နေဗျဳဒဝ်၊ မာတ် ၁၂
က္ဍိုပ်သ္ကိုပ်ပၞာန် စဴကၠုၚ်နူလၟေၚ်တရဴဍုၚ်သ္အာၚ်တုဲဗက် ညးစၞးတၟေၚ်ကြုက်တံ သ္ဂောံသၠုၚ်ပ္တိုန်အသိၚ် ပရေၚ်ပံၚ်တောဲရေၚ်တၠုၚ်ၜါဍုၚ်ဂးတုဲ ကၠုၚ်စိုပ်သဳကၠဳလဝ် နေဗျဳဒဝ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ညးစၞးတၟေၚ်ကေၚ်ကာအာယှ ဌာနဝန်ဇၞော်ကာဍုၚ်သ္အာၚ်ကြုက် မေဿတာတုက်ယှဳကျေန် ဆဵုဂဗကဵု ဝန်ဇော်ကာဍုၚ်သ္အာၚ်လ္ပာ်ကံၚ်ဇြဳပၞာန် ဥူတာန်ဇြိုဲ ပ္ဍဲဂိတုမာတ် ၁၀ တေံတုဲ သဳကၠဳလဝ် ပရေၚ်မရေၚ်တၠုၚ်အာ သ္ဂောံဒှ်ဖဵုအကြာၜါဍုၚ် မဒှ်ရ။
ပ္ဍဲကဵုပရေၚ်လွဳပရာ အပ္ဍဲဍုၚ်ဗၟာ ညံၚ်ပရေၚ်ၜိုဟ်လလမ် ဂွံတန်တဴအာဍာ်ဇမၠိၚ် ကေုာံ ညံၚ်ပရေၚ်မၞိဟ်ပရေၚ်ပိုန်ဒြပ် ညးဍုၚ်ကွာန်တံ ဂွံတောတက်ဖောအ်ဗြေဝ်ဂှ် ဍုၚ်ကြုက် ဆက်ရီုဗၚ်ကဵုအာဏောၚ် သာ်ဝွံ ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဥူကျဳမျေတ် ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာဂှ်တှ်ေ ကံၚ်ဇြဳပၞာန်ဝွံ ဂွံလဝ်တၚ်တုပ်စိုတ် ကုရုယှာတုဲဂှ်ရ ခါတ်ကေတ်အကာဲနကဵုပရေၚ်ကလုတ်တမာန်တုဲ အလဵုအသဳကြုက် ကၠုၚ်စိုပ်ဟီုဏာလဝ် ဒဒှ်ရဟွံကၠအ်ထောံလဝ် ပရေၚ်ဍုၚ်ဗၟာပုဟ်ဂှ် သ္ၚဳဂၠိပ်လဝ်ရ။
“ဆဵုလဝ်ကဵုရုယှာတုဲ သၠုၚ်မံၚ်ဟာ ဂွံနၚ်မွဲမွဲသာ်ဟာ သာ်ဝွံ ကလုတ်ဍုၚ်သ္အာၚ်တံဂှ်တှ်ေ ခါတ်တိုန်အကာဲသာ်ဏံအိုတ်ရ။ လ္ပာ်ဏံဂှ်လေဝ် ၜိုတ်ဓမ္မတာဂှ် ဍုၚ်ကြုက်ဂှ်တှ်ေ စွံစိုတ်အတိုၚ်ကၠာတေံရဏောၚ်။ နွံပၟိက်ကဵုပရေၚ်ပယျဵု ဂွံညိၚ်ဝတ်။ ညးတံလေဝ် စပ်ကဵု EAO တံတုဲ ရေၚ်တၠုၚ်ဒၟံၚ်ဗီုတေံဗီုဏံ။ ဍေံတံ(အလဵုအသဳကြုက်) ဟွံကၠဟ်ထောံလဝ် ပရေၚ်ဍုၚ်ဗၟာပုဟ်။ ဍေံတံလေဝ် ကၠောန်ဒၟံၚ်ကီုဏောၚ် ဟီုကၠုၚ်သာ်ဏံဏောၚ်ဂှ် ချိၚ်ကေတ်ရ” သာ်ဝွံ သ္ဂးရ။
