နေဗျဳဒဝ်၊ မာတ် (၁၄)
ဍုၚ်ဇြွေတ်ဇြလာန် ကၟာတ်လဒဵုကၠုၚ် လ္တူကမၠောန်ကၠေၚ်ဍေန်ကေုာံ သၟုဟ်ဓာတ်သဘာဝ MOGE ကံၚ်ဇြဳပၞာန်ထိၚ်ဒဝ်လဝ်တံဂှ် ဒုၚ်တၠုၚ်ရောၚ် Justice For Myanmar (JFM) လလောၚ်ပ္တိတ်လဝ်ရ။
ကြဴနူသမဂ္ဂယူရောပ် EU ဖျေံစၟတ်ထောံ ပရေၚ်ကၟာတ်လဒဵု လ္တူ MOGE ပ္ဍဲဂိတုဖေဖဝ်ဝါရဳ၊ စၟတ်တ္ၚဲ(၁) သၞာံ ၂၀၂၂ တုဲဂှ် ပရေၚ်ကၟာတ်လဒဵုတပ်ဒဏ်တံဏံ ဗက်ကၠောန်လဝ်ရောၚ် ပ္ဍဲဂိတုမာတ် စၟတ်တ္ၚဲ(၁၁)ဂှ် ထ္မံက်ထ္ၜးလဝ်ရ။
ပရေၚ်ကၟာတ်လဒဵုတပ်ဒဏ် လ္တူ MOGE သာ်ဏံဂှ်ဝွံ ပ္ဍဲအရာကၟာတ်လဒဵုပၞော်တိတ် ကံၚ်ဇြဳပၞာန်တံ မဂွံဒၟံၚ်သြန်ဘဏ္ဍာ နူကဵုကဏ္ဍကၠေၚ်ဍေန် ကေုာံ သၟုဟ်ဓာတ်သဘာဝ သွက်ပရေၚ်ပၞာန် မပကီုပရာပ်ကလိလောန်ဒၟံၚ် လ္တူညးဍုၚ်ကွာန်ဍုၚ်ဗၟာတံဂှ် ပၟိက်ဇၞော်မံၚ်ရောၚ်ဂှ် JFM သ္ဂးရ။
အတိုၚ်စရၚ် ဌာနဝန်ဇၞော် ပရေၚ်ပိုန်ဒြပ်ကေုာံပရေၚ်ကူသာန်သွံရာန်ဂှ်မ္ဂး ပရေၚ်ပလံၚ်ပ္တိုန်သၟုဟ်ဓာတ်သဘာဝကၟိန်ဍုၚ်ဗၟာဂှ် တုဲကၠုၚ် ပ္ဍဲသၞာံဘဏ္ဍာ ၂၀၂၃-၂၀၂၄ နူဂိတုဨဗြဴ စဵုကဵု ဂိတုဂျောန် ပွိုၚ်ပိဂိတုဂှ် ကလိဂွံလဝ်ဒဝ်ဠာအမေရိကာန် ၈၄၁ ဒဿမ ၇ ပြကောဋိကိုဋ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကဏ္ဍကၠေၚ်ဍေန်ကေုာံသၟုဟ်ဓာတ်သဘာဝဂှ် ဒှ်တမ်ရိုဟ်မဂၠါဲကဵုဒၟံၚ် သြန်ဍုၚ်မ္ၚး ကေုာံ အကံက်ခေါန် သွက်ဂကောံပၞာန်တံ ဂၠိုၚ်အိုတ်ရ။
သြန်လုပ်တံဏံဂှ် ဂကောံပၞာန်တံ သုၚ်စောဲဒၟံၚ် ပ္ဍဲအရာရာန်ကၠေၚ်က္ၜၚ်ကျာ၊ ရာန်လွဟ်လက်နက်ပၞာန် သွက်ဂွံဆက်ကလိလောန် ပွဗတိုက်ကဵုတရဴကျာ၊ ပွဂြာတ်မခတိုဟ်ကဵုက္ၜၚ်ကျာ လ္တူညးဍုၚ်ကွာန်ကောန်အရာပ်တံ နကဵုတၚ်ရန်တၟအ်နွံနွံရ။
ဟိုတ်ဂှ်ရ ဍုၚ်ကနေဒါ၊ ယူကေ ကေုာံ ဍုၚ်အဝ်သြေလျတံလေဝ် ဗက်အာဂၠံၚ်တရဴအတိုၚ်ဇြွေတ်ဇြလာန်တုဲ သွက်ဂွံကၟာတ်လဒဵုကေတ်အရေဝ် လ္တူMOGE ဗွဲမပြဟ်မာန်ဂှ် Justice for Myanmar ဖ္တိုက်ဖ္အောဝ်လဝ်ရ။
ပရိုၚ်-သြၚ်လောန်တိုၚ်မ်
ဗီု− MOI