(ဘုတ်ပြၚ်း)၊ မာတ်(၁၃)
ပ္ဍဲရးတၞၚ်သဳ၊ ပွိုၚ်ဍုၚ်(ဘုတ်ပြၚ်း) ပ္ဍဲကၠအ်သတ်ဗြဴကၠေၚ် ဗ္ဒါဲဂအာၚ်ကမၠောန် ဧက (၃၀၀) ကုမ္ဗဏဳကၠေၚ်သတ်ဗြဴယုဇန ပိုၚ်ပြဳလဝ်ဂှ် ဟိုတ်နူ ညးဗြဴသၟာကမၠောန်ကၠအ်သတ်ဗြဴကၠေၚ်မွဲတၠ လိုန်ဒးမာၚ်တိုပ်တိတုဲ ဗ္တိုဟ်ထ္ကးအာဂှ်ရ ဇိုၚ်ပိုတ်အာရဂှ် ဂွံတီကေတ် နူပရိုၚ်တံရိုဟ်ပ္ဍဲဗလးတိတံရ။
ပ္ဍဲဂိတုမာတ်၊ စၟတ်တ္ၚဲ(၁၂) ၜိုတ်အခိၚ်လ္ဒေါဝ်တ္ၚဲ (၁၂)နာဍဳဂှ် ညးဗြဴအာယုက်(၅၂)သၞာံဂှ် အခိၚ်ဗဝ်ဒၟံၚ်ဆောဲ ပ္ဍဲကၠအ်သတ်ဗြဴကၠေၚ်ဂှ် ဟိုတ်နူလိုန်ဒးမာၚ်တိုပ်တိတုဲ ဒးဂဗလဝ်ကဵုပွဗတိုဟ်ထ္ကးတံရ။
ဟိုတ်နူလိုန်ဒးမာၚ်တိုပ်တိတုဲ ဗ္တိုဟ်ထ္ကးအာလဝ်ဂှ်ရ ညးဗြဴဂှ် ဇိုၚ်လ္ပါ်ပါဲပိုတ်တိတ်အာတုဲ ပြဟ်ဟ်ဏံဂှ်တှ်ေ ဒးဒုၚ်လွဳလွတ်ဒၟံၚ် ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်(ဘုတ်ပြၚ်း)ရ။
အတိုၚ်လဟီုဂကောံဇြဟတ်ပၠန်ဂတး ဖျေံသ္ဇိုၚ်ဒေသတံဂှ်မ္ဂး ပ္ဍဲကၠအ်သတ်ဗြဴ ညးဗြဴဂှ်လိုန်ဒးလဝ်မာၚ်တိုပ်တိဂှ် ဒပ်ကံၚ်ဇြဳပၞာန်တံ မၚ်တောပ်ဗ္တိုက်ဒၟံၚ်တံနွံတုဲ မာၚ်ဏံဂှ် ဒှ်မာၚ်ကံၚ်ဇြဳပၞာန်တံ ပါမ်လဝ်ရဂှ် ဟီုရ။
ပ္ဍဲကၠအ်သတ်ဗြဴကၠေၚ် မၞုံပ္ဍဲပွိုၚ်ဍုၚ်(ဘုတ်ပြၚ်း)တံဂှ် ကောန်ဂကောံဒပ်ကံၚ်ဇြဳပၞာန်တံ လေပ်မၚ်တောပ်ဗ္တိုက်ဒၟံၚ်တုဲ ကၠောန်သ္ပဒၟံၚ် ပရေၚ်တောပ်ဗ္တိုက် ဒပ်စဵုဒၞါဒေသတံရဂှ် သ္ဂးရ။
ပ္ဍဲရးတၞၚ်သဳဂှ် ပ္ဍဲကာလသီအဝဵုဏံ ဟိုတ်နူမာၚ်တိုပ်တိတံကဵု လွဟ်လက်နက်မသှ်ေသၟေဟ်ဒၟံၚ်တံ ဗ္တိုဟ်ထ္ကးတံတုဲ ညးဍုၚ်ကွာန်ကောန်အရာပ်တံ ဒးဂဗဒၟံၚ်ကဵု ပွဇီုကပိုက်ချိုတ်ဂျိုၚ်တံ မွဲဏှမွဲဏှရ။
ပရိုၚ်-သြၚ်လောန်တိုၚ်မ်
ဗီု-CJ