ကျာ်ထဝ်၊ မာတ် ၁၅
တွဵုရးဍုၚ်မန် ပ္ဍဲပွိုၚ်ဍုၚ်ကျာ်ထဝ် ကွာန်ပိကွာန်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုဒရုၚ်တုဲ ကောန်သ္ဂံၚ် PDF ၜါတၠကဵု ညးဍုၚ်ကွာန်ပန်တၠ ဇီုကပိုက်ကလိဂွံလဝ်ဝပ်ရောၚ် ဒပ်ပၠန်ဂတးဖျေံသ္ဇိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၁၃ တုဲကၠုၚ်တေံ ဒပ်ကံၚ်ဇြဳပၞာန် ဗ္တိုက်ကၠုၚ်လဝ်ကဵုဒရုၚ် ကုသၞေဟ်ကၚ်စၟဳတ် ဒပ်စဵုဒၞါညးဍုၚ်ကွာန် PDF မၞုံဗ္ဒါဲကွာန်(မုက္ခမော့) ပွိုၚ်ဍုၚ်ကျာ်ထဝ်ဂှ်တုဲ ဒတုံဗ္တိုဟ်ထ္ကးအာလဝ် လ္တူဂၠံၚ်သ္ၚောဲနူကဵုသၞေဟ်ကၚ်ဏံ ၜိုတ် ၄၀၀ ပေ ဂှ်တုဲ ညးဒေသပိတၠ ပါလုပ်သီုညးဗြဴမွဲတၠ ဇီုကပိုက်ကလိဂွံအာဝပ်ရ။
ပ္ဍဲဂိတုမာတ် ၁၂ ဂှ်လေဝ် သၞေဟ်ကၚ်စၟဳတ် PDF နွံဗ္ဒါဲကွာန်ဝါဒက်ကွေန် ထပ်ဒးဒုၚ်ဗ္တိုက်လဝ်ကဵုဒရုၚ်တုဲ ကောန်သ္ဂံၚ်ဒပ်စဵုဒၞါညးဍုၚ်ကွာန်အေန်တဂဝ် ၜါတၠ ကလိဂွံအာဝပ် ဟွံဒးဂွိၚ်ရ။
လအာတုပ်သာ်ဂှ်ကီု အပ္ဍဲဏံဂှ် ဒၞါဲကမၠောန်ထဝ် ဗ္ဒါဲကွာန်ကညေန်အိုၚ်ဂှ် ဒးဒုၚ်ဗ္တိုက်လဝ်ကဵုဒရုၚ်တုဲ သၟာဒဳကွဳစက်မွဲတၠ ကလိဂွံဝပ်တုဲ ဒးအာလဝ်စေဝ်ကၠေၚ် ၂၀၀ မပြၚ်၊ ကွဳစက်တုက်တိၜါမ၊ ကွဳစက်ဖ္ဍိုက်တိ ပန်မရ။
ပ္ဍဲပွိုၚ်ဍုၚ်ကျာ်ထဝ်ဂှ် ဗွဲကြဴဏံ မ္ၚးနူပွန်ဒပ်စဵုဒၞါညးဍုၚ်ကွာန်တံဂှ် ဒပ်ကံၚ်ဇြဳပၞာန် ဗ္တိုက်ကၠုၚ်နကဵုဒရုၚ် အပ္ဍဲကဵုကွာန်ညးဍုၚ်ကွာန်ဂမၠိုၚ် မမံၚ်တန်တဴဒၟံၚ်တံဂှ် ဂၠိုၚ်တိုန်ကၠုၚ်ရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၃ တေံဂှ်လေဝ် ပ္ဍဲပွိုၚ်ဍုၚ်ကျာ်ထဝ် ကွာန်ပုၚ်နေဝ်ကုန်ဂှ်လေဝ် ဒပ်ပံၚ်ကောံပၠန်ဂတးတံ အခိၚ်ကၠောန်ဒၟံၚ်ကောံဓရီု ဒးဒုၚ်ထောံကၠုၚ်မခတိုဟ် နူပၞာန်ကျာတုဲ ကောန်သ္ဂံၚ် PDF ပိတၠ ချိုတ်တုဲ ဟွံအောန်နူကဵုမသုန်တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram