုၚ်တေံ ကရောၚ်ပၞာန်အံၚ်ဇေယျဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန် လ္ပာ်ဍုၚ်ကအ်ကြိက် သ္ကုတ်သၠုၚ်ကျာ လ္ပာ်ကွာန်ကအ်ဏိကဵု ကွာန်တၟိတံဂှ်တုဲ အကြာဒပ်ပံၚ်ကောံ KNLA PDF တံဂှ် က္တဵုဒှ်လဝ်ပေါဲဗ္တိုက် မွဲဒမြိပ်ကွာန်တၟိကဵု ကွာန်ကအ်ဏိ ဗွဲမသ္ကာတ်မြဟ်တုဲ ပရေၚ်ဇီုကပိုက်သီုၜါလ္ပာ်တံ နွံဒၟံၚ်ရောၚ် လ္ပာ်ဒပ်ပံၚ်ကောံပၠန်ဂတးတံ လလောၚ်ပ္တိတ်လဝ်ပရိုၚ်ရ။
ပေါဲဗ္တိုက်ၜါလ္ပာ် က္တဵုဒှ်လဝ် သ္ကုတ်သၠုၚ်ကျာကအ်ကြိက် ပ္ဍဲကဵုကွာန်တၟိကဵု ကွာန်ကအ်ဏိတံဂှ်ဝွံ ဆက်ဒှ်ဒၟံၚ် ဒဵုကဵုဂိတုဏံ ဂိတုမာတ်ဏံဂှ်တုဲ သ္ၚိကောန်ကွာန်ကအ်ဏိ၊ ကွာန်တၟိတံ ဂၠိုၚ်ကဵုကၠံဂှ် စံၚ်ပလီုလဝ်တုဲ ထောံဂြာတ်ကၠုၚ်လဝ်မခတိုဟ် နကဵုပၞာန်ကျာ လ္တူကွာန်မၞုံသ္ကုတ်သၠုၚ်ကျာဍုၚ်ကအ်ကြိက်တံ ဗွဲမသ္ကာတ်မြဟ်ရ။
ဟိုတ်နူဒပ်ကံၚ်ဇြဳပၞာန် ဗ္တိုက်ထောံကၠုၚ်မခတိုဟ်ကဵုပၞာန်ကျာ လ္တူကွာန် မနွံသ္ကုတ်သၠုၚ်ကျာကအ်ကြိက်တံဂှ်တုဲ ဘာဗ္တောန်လိက်၊ ဘာလကျာ် ကေုာံ စမြိုၚ်သ္ၚိဒၟံၚ် ဗွဲမဂၠိုၚ်ဂၠေၚ် ဒးဇီုကပိုက်လီုလာ်အာလဝ်တုဲ ညးဒေသလ္ၚဵုတံဂှ်လေဝ် ဇီုကပိုက်ကလိဂွံလဝ်ဝပ်တံ နွံဂှ် KNU ဗဟဵု လလောၚ်ပ္တိတ်လဝ်ပရိုၚ်ရ။
ဒပ်ကံၚ်ဇြဳပၞာန်ဂှ်တှ်ေ ထပ်ဗပေၚ်ကၠုၚ်ဒၟံၚ်ဇြဟတ်ဒပ် ဇရေၚ်ကရောၚ်ပၞာန်အံၚ်ဇေယျ မဒှ်ပရေၚ်ပြုပြေၚ်ပၞာန်ကဆံၚ်ကၟိန်ဍုၚ် မစိုပ်ဒၟံၚ်ပ္ဍဲပွိုၚ်ဍုၚ်ကအ်ကြိက်ဂှ် နကဵုကောန်ဒပ်စှ်ေနူတန်ဗ္တောန်ကွတ်ပၞာန်တံ ဗွဲမဂၠိုၚ်ဂၠေၚ်တုဲ ပ္တဝ်ကၠုၚ်က္ဍိုပ် လ္ပာ်ကအ်ကြိက် သ္ကုတ်သၠုၚ်ကျာဂှ်တုဲ ဝေၚ်မံၚ်ပၞာန်ထ္ပက်ရ။
ကောန်ဒပ်ကံၚ်ဇြဳပၞာန် နူကဵုတမ်ဒပ်သၟဝ်တဲကရောၚ်ပၞာန်အံၚ်ဇေယျ စိုပ်ဒၟံၚ်ပ္ဍဲပွိုၚ်ဍုၚ်ကအ်ကြိက် ဗ္ဒါဲပွိုၚ်မွဲသၞာံဏံဂှ်ဝွံ လုပ်စိုပ်ဖျေံလွဟ် ဂြိပ်တိတ်ကၠုၚ် လ္ပာ်ဂကောံဒပ်ပၠန်ဂတး KNLA တံ နွံဒၟံၚ်တၟာဂလိုၚ်ရောၚ် ဂွံတီကေတ် ဇရေၚ်ဂကောံဒပ်ပၠန်ဂတးတံရ။
ပရိုၚ်−သြၚ်လောန်တိုၚ်(မ်)
ဗီု−KNU