ကအ်ကြိက်၊ မာတ် (၁၄)
နာဲသြဆာန် က္ဍိုပ်သ္ကိုပ်ဌာန်ဂအုပ်ကအ်ဍုၚ် ဒပ်စဵုဒၞါၜိုဟ်လလမ်ဂကူမန် မဒှ်ဒပ်ပၞာန်မင်ကွာန် မံၚ်သၟဝ်အဝဵုသြဇာ ကံၚ်ဇြဳဳပၞာန်ဂှ် ဒၟါနူဒးဒုၚ်ပန်ကဵုသေနာတ်တုဲ ချိုတ်အာလဝ်ဂှ် ဂွံတီကေတ် နူပရိုၚ်တမ်ရိုဟ် ပ္ဍဲဒေသတံရ။
ပ္ဍဲဂိတုမာတ် စၟတ်တ္ၚဲ(၁၃) အခိၚ်နူဂယးၜိုတ်(၈)နာဍဳဂှ် နာဲသြဆာန် ရာန်တၞးဇဗၠု ပ္ဍဲကွာန်ကအ်ဗိန် ပွိုၚ်ဍုၚ်ကအ်ကြိက် တွဵုရးကရေၚ်တုဲ မစဴကၠုၚ်လ္ပာ်ကွာန်ကအ်ဍုၚ်ညးမွဲဓဝ်ဂှ် ဂကောံရပ်လွဟ်မွဲဂကောံ ကြတ်ဗ္တိုက်လဝ် ပ္ဍဲဗ္ဒါဲကွာန် (ဇီးဖြူကုန်း)ရ။
ဟိုတ်နူဒးဒုၚ်ကြတ်ဗ္တိုက်ဂှ်တုဲ နာဲသြဆာန် ဒးအာဘဲဝပ်မကမ် ပ္ဍဲက္ဍိုပ်၊ သီုအလုံဇကုမွဲတုဲ ဒးချိုတ်အာလဝ် ပ္ဍဲဒၞါဲဒှ်ပရေၚ်ဂှ်ရ။
ဂကောံရပ်လွဟ်ဂှ်တှ်ေ ကြဴနူပန်ဂစိုတ်လဝ်နာဲသြဆာန်တုဲဂှ် လုပ်ဗ္တိုက်ဏာလဝ် ဌာန်ဂအုပ်ကအ်ဍုၚ် ဒပ်စဵုဒၞါပရေၚ်ၜိုဟ်လလမ်မန်ကီုဂှ် သ္ဂးရ။
အပ္ဍဲပရေၚ်ဗ္တိုက်ဏံ ဖိုဝ်တုက် ညးမဒှ်ကောန်ရဲနာဲသြဆာန် ကေတ်ဒၟံၚ်ဂီုကၠီု ပ္ဍဲဌာန်ဂအုပ်ကအ်ဍုၚ်ဂှ် ချိုတ်အာလဝ်ရောၚ် ဟီုဂးဒၟံၚ်ကီုလေဝ် စပ်ကဵုလၟေၚ်ဒဒှ်ဏံတုဲ နူကဵုသြၚ်လောန်တိုၚ်မ် သ္ပဒတန်တၞဟ်ခြာ ဟွံမာန်ဏီရ။
နာဲသြဆာန် ဒးဒုၚ်ပန်ဂစိုတ်လဝ်ကဵုသေနာတ်ဂှ် ဒှ်ဂအုပ်ဗိုလ်ဇၞော် က္ဍိုပ်သ္ကိုပ်ပ္ဍဲဒပ်စဵုဒၞါၜိုဟ်လလမ်ဂကူမန်မွဲတၠတုဲ ဒှ်ညးထံၚ်ပရိုၚ် သွက်ကံၚ်ဇြဳပၞာန်၊ ဒှ်ညးတြးဂဥုဲၜူမာဲ ကေုာံ သီုကဵုဒှ်ညးက္ဍိုက်က္ဍိုပ်ပံက်မံၚ်ဝိုၚ်ဝေၚ်ဏောၚ်ဂှ် သ္ဂးအိုတ်ရ။
ဒေသကအ်ဗိန် နာဲသြဆာန် မဒးဒုၚ်ပန်ဂစိုတ်လဝ်ဂှ် ဒှ်ဒေသ ဗော်ဍုၚ်မန်တၟိဗ္တိုက်သရိုဟ်တၠအဝဵုပၞာန် NMSP AD တံကဵု ဒပ်ပၞာန်ဗၠးၜးကောန်ဂကူမန် MLA တံ ချဳဒရာၚ်မံၚ်ပရေၚ်ပၞာန်ရ။
စပ်ကဵုအကာဲအရာနာဲသြဆာန် ဒးဒုၚ်ပန်ဂစိုတ်လဝ်ဂှ်တုဲ ၜိုန်ရသြၚ်လောန်တိုၚ်မ် ဆက်စၠောံလဝ်ကု ညးမၞုံအခေါၚ်ဟီုဂး ဒပ်စဵုဒၞါၜိုဟ်လလမ်ဂကူမန် နာဲဆာန်လွဳကီုလေဝ် ဒုၚ်တဲသှ်ကဵုလဝ်ဟွံမွဲရ။
ဒပ်စဵုဒၞါၜိုဟ်လလမ်ဂကူမန် ပါ်တိတ်လဝ် နူဗော်ဍုၚ်မန်တၟိဂှ် ပ္ဍဲသၞာံ (၂၀၁၀) ဂိတုအံက်တဝ်ဗာ စၟတ်တ္ၚဲ(၁၀)ဂှ် လုပ်စိုပ်ဖျေံလဝ်လွဟ် ဇရေၚ်ဌာန်ဂအုပ်ပၞာန်ရးအဂၞဲရ။
နူဂှ်တုဲ ကြဴနူဒပ်ပၞာန်သီအဝဵုတုဲ ပ္ဍဲသၞာံ(၂၀၂၂) ဂိတုအံက်တဝ်ဗာ စၟတ်တ္ၚဲ(၁၀)ဂှ် ပံၚ်တောဲကဵုကံၚ်ဇြဳပၞာန်တုဲ ပြံၚ်သၠာဲဒတူလိုၚ်အာ နဒဒှ်ပၞာန်မင်ကွာန်ရောၚ် လလောၚ်တြးလဝ် ဗွဲမလုပ်သၞောဝ်ရ။
ပရိုၚ်-သြၚ်လောန်တိုၚ်မ်
ဗီု− CJ