မတ်မလီု၊ မာတ် ၁၅
ပ္ဍဲဍုၚ်ဗၟာ အပ္ဍဲသၞာံ ၂၀၂၅ ဏံ ဇွောံမပၟိက်ဇၞော်ဂမၠိုၚ် မပ္တံကဵုသ္ၚု၊ ကၠေၚ်၊ ၜဵု ကေုာံ ၜဲ ဂမၠိုၚ် ၚုဟ်ဍေံထပ်တိုန်ကၠုၚ် စဵုကဵုဗ္ဒါဲ ၃၀ တၟံကၠံမာန်ရောၚ် ဂကောံတၠပညာ ကုလသမဂ္ဂ လလောၚ်ပ္တိတ်ကဵုလဝ်သတိ ပ္ဍဲဂိတုမာတ် ၁၃ တေံရ။
ၚုဟ်ဗၞိက်ဇွောံမသ္ဇိုၚ်တံဏံ တိုန်ကၠုၚ်မာန်ဂှ်ဝွံ ဟိုတ်နူကဵုပရေၚ်ကၟာတ်လဒဵုတပ်ဒဏ် လ္တူကံၚ်ဇြဳပၞာန်ကီု သီုကဵုအကာဲအရာ ရာသဳဥတု မသ္ကာတ်မြဟ်ဂှ်တုဲ အကြေပ်အဂြတ်မက္တဵုဒှ်ဒၟံၚ်တံ သာပရေံစှ်ေမာန်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲကဵုပွိုၚ်ဍုၚ် အလုံဍုၚ်မွဲ ၜိုတ် ၉၆ တၟံကၠံဂှ် ဟိုတ်နူဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ဒှ်ပေါဲဗ္တိုက်ရပ်လွဟ်တံဂှ်တုဲ ကဏ္ဍပရေၚ်ပိုန်ဒြပ် ကေုာံ ကဏ္ဍပရေၚ်တဵုလွဳတံ ဒးဇီုကပိုက်လဝ်ရောၚ် သ္ဂးလဝ်ရ။
ကံၚ်ဇြဳပၞာန်ဝွံ မ္ၚးနူကဵုသၞောတ်ဗ္ၜတ်လဝ် ပရေၚ်ပလံၚ်ဗစိုပ် အရီုဗၚ်ပရေၚ်ဗ္စာရဏာမၞိဟ်တံဂှ် သီုကဵုစွံကၠုၚ်လဝ်ပွန် လ္တူသ္ဇိုၚ်ဝန်စပ်ကဵုပရေၚ်ဗ္စာရဏာမၞိဟ်တံဏံဂှ်တုဲ အကြေပ်အဂြတ်ဇွောံမတံဏံ သာပရေံကၠုၚ်လဝ်ရောၚ် ကုလသမဂ္ဂ ထံက်ထ္ၜးလဝ်ရ။
တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ ၚုဟ်ဗၞိက်ဖျာတိုန်ကၠုၚ်မာန်ဂှ်ဝွံ ဟိုတ်နူကောန်ကလောန်သ္ဇိုၚ်တံ အောန်စှ်ေကၠုၚ်ကီု၊ ဟိုတ်နူပၟတ်ဓာတ်လလဳ ကၠုၚ်ဟွံမှာန်ကီု၊ မ္ၚးနူဏံဂှ် ပ္ဍဲကဵုလ္ပာ်တဵုလွဳတံဂှ်လေဝ် သၟာဗ္ၚဂမၠိုၚ် ဟွံမွဲရတုဲ နဒဒှ်ဖဵုအဆက်လက္ကရဴဂှ် ဒှ်ကၠုၚ်မာန်ရောၚ် သ္ၚဳဂၠိပ်လဝ်ရ။
“ ဒၞါဲဗွဲမဂၠိုၚ်ဂှ်တှ်ေ တိတဵုလွဳတံ၊ ကောန်ကလောန်တံ အောန်စှ်ေကၠုၚ်ကီု၊ ကောန်ကလောန်သ္ဇိုၚ်တံ အောန်ကြဳကၠုၚ် ပြဒ္ဒညာတံဏံကီု သီုကဵုပြဒ္ဒညာဟွံဂွံပၟတ်ဓာတ်လလဳ မှာန်န်တံကီု၊ ပ္ဍဲတိတဵုလွဳတံဂှ်လေဝ် သၟာဗ္ၚတဵုလွဳတံ ဟွံမွဲရဂှ်ကီု၊ ကွာန်ဂမၠိုၚ် လီုကၠုၚ်အိုတ်ဂှ်ကီု ပြဒ္ဒညာတံဏံဂှ် ဒှ်တမ်ရိုဟ်ဍေံရဏောၚ်။ ဗွဲမဂၠိုၚ် လီုလာ်ဆောံလေၚ်အာတုဲယျဟီုတှ်ေ အရာတံဏံ ဒှ်ကၠုၚ်မာန်ဒၟံၚ်ဏောၚ်။ ဟီုကေတ် ဖဵုအဆက်လက္ကရဴဍေံ ဂွံရ” သာ်ဝွံ သ္ဂးရ။
