ၜဳကလေၚ်၊ မာတ် (၁၃)
ပ္ဍဲတွဵုရးဍုၚ်မန်၊ ပွိုၚ်ဍုၚ်ၜဳကလေၚ် ပ္ဍဲအကြာတ္ၚဲတံဏံ ညးသၟတ်ဗ္ဒါဲ(၂၀)တၠ ဒးဒုၚ်ရပ်ဒက်လဝ်တုဲ ဗွဲမဂၠိုၚ်တံဂှ် အဆက်ပိုတ်ဒၟံၚ်ကဵု ဂကောံသ္ၚိကၟိန်တံရောင် ညးဒေသတံ ဟီုကဵုဌာန်ပရိုင်သြၚ်လောန်တိုၚ်မ်ရ။
ညးသၟတ်ဒးဒုၚ်ရပ်ဒက်တံဂှ် သၟတ်နူကွာန်တံ ဂၠိုၚ်နူကဵုသၟတ်နူလ္တူဍုၚ်တံဏီတုဲ လ္ၚဵုတံဂှ် ဒးဒုၚ်ရပ်လဝ် အခိၚ်အာကၠုၚ်ဒၟံၚ်လ္တူဂၠံၚ်တံတုဲ လ္ၚဵုတံဂှ် လုပ်စိုပ်ရပ်ဒက်ဏာလဝ် စဵုကဵုအပ္ဍဲသ္ၚိဒၟံၚ်ရ။
သၟတ်ဒးဒုၚ်ရပ်တံဂှ် ဒှ်သၟတ် အကြာအာယုက် (၂၀) ကဵု (၃၀)တုဲ အပ္ဍဲဂှ်ဂှ် သၟတ်ဗြဴ(၃)တၠလေဝ်ပါလုပ်ဒၟံၚ်ရ။
အတိုၚ်ညးဒေသတံ သ္ၚဳဂၠိပ်လဝ်ဂှ်မ္ဂး သွက်ကံၚ်ဇြဳပၞာန်တံ သ္ဂောံပကောံပကေဝ် ကောန်ဒပ်ယိုက်ဂၠေၚ်တာလျိုၚ်ပၞာန်တုဲ ရပ်ဒက်လဝ် သၟတ်ဒးဒုၚ်ရပ်လဝ်တံဂှ်တုဲ ဗွဲမဂၠိုၚ်ဂှ် ထိၚ်ဒက်လဝ် ပ္ဍဲတံဒပ်တိုက် စၟတ်(၈) ဖျေံသ္ဇိုၚ်ၜဳကလေၚ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်တံ ဟိုတ်နူတၚ်နွံပၟိက် ညးယိုက်ဂၠေၚ်တာလျိုၚ်ပၞာန်ဂှ်တုဲ ရပ်ဒက်ဒၟံၚ်သၟတ်တံ ပ္ဍဲအခိၚ်ကၟာတ်ဆိုအ်စၟဳစၟတ် အခိၚ်ဗ္တံတံကဵု သၟတ်မၞိဟ်တြုံ(၂)တၠ ဍိုက်ကွဳလိုန်ဓါတ်မွဲစွံတံ အဆက်က်ရ။
ကံၚ်ဇြဳပၞာန်ဂှ် ကၠာတေံ အာတ်မိက်သြန် ကုသၟတ်မရပ်ဒက်ဏာတံ ဗွဲမဂၠိုၚ်ဂၠေၚ်တုဲ ကလေၚ်ဗလးကဵုဒၟံၚ်တံ နွံဒၟံၚ်ကီုလေဝ် လက်ကြဴဏံ လ္ဂောံကဵုတၚ်နွံပၟိက်ကောန်ဒပ်တံတုဲ သာတုဲကၠောန်ကၠုၚ် ပွပ္ကောံပ္ကေဝ် ကောန်ဒပ်တၟိတံရဂှ် ညးဒေသတံ ဟီုအိုတ်ရ။
အတိုၚ်လိက်ဒုၚ်စဳရေၚ် လၟေၚ်လိက်လ္ဂန်အိန်ဂှ်မ္ဂး ပ္ဍဲတွဵုရးဍုၚ်မန်ဂှ် တုဲကၠုၚ်ပ္ဍဲဂိတုဖေဖဝ်ဝါရဳမွဲဂိတုဂှ် ညးဒေသ (၆၄)တၠ ဒးဒုၚ်ရပ်ဒက်လဝ်တုဲ ဗွဲမဂၠိုၚ်တံဂှ် ထ္ၜးဟိုတ်ကဵု ပရေၚ်ယိုက်ဂၠေၚ်တာလျိုၚ်ပၞာန်ကဵု တၚ်စောတ်စောဲ ထံက်ပလံၚ်ဒၟံၚ်ဂကောံဇြဟတ်ပၠန်ဂတးတံတုဲ ရပ်ဒက်ဏာလဝ်ရ။
ပရိုၚ်-သြၚ်လောန်တိုၚ်မ်
ဗီု-CJ