နေဗျဳဒဝ်၊ မာတ်(၁၃)
ကြဴနူပံက်ဟီု အခိၚ်ကၠောန်ဗဒှ်ပေါဲရုဲမာဲတုဲဂှ် သွက်ဂွံပံၚ်တောဲရေၚ်တၠုၚ်အာဂှ် ညးစၞးတၟေၚ်စပ်ကဵုကေၚ်ကာအာယှ ဌာနဝန်ဇၞော်ကာဍုၚ်သ္အာၚ်ကြုက် တုက်ယှဲကျေန် ဆဵုဂဗသဳကဳၠလဝ်ကဵု က္ဍိုပ်သ္ကိုပ်ပၞာန် ပ္ဍဲဂိတုမာတ် စၟတ်တ္ၚဲ(၁၁)တေံရ။
အပ္ဍဲလၟေၚ်တရဴ ဗာလာရုသ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ် စဳဇန်လဝ် သွက်ဂွံကၠောန်ဗဒှ်အာ ပေါဲရုဲမာဲ ပ္ဍဲဂိတုဒဳဇြေမ်ဗါသၞာံဏံ ဟွံသေၚ်မ္ဂး ပ္ဍဲဂိတုဂျာန္နဝါရဳ သၞာံဂတတေံရဂှ် ပံက်ဟီုလဝ်ရ။
အခိၚ်မေဿတာ တုက်ယှဳကျေန် ဆဵုဂဗကဵုက္ဍိုပ်သ္ကိုပ်ပၞာန်ဂှ် သဳကၠဳလဝ် အကာဲအရာ ဍုၚ်ကြုက်တံ ကၠောန်သ္ပအာ ပရေၚ်ပံၚ်တောဲ စပ်ကဵုလၟေၚ်ကမၠောန်အဓါန်ဂတ ကံၚ်ဇြဳပၞာန် ထ္မံက်ဒၟံၚ်ရုပ်ရဴ (၅)သာ်တံကဵု ပရေၚ်ဒစးဒုၚ်ပလေတ်ပလေတ် သွက်သ္ဂောံကၠောန်ဗဒှ်ပေါဲရုဲမာဲတံရ။
အကာဲအရာ ရေၚ်တၠုၚ်ဒၟံၚ်လၟေၚ်ကမၠောန် ပရေၚ်ၜိုဟ်လလံ မွဲကရောံကုဍုၚ်ကြုက်တံမပါလုပ် သဳကဳၠလဝ် ကမၠောန်ပရေၚ်တာဒၞါ ဂဥုဲၜူမာဲတံရဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
သ္အာၚ်နူဂှ်ပၠန် အကာဲအရာၜါကၟိန်ဍုၚ်တံ ရေၚ်တၠုၚ်ဒၟံၚ် ညံၚ်ပရေၚ်လံၚ်ဇျှၚ်ဝေၚ်သြန်လ္တူအောန်လာၚ်တံကဵု ပရေၚ်လီဠာန်သြန်လ္တူအောန်လာၚ်တံ သ္ဂောံကၠေံဗ္ဒန်အာတံမပါလုပ် စပ်ကဵုကိစ္စ ပရေၚ်ကူသာန်သွံရာန်ဗၞိက် ပ္ဍဲဒေသပယျဵုတံဂှ်လေဝ် သဳကဳၠလဝ်ရ။
ပ္ဍဲဂိတုမာတ် စၟတ်တ္ၚဲ(၁၀)ဂှ်လေဝ် ဝန်ဇၞော်ကာဍုၚ်သ္အာၚ်ကံၚ်ဇြဳပၞာန် ဥူတာန်ဇြွေကဵု မေဿတာတုက်ယှဳကျေန်တံ ဆဵုဂဗလဝ်ညးသ္ကအ်တုဲ သဳကဳၠလဝ် သွက်သ္ဂောံသၠုၚ်ပ္တိုန်အာအသိၚ် ပရေၚ်ပံၚ်တောဲၜါကၟိန်ဍုၚ် စပ်ကဵုပရေၚ်ၜိုဟ်လလံ၊ ပရေၚ်ညိၚ်ဝတ်ဒေသပယျဵု၊ ပရေၚ်မၞိဟ်ပရေၚ်ပိုန်ဒြပ်သ္ဂောံဖောအ်ဗြေဝ်တဴတက်တံရ။
ညးလ္ၚတ်တံဂှ်တှ်ေ လၟေၚ်တရဴဗာလာရုသ် က္ဍိုပ်သ္ကိုပ်ပၞာန်ကေုာံ ကောန်ဂကောံတံတုဲဗက် ညးစၞးကြုက်တံ စိုပ်ကၠုၚ်နေဗျဳဒဝ်ဂှ်တှ်ေ ပါ်ပါဲလ္ဂောံကဵုပရေၚ်ကလုတ်တမာန်တံတုဲ ကၠုၚ်ဟီု ဒဒှ်ရ ဟွံကၠဟ်ပါဲထောံပရေၚ်ကၟိန်ဍုဗၟာတံရောၚ်ဂှ် သ္ၚဳဂၠိပ်လဝ်ရ။
လ္ဂောံကဵုတၚ်ကော်ဘိက် လၟေၚ်တရဴပရေၚ်ဆာန်ကၟိန် ကဆံၚ်ကၟိန်ဍုၚ် နူဍုၚ်ရုယှာကေုာံ ဍုၚ်ဗာလာရုသ်တံဂှ်မ္ဂး က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ကေုာံ ကောန်ဂကောံတံဂှ် နူဂိတုမာတ်(၃) စဵုစိုပ်ဂိတုမာတ်(၉) အာစိုပ်လဝ် လလအ်ပွိုၚ်မွဲသတ္တာဟရ။
ပ္ဍဲလၟေၚ်တရဴဏံဂှ် မပ္တံပ္ဍဲကဏ္ဍပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်စဵုဒၞါတံဂှ် ထ္ပက်လဝ်စၟတ်တဲ လိက်ကသုက်တုပ်စိုတ် ပရေၚ်ပံၚ်တောဲၜါကၟိန်ဍုၚ်တံမာန်လဝ်တုဲ ပေါဲရုဲမာဲဂှ်လေဝ် ရုယှာကေုာံဗာလာရုသ်တံ ထံက်ဂလာန်တုဲ ကဵုအာအရီုဗၚ်ရောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပရိုၚ်-သြၚ်လောန်တိုၚ်မ်
ဗီု-MOI