သ္အာၚ်နူဂှ်ပၠန် ယဝ်ၚုဟ်ဗၞိက်စၞသုၚ်သ္ဇိုၚ်တံ ထပ်တိုန်ကၠုၚ်မ္ဂး ဝါတ်ကီုသာ်ကီုဂှ် ပရေၚ်ဇီုကပိုက်တံ နွံကၠုၚ်မာန်ဏောၚ်ကီုလေဝ် ညးဍုၚ်ကွာန်သ္ဇိုၚ်တံဂှ်တှ်ေ သာတုဲဒးဒုၚ်စသိုၚ်ဇၞော်ကဵုဇြဟတ်ဏောၚ်ဂှ် ညးဆက်ဟီုရ။
ညးဗြဴ မဒှ်သမ္ဘာမွဲတၠဂှ်လေဝ် အပ္ဍဲကာလသီအဝဵုဏံ ၚုဟ်ဗၞိက်တံဏံ သၠုၚ်တိုန်ကၠုၚ်ဒၟံၚ် အဆက်က်တုဲ ယဝ်ထပ်သၠုၚ်တိုန်ကၠုၚ်မ္ဂး ဂွံစသုၚ်ရဂှ် ဒးပၠံၚ်ၜးကၠုၚ်တံ ဒှ်တမ် ဒှ်ကၠုၚ်မာန်ရောၚ် ဟီုလဴလဝ် လညာတ်ညးရ။
“ၚုဟ်ဗၞိက်တံဏံ ၜါဆဟွံသေၚ်ပုဟ်။ သၠုၚ်တိုန်ဒၟံၚ် စဵုကဵုပိဆရ။ သြန်လုပ်ကဵုသြန်တိတ် ဟွံသၟဟ်ညးသ္ကအ်တုဲ မၞိဟ်တံဂှ်တှ်ေ ဗီုဒှ်ဂှ် ကၠောန်ကၠုၚ်အိုတ်ဏောၚ် ထေၚ်ကေတ်ရ။ မူဟိုတ်ရောတှ်ေ ညးဍုၚ်ကွာန်တံဂှ် ဒးဒုၚ်ကၠုၚ်လဝ်ဒဒိုက်ဇၞော်ဇၞော်တုဲယျလေဝ်။ သွက်ပရေၚ်စသုၚ်မံၚ်စံၚ် သွက်ဂြောဝ်ဂတာဇကုဂှ်တှ်ေ ဂွံစသုၚ်ဂှ် ပရေၚ်ပၠံၚ်ၜးတံ ဟွံဒှ်ကၠုၚ်ပုဟ်ဂှ်လေဝ် ဟီုဟွံဂွံပုဟ်” သာ်ဝွံ သ္ဂးရ။
ကုလသမဂ္ဂဂှ်တှ်ေ ကံၚ်ဇြဳပၞာန်ဝွံ ဒးဗလးကၠုၚ်တဲ တိဍာ်တံဂှ်ဗက် နဒဒှ်ကလေၚ်ပၠန်တဲ ကုဂကောံရပ်လွဟ်တံဂှ် ကၟာတ်လဒဵုလဝ်ပရေၚ်ကဵုအရီုဗၚ်တံဂှ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။
ဟိုတ်နူကၟာတ်လဒဵုကၠုၚ်လဝ်သာ်ဏံတုဲ ညးဗြဴ ကေုာံ ကောန်ၚာ်သၟတ် နူဗ္ဒိုပ်ညးဒဒိုက်ဒးဆုဲပြံၚ်မံၚ်တန်တဴတံဝွံ ဒးဂဗကၠုၚ်ဒၟံၚ်ကဵု ပရေၚ်ဇွောံမဟွံရုမ်ဂပ်တံ ပရေံအိုတ်တုဲ အကြာယဲဘဲဒစးဒုၚ်စဵုဒၞါဂွံတံဂှ် ကောန်ၚာ်သၟတ် လၟိဟ်ဒးချိုတ်အာတံ ဂၠိုၚ်တိုန်ကၠုၚ်ရောၚ် သ္ဂးရ။
အတိုၚ်တၚ်လလောၚ်တြး ကုလသမဂ္ဂဂှ်မ္ဂး လၟိဟ်မၞိဟ်ဍုၚ်ဗၟာ ပိဂအုံမွဲဂအုံဂှ်ဝွံ အခိၚ်လၟုဟ် ဒးဆေၚ်ဒၟံၚ်မုက်ကဵု ပရေၚ်ဇွောံမစၞစ ဟွံရုမ်ဂပ်တံဂှ်တုဲ ဟိုတ်နူပဋိပက္ခ ဆက်က္တဵုဒှ်ဒၟံၚ်တံဂှ်တုဲလေဝ် ညးဍုၚ်ကွာန် ၁၉ ဒဿမ ၉ ပြကောဋိကိုဋ်ဝွံ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံ ကာတၟေၚ်ဏောၚ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