ဟိုတ်နူဍုၚ်ရုယှာကဵု ဍုၚ်ဗဴလာရုသ်တံ ကော်ဘိက်ကၠုၚ်တရဴပရေၚ်ဆာန်ကၟိန်ကဆံၚ်ကၟိန်ဍုၚ်ဂှ်တုဲ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကေုာံ ဂကောံညးဂမၠိုၚ်ဝွံ အာစိုပ်လဝ်ပွိုၚ်မွဲသတ္တာဟ နူဂိတုမာတ် ၃ စဵုကဵုဂိတုမာတ် ၉ ရ။
ပ္ဍဲလၟေၚ်တရဴဏံဂှ် ထ္ပက်လဝ်စၟတ်တဲတုပ်စိုတ် ကုအလဵုအသဳၜါဍုၚ် ပ္ဍဲကဵုကဏ္ဍနာနာ မပ္တံကဵုကဏ္ဍပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်စဵုဒၞါ၊ ပရေၚ်နဲကွတ်ပညာ၊ ပရေၚ်ဇြဟတ်ဓာတ်လလဳတံဂှ်တုဲ ကုပေါဲရုဲမာဲကၠောန်ဗဒှ်အာဂှ်လေဝ် ထံက်ကဵုဂလာန်ဏောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပ္ဍဲကဵုညးစၞးတၟေၚ်ကြုက် ကေုာံ ဝန်ဇၞော်ကာဍုၚ်သ္အာၚ်ကံၚ်ဇြဳပၞာန်တံ ဆဵုဂဗညးသ္ကအ်ဂှ် သွက်ဂွံသၠုၚ်ပ္တိုန် ပရေၚ်ညိၚ်ဝတ် မွဲဒမြိပ်ပယျဵုဗၟာ−ကြုက်ဂှ်မပါလုပ် သဳကၠဳလဝ် လၟေၚ်ကမၠောန်ပရေၚ်ၜိုဟ်လလမ်အပ္ဍဲဍုၚ် ကေုာံ ပရေၚ်ကောန်ဂကူဂွံကလေၚ်သာဓာအာညးသ္ကအ်တံရ။
ဥူကျဳမျေတ်ဂှ်တှ်ေ နကဵုအလဵုအသဳကြုက် ထံက်ဒၟံၚ်ဂလာန်ကဵု ပေါဲရုဲမာဲကံၚ်ဇြဳပၞာန် မကၠောန်ဗဒှ်အာဂှ်တုဲ ညံၚ်ဂွံဒှ်ကၠုၚ်ဂှ် ကဵုကၠုၚ်ဇြဟတ်ဂရိုဟ် ကုဂကောံရပ်လွဟ်ကောန်ဍုၚ်အရၚ်တံမာန်ရောၚ် သ္ၚဳဂၠိပ်လဝ်ရ။
“ညအ်ဂှ်တှ်ေ ဍေံတံကၠောန်အာအဆက်က်ရဏောၚ်။ ဒှ်သာ်လဵုတှ်ေ ဍေံတံဂှ် နွံပၟိက်ကဵု ညံၚ်ပေါဲရုဲမာဲဂွံဒှ်ကၠုၚ်ဂှ်ဏောၚ်။ အေ ဂှ်တှ်ေ ပ္ဍဲကဵုတိဍာ်ကောန်ဍုၚ်အရၚ်တံ သီလဝ်တံဂှ် ယဝ်ဒှ်မာန်မ္ဂး ကဵုထောံအခေါၚ်ကၠောန်ပေါဲရုဲမာဲညိ ဟီုကၠုၚ်သာ်ဏံဏောၚ်ဂှ် ထေၚ်ကေတ်ရ။ ကဵုအာဇြဟတ်ဂရိုဟ်ဏောၚ်ဂှ် ထေၚ်ကေတ်ရ။ ဟိုတ်ဂှ်ရ ယဝ်ကၠောန်ပေါဲရုဲမာဲဏောၚ်ဟီုမ္ဂး ဗော်လဵုဂွံဇၞး သာ်ဏံဂှ်လေဝ် အကာဲအရာဟွံကဵုပုဟ်။ ဆ္ဂး ဍေံတံ(ကြုက်) ကဵုအာဇြဟတ်ဂရိုဟ်ဏောၚ်။ ကဆံၚ်သဝ်အိုတ် ကၠောန်ကၠုၚ်ပေါဲရုဲမာဲမ္ဂး ညံၚ်ဟွံဂွံလုပ်ပထုဲဝိုၚ်။ ဗီုဏံဂှ် ဟီုကၠုၚ်ချိုတ်ပၠိုတ်ဏောၚ်” သာ်ဝွံ သ္ဂးရ။
