(လောၚ်းလုံး)၊ မာတ် (၁၃)
ဟိုတ်နူဗ္ဒိုပ်ကုန်တိုၚ်ဆက်စၠောံ ဒဵု(လက်ခတ်) မၞုံဗ္ဒါဲကွာန်(စမ်းလှမ်း)၊ ပွိုၚ်ဍုၚ်(လောၚ်းလုံး)၊ ရးတၞၚ်သဳတံကဵု ဗ္ဒိုပ်ဗၠာဲသၟိၚ်(မောၚ်းမကန်) ဒးဒုၚ်ဗ္တိုက်ဂှ်ရ လ္ပာ်ကံၚ်ဇြဳပၞာန်တံ ဗ္တိုက်ထောံဏာလဝ်မခတိုဟ် နကဵုက္ၜၚ်ကျာရဂှ် ဂွံတီကေတ် နူညးဒေသတံကဵု ဂကောံဒပ်ပၠန်ဂတးတံရ။
ပ္ဍဲဂိတုမာတ် စၟတ်တ္ၚဲ(၁၃) အခိၚ်နူဂယးဂှ် ဟိုတ်နူဒပ်ပံၚ်ကောံဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်ကုန်တိုၚ်ဆက်စၠောံ ဒဵု(လက်ခတ်)တံကဵု ဗ္ဒိုပ်ဗၠာဲသၟိၚ်(မောၚ်းမကန်)တံ မွဲအခိၚ်ဓဝ်ဂှ်ရ ပေါဲဗ္တိုက်ၜါလ္ပာ်တံ သ္ကာတ်မြဟ်ကၠုၚ်လဝ်ရ။
အပ္ဍဲပေါဲဗ္တိုက်ဗ္ဒိုပ်ကုန်တိုၚ်ဆက်စၠောံ ဒဵု(လက်ခတ်)ဂှ် လ္ပာ်ကံၚ်ဇြဳပၞာန်တံဂှ် ပ္ဍဲအခိၚ်(၁၀)နာဍဳနူဂယးဂှ် ပွဗ္တိုက်တရဴကျာ မွဲအလန်၊ လ္ဒေါဝ်တ္ၚဲ ၜိုတ်(၁၂)နာဍဳဂှ် ပွဗ္တိုက်ဂြာတ်မခတိုဟ် နကဵုက္ၜၚ်ကျာမွဲအလန် ကၠောန်သ္ပလဝ်ရ။
ပ္ဍဲပေါဲဗ္တိုက် ဗ္ဒိုပ်ဗၠာဲသၟိၚ်(မောၚ်းမကန်)ဂှ်တှ်ေ နူကဵုက္ၜၚ်ပၞာန် ဗ္ဒေါံလဝ်ပ္ဍဲဗလးၜဳ မၞုံဗ္ဒါဲကွာန်(စမ်းလှမ်း)ဂှ် ပန်ရီုကဵုလဝ်ရောၚ် ညးတာလျိုၚ် ဒပ်ပၠန်ဂတးတံ ဟီုကဵုသြၚ်လောန်တိုၚ်မ်ရ။
အပ္ဍဲပေါဲဗ္တိုက်(လောၚ်းလုံး)ဂှ် ညးဍုၚ်ကွာန်ကောန်အရာပ်လ္ၚဵုတံ ကလိဂွံလဝ်ဝပ်နွံရောၚ် ဂွံတီကေတ်လဝ်ကီုလေဝ် လၟိဟ်ချိုတ်တ်ပၠိုတ်တ်ဂှ် နူဌာန်ပရိုၚ်သြၚ်လောန်တိုၚ်(မ်) ဂၠိုက်ဂၠါဲဒၟံၚ်ဖိုဟ်တုဲ ပေါဲဗ္တိုက်ၜါလ္ပာ်တံဂှ်တှ်ေ ၜိုတ်အခိၚ်(၃)နာဍဳ သဝ်တ္ၚဲဂှ် ရမျာၚ်သေနာတ်သ္ၚိတ်အာလဝ်ရောၚ် ညးဒေသတံ ဟီုရ။
စပ်ကဵုအကာဲအရာ ဗ္ဒိုပ်ဒပ်ကံၚ်ဇြဳပၞာန် နူပွိုၚ်ဍုၚ်(လောၚ်းလုံး)ၜါဗ္ဒိုပ်တံ ဒးဒုၚ်ဗ္တိုက်ဂှ်တုဲ မ္ၚးနူလ္ပာ်ကံၚ်ဇြဳပၞာန်တံဂှ် လ္ပာ်ဂကောံဇြဟတ်ပၠန်ဂတးတံလေဝ် လလောၚ်ပ္တိတ်လဝ်ပရိုၚ် မမိက်ကဵုမွဲမွဲဂှ် ဟွံဂွံဆဵုကေတ်ဏီရ။
တုဲကၠုၚ်ပ္ဍဲဂိတုမာတ် စၟတ်တ္ၚဲ(၈)ဂှ်လေဝ် ဟိုတ်နူ(စရဖ)၊ ရုၚ်အုပ်ဓုပ်ကာနာနာတံကဵု ဗ္ဒိုပ်ဗၠာဲသၟိၚ် မၞုံလ္တူဍုၚ်(လောၚ်းလုံး)တံ ဒးဒုၚ်ဗ္တိုက်တုဲ ကောန်ဂကောံဒပ်ကံၚ်ဇြဳပၞာန် ဟွံအောန်နူ(၁၀)တၠ ဒးချိုတ်အာလဝ်ရ။
ပရိုၚ်-သြၚ်လောန်တိုၚ်မ်
ဗီု − CJ