နေဗျဳဒဝ်၊ မာတ် ၁၄
ဟိုတ်နူပရေၚ်သီအဝဵုတုဲ ကဏ္ဍဝါဗ္ၚ မဟုတ်ယုတ်စှ်ေဒၟံၚ်ဇဳဒိုဟ်ဂှ် ထ္မံက်အာ သၞောတ်ဝါဗ္ၚနကဵုကွတ်စက် ဗ္ၜတ်ကၟိန်ဍုၚ်မွဲဂှ်ဏောၚ်ဂှ် က္ဍိုပ်သ္ကိုပ်ပၞာန် ဟီုကြီုလဝ်ရ။
ပ္ဍဲဂိတုမာတ် စၟတ်တ္ၚဲ(၁၂) အခိၚ်အာစိုပ်ဗဵုရံၚ် ကိုန်စဳမာန် ထ္မံက်သၞောတ်ပရေၚ်တဵုလွဳနကဵုကွတ်စက် ဗ္ဒါဲဂၠံၚ်ပန်သွာၚ်(ပၚ်လောၚ်း) ဂကောံကွာန်(သက်နှၚ်းအၚ်း) ပွိုၚ်ဍုၚ်(ဇေယျာသီရိ) နေဗျဳဒဝ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် ဟီုလဝ်ရ။
က္ဍိုပ်သ္ကိုပ်ပၞာန်ဂှ်တှ်ေ ပရေၚ်ထ္မံက်တိဗ္ၚ မရပ်စပ်စကာအာကွတ်စက်တံဂှ်ဝွံ ဒှ်ကမၠောန်တမ်ရိုဟ်ဇၞော်မွဲကီုလေဝ် ပရဲပရာဂၠိုၚ်တုဲ သီုကဵုဒှ်ကမၠောန် ဒှ်ဂုန်ဖဵုစၟအ်မၞိဟ်၊ သီုသွက်ကၟိန်ဍုၚ်မွဲရောၚ် သ္ဂးရ။
ဟိုတ်ဂှ်ရ ပရေၚ်ထ္မံက်တိဗ္ၚ မရပ်စပ်စကာအာကွတ်စက်တံဂှ် သွက်ဂွံသၠုၚ်ပ္တိုန်အာအစောံဇြဟတ်ကမၠောန် ကေုာံ သွက်ဂွံကၠောန်အာ နကဵုဗ္ၜတ်အလုံဍုၚ်မွဲဂှ် က္ဍိုပ်သ္ကိုပ်ပၞာန် ဟီုဂးလဝ်ရ။
သၟာဝါဗ္ၚမွဲတၠဂှ်တှ်ေ သွက်ဂွံသုၚ်စောဲအာသၞောတ်တိဗ္ၚ မရပ်စပ်ကွတ်စက်တံဂှ် မ္ၚးနူကပေါတ်စက်တံက္ဍၚ်ဒၟံၚ်ဂှ် ကၠေၚ်စက်တံဂှ်လေဝ် က္ဍၚ်ဒၟံၚ်လောန်နူသၞောတ်ဗ္ၜတ်တုဲ တၟော်စဟွံကိတ်ဒှ်တုဲ အခိၚ်ၚုဟ်ကပေါတ်စက်သၠုၚ်ဒၟံၚ်ဂၠိုၚ်ကဵုဆဏံ သ္ဂောံအာသၞောတ်ဝါဗ္ၚကွတ်စက်ဏံဂှ် ဒှ်အရေဝ်ဂရိုၚ်မွဲရောၚ် ပါ်ပါဲလဝ်ရ။
“ပ္ဍဲပိုဲ သွက်ဂွံထ္မံက်ဝါဗ္ၚကွတ်စက်ဂှ် မုလေဝ်ဟွံမွဲရ။ တုဲပၠန် စက်တံဂှ် ကပေါတ်စက်ဟွံသုၚ်စောဲဍုၚ်သ္အာၚ်တံ သ္ဂောံသွံတုဲ ကညာၚ်ဒၟံၚ် ဝါဗ္ၚကွတ်စက်ရဂှ် အဲထေၚ်ကေတ်ရ။ တုဲပၠန် စက်ဂှ်စိုပ်ကၠုၚ်ပၠန်တှ်ေ ကၠေၚ်ဂွံသုၚ်စောဲစက်ဂှ်လေဝ် သက်ဟီုဟွံမွဲ၊ ဗီုလဵုမှတၟော်စဟွံကိတ်၊ ဒၞါဲလီုဂှ် ဂွံကလေၚ်ပဠေဝ်ပၠန်လေဝ် ၚုဟ်ကပေါတ်စက်ဂှ် သၠုၚ်မံၚ်သမၠုၚ်အကး။ ပိုဲဂှ် မုမှဟွံစၟဳစရပုဟ်၊ အရေဝ်ညးတအ် မၞိဟ်ဇၞော်တံဟီုဂှ် ပိုဲစၟတ်ကေတ်လဝ် ဆၜိုတ်က္တဵုဟရိုၚ်မွဲရ” သာ်ဝွံ သ္ဂးရ။