သ္ဂောံကၠောန်ဗဒှ်ပေါဲရုဲမာဲ ပ္ဍဲသၞာံ ၂၀၂၅ ဂိတုဒဳဇြေမ်ဗာ ဟွံသေၚ်မ္ဂး သၞာံ ၂၀၂၆ ဂိတုဂျာန္နဝါရဳဂှ် စဳဇန်လဝ်ရောၚ် က္ဍိုပ်သ္ကိုပ်ပၞာန် ဟီုပ္တိတ်ကၠုၚ်လဝ် ပ္ဍဲပေါဲသောၚ်ကလးလိက်ပရိုၚ်ပံၚ်တောဲ မကၠောန်ဗဒှ်လဝ် ပ္ဍဲဍုၚ်ဗဴလာရုသ်ရ။
အလဵုအသဳကြုက် လုပ်စိုပ်ပ္ညဳပ္ညပ်ကဵုဒၟံၚ် ပ္ဍဲပရေၚ်ဍုၚ်ဗၟာဂှ်လေဝ် ဂွံကၠောန်ဗဒှ်ပေါဲရုဲမာဲမာန်ဂှ် ပ္တိတ်ကၠုၚ်ဒၟံၚ်ဇြဟတ်အဆက်က် ညံၚ်အကြာကံၚ်ဇြဳပၞာန်ကဵု ဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာတံ ဂွံဒေါအ်ပန်ပှော်ရ။
ဒှ်သာ်ဂှ်ရ အကြာကံၚ်ဇြဳပၞာန်ကဵု ဒပ်ကဝ်က MNDAA တံဂှ် ထ္ပက်လဝ်စၟတ်တဲ လိက်ကသုက်ဒေါအ်ပန်ပှော်ကီုလေဝ် ကဵုဒပ်တအာၚ် TNLA ဂှ်တှ်ေ ဟွံဂွံတၚ်တုပ်စိုတ်မွဲသာ် ပေါဲသဳကၠဳဂှ် တုဲအာလဝ်အတိုၚ်ဂှ်ရ။
မွဲလ္ပာ်ဂှ်ပၠန် ဒပ်ရခေၚ် AA ပ္တိတ်ဒၟံၚ်ဇြဟတ် သ္ဂောံသီထိၚ် အလုံဒေသရခေၚ်မွဲဂှ်လေဝ် ဂွံသောၚ်ကလးနကဵုနဲကဲပရေၚ်ဍုၚ်ကွာန်ဂှ် ဒှ်ဒၟံၚ်ဒတုဲလၟိုန်ရောၚ် လလောၚ်တြးလဝ်တုဲ ဒဵုကဵုအခိၚ်လၟုဟ်ဂှ် သီုၜါလ္ပာ် ဆဵုဂဗသဳကၠဳလဝ်ဂှ် ဟွံမွဲဏီရ။
ပ္ဍဲကဵုပရေၚ်ညးစၞးတၟေၚ်ကြုက်ကဵု ကံၚ်ဇြဳပၞာန်တံ ဆဵုဂဗလဝ်လၟုဟ်ဂှ်လေဝ် အပ္ဍဲဒေသကီု၊ အပ္ဍဲအကြာညးဂၠးတံကီု ၜါဍုၚ် သွက်ဂွံထံက်ဂလာန်အာညးသ္ကအ် ကေုာံ သွက်ပရေၚ်ပံၚ်တောဲတံဂှ် သဳကၠဳလှာဲဂတးလဝ်လညာတ်ရ။
စပ်ကဵုဇာဇၞိက်လီဠာန် ကေုာံ ဝိုၚ်ဝေၚ်လပှ်ကျာ ဂၠိုၚ်တိုန်ကၠုၚ်ဒၟံၚ် ပ္ဍဲဒေသပယျဵုတံဂှ်လေဝ် ဂွံဗ္တိုက်သရိုဟ်အာဂှ် သဳကၠဳလဝ် ကိစ္စပရေၚ်ပံၚ်တောဲ အကြာဂကောံဗော်သွးမဆေၚ်စပ် ၜါဍုၚ်တံဂှ်ရောၚ် လလောၚ်ပ္တိတ်လဝ်ပရိုၚ်ရ။
ပ္ဍဲကဵုမုက်လိုက်ဇာဇၞိက်ပရေၚ်မၞိဟ် Facebook ရုၚ်ကလုတ်ကြုက်စပ်ကဵုဍုၚ်ဗၟာဂှ်တှ်ေ စပ်ကဵုလၟေၚ်တရဴ ညးစၞးတၟေၚ်ကေၚ်ကာအာယှ မေဿတာ တုက်ယှဳကျေန် ကၠုၚ်စိုပ်လဝ်နေဗျဳဒဝ်ဂှ်တုဲ ပြဟ်ဟ်ဏံ ထ္မံက်ထ္ၜးလဝ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−MOI