သ္အာၚ်နူဂှ်ပၠန် က္ဍိုပ်သ္ကိုပ်ပၞာန် ၜိုန်ရဟီုမံၚ်သၞောတ်ဝါဗ္ၚ မရပ်စပ်အာကွတ်စက်တံဂှ်ကီုလေဝ် ကၠေၚ်စက်သွက်စက်ဂွံဂေတ်ဂြိပ်ဂှ် ပိုတ်ဒၟံၚ်မွဲဏှမွဲဏှတုဲ ဟွံတီအကာဲအရာသၟာဂူယာ သၟဝ်ဏံမွဲသာ် ဟီုဒၟံၚ်ဂှ်တှ်ေ ဟွံစှ်ေနတဲပုဟ်ဂှ် ဆက်ဟီုရ။
သၟာဗ္ၚမွဲတၠဂှ်လေဝ် သွက်ဂွံအာသၞောတ်ဝါဗ္ၚ မရပ်စပ်ကွတ်စက်ဂှ် နကဵုသၟာဗ္ၚတံ ဟိုတ်နူၚုဟ်သြောံဟွံခိုဟ်တုဲ ရာန်စက်ဟွံမာန်တုဲ သွက်ဂွံကၠောန်သၞောတ်ဝါဗ္ၚ ဗွဲမစိုပ်တရဴမာန်ဂှ် နွံပၟိက်ဒၟံၚ် ကဆံၚ်ဗွဲမဂၠိုၚ်ရောၚ် ဟီုရ။
“ပ္ဍဲပိုဲဂှ် သၞောတ်ဝါဗ္ၚကွတ်စက် ဂွံစိုပ်တရဴဂှ် နွံပၟိက်ဒၟံၚ်ကဆံၚ်ဗွဲမဂၠိုၚ်ရ။ နွံပၟိက်ဒၟံၚ်ဗွဲမဂၠိုၚ်ဟီုဂှ် နကဵုၚုဟ်သ္ၚုဏံတှ်ေ သၟာဗ္ၚတံ သ္ဂောံထဲတိ၊ သ္ဂောံရတ်သြောံကဵုစက်ဂှ် ရာန်စက်ဟွံမာန်ကီု၊ တုဲပၠန် ဂွံအာကဵုသၞောတ်ဝါဗ္ၚကွတ်စက်ဂှ် ကဆံၚ်နွံဗွဲမဂၠိုၚ်ရ ဒးဟီုတှ်ေ တိပိုဲဏံဂှ် တိဗ္ၚစှ်ေသၞောတ်တံ၊ တိဗ္ၚကဆံၚ်သၠုၚ်တံ၊ ဂၠံၚ်ပ္တိတ်ကပေါတ်တံ ဗီုတံဏံဂွံနွံဂှ် နွံပၟိက်မံၚ်ရ” သာ်ဝွံသ္ဂးရ။
လ္ဂောံကဵုအကာဲအရာပြဟ်ဟ်ဏံဂှ်မ္ဂး သွက်ဂွံအာနကဵုသၞောတ်ဝါဗ္ၚကွတ်စက်ဂှ် ၚုဟ်စရိတ်အိုတ်တံသၠုၚ်တိုန်မံၚ် ဂၠိုၚ်ကဵုဆကီု၊ ဟိုတ်နူအကာဲအရာပရေၚ်ဍုၚ်ကွာန်တုဲ သ္ဂောံတဵုလွဳဗီုကၠာတေံဟွံဂွံကီု ဟိုတ်နူကောန်ကမၠောန်သုၚ်စောဲစက်ယန်စိုန်သကီုတံ အောန်ဒၟံၚ်ဂှ်ရ သၞောတ်ဝါဗ္ၚ မရပ်စပ်ကွတ်စက်ဏံ ဟွံပြေပြံၚ်ဂှ် ဟီုရ။
ၜိုန်ရကံၚ်ဇြဳပၞာန်တံ ဟီုမံၚ်အာကဵုသၞောတ်ဝါဗ္ၚကွတ်စက်ကီုလေဝ် သၟာဗ္ၚဂမၠိုၚ် ကြဴနူဒပ်ပၞာန်သီအဝဵုတုဲ ၚုဟ်ကပေါတ်ဗၞိက်ပၠောပ်တံ သၠုၚ်တိုန်မံၚ်ဂၠိုၚ်ကဵုဆကီု၊ စရိတ်အိုတ်နာနာသၠုၚ်တိုန်ဒၟံၚ်ကီု သီုကဵုဒးဒုၚ်ဒၟံၚ်ဘဲဒဏ် ကောန်ကမၠောန်အောန်တံရ။
ကၟိန်ဍုၚ်ဗၟာဏံ ဨကတဵုလွဳသြောံ မၞုံဒၟံၚ် ပွဳူ ၁၅ ပြကောဋိကိုဋ်ဨကတုဲ လၟေၚ်သၞာံ လျိုၚ်တာန်သ္ၚု တိတ်ဒၟံၚ် ဗ္ဒါဲ(၁၄)ပြကောဋိကိုဋ်ဂှ် ဂွံတီကေတ် အတိုၚ်တၚ်နၚ် ဌာနက္ဍိုပ်က္ဍိုပ်ပရေၚ်တဵုလွဳ ကံၚ်ဇြဳပၞာန်တံရ။
ပရိုၚ်-သြၚ်လောန်တိုၚ်မ်
ဗီု−MOI