မတ်မလီု၊ မာတ် ၁၅
သွက်ဂွံဝေၚ်အာပၞာန်ဇၞော်မွဲ မပတုဲဗဒှ်အာ ပရေၚ်ပၞာန်သီအဝဵုဏံ နဗ္ၜတ်အလုံဍုၚ်မွဲဂှ် ဥူယဳမန် ဝန်ဇၞော်ကၟိန်ဍုၚ် ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဟီုရ။
ညးဟီုဏာလဝ် ပ္ဍဲကဵုလိက်သဝဏ် မစုတ်လဝ်စၟတ်တ္ၚဲ ဂိတုမာတ် ၈ မဗပလံၚ်ဗစိုပ်လဝ် ပေါဲစှ်ေဘာ တန်ဗ္တောန်သ္ကိုပ်ဒပ် လၟေၚ် (၁/၂၀၂၄) သွက်သ္ဂောံက္ဍိုက်ပ်သ္ကိုပ်သ္ကအာ ဒပ်စဵုဒၞါညးဍုၚ်ကွာန် PDF ဂှ်ရ။
ညးဟီုလဝ်ဂှ်တှ်ေ PDF ၊ ပကဖ ကေုာံ ဒပ်ပၠန်ဂတးမဟာမိတ်တံသီုဖအိုတ် ပံၚ်တောဲပါလုပ်တုဲ မုက်ပၞာန်ညးကဵုညး သွက်ဂွံဝေၚ်အာပၞာန်ဇၞော်မွဲ နကဵုဇြဟတ်ကဵုလ္ၚီဠက် နဗ္ၜတ်အလုံဍုၚ်မွဲဂှ် နွံပၟိက်ရ။
ဗိုလ်ဇၞော် ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ အပ္ဍဲသၞာံဏံ ယဝ်ထ္မံက်ရုပ်ရဴမာန်မ္ဂး ပၠန်ဂတးက္ညၚ် ဂွံအံၚ်ဇၞးဂှ် ဒှ်ကၠုၚ်အပြံၚ်အလှာဲမွဲမာန်တုဲ ဂွံဖအိုတ်ကၠေံသၞောတ်တၠအဝဵုပၞာန်ဂှ် ဒးကေတ်မံၚ်အခိၚ်ဏီဏောၚ် သ္ၚဳဂၠိပ်လဝ်ရ။
“အရေဝ်ဂွံဒှ်ဇြဟတ်ဂှ်လေဝ် ဒးဟီုဂှ်နွံ ရံၚ်အာလ္ပာ်စိုတ်ဓာတ်မ္ဂးလေဝ်။ ဆ္ဂး ယဝ်ထ္မံက်ရုပ်ရဴအစဳဇန်ဏံမာန်မ္ဂး အပ္ဍဲသၞာံ ၂၀၂၅ ဏံ နဒဒှ်အပြံၚ်အလှာဲပၠန်ဂတးက္ညၚ်မွဲဂှ် ပစူအာစၟတ်သမ္တီအံၚ်ဇၞးမွဲမာန်ဏောၚ်။ ဂွံဗ္တိုက်ပတုဲဒှ် အပ္ဍဲသၞာံ ၂၀၂၅ ဟီုဂှ် ပိုယ်တံ ဒးကေတ်ဒၟံၚ်အခိၚ် တၟာဂလိုၚ်ဏီဏောၚ်။ ပါဲနူဏံတုဲလေဝ် ဒးဒက်ပ္တန်ဒၟံၚ်ဓဝ်ညဳသာ ပါ်ထ္ကးဟွံဂွံတဂှ်ဏီဏောၚ်” သာ်ဝွံ သ္ဂးရ။
မွဲလ္ပာ်ဂှ်ပၠန် ပေါဲရုဲမာဲဂှ်တှ်ေ သွက်ဂွံကၠောန်အာ သၞာံဏံ ပ္ဍဲဂိတုဒဳဇြေမ်ဗာ ဟွံသေၚ်မ္ဂး သၞာံဂတတေံ ပ္ဍဲဂိတုဂျာန္နဝါရဳဂှ် စဳဇန်လဝ်ရောၚ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုပ္တိတ်ကၠုၚ်လဝ် အပ္ဍဲလၟေၚ်တရဴဗဴလာရုသ်ရ။
ပရေၚ်ပၞာန်သီအဝဵုဂှ်လေဝ် စိုပ်ကၠုၚ်ပွိုၚ်ပန်သၞာံပြၚ်ကၠုၚ်ယျတုဲ သၞာံဏံဝွံ အကြာကံၚ်ဇြဳပၞာန်ကဵုဂကောံပၠန်ဂတးဂှ်တှ်ေ ပရေၚ်ပၞာန်ကဵုဒှ် ပရေၚ်ဍုၚ်ကွာန်ကဵုဒှ် မွဲမွဲလ္ပာ် ဂွံဂွံကၠုၚ်စေဝ်လ္တူဂှ် ပ္တိတ်ကၠုၚ်ဇြဟတ်မာန်ရောၚ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
ဟိုတ်ဂှ်ရ အပ္ဍဲသၞာံ ၂၀၂၅ ဏံ အလုံဇြဟတ်ပၠန်ဂတးမွဲ ဂွံထပိုတ်အာရိုဟ်ကၞက် သၞောတ်တၠအဝဵုပၞာန် ဗွဲမညဳသာအိုတ်ဂှ် ညးမွဲကုမွဲ ဆက်စၠောံညးသ္ကအ်တုဲ နွံပၟိက်ဒးဗ္တိုက်အာ မွဲအခိၚ်ဓဝ်ဏောၚ်ဂှ် ညးခါတ်အကာဲဂမၠိုၚ် ထံက်ထ္ၜးလဝ်ရ။
ပ္ဍဲလိက်သဝဏ်ဂှ်တှ်ေ ပ္ဍဲကာလပၠန်ဂတး အခိၚ်ပြဟ်ဟ်တေံဂှ် လ္ပာ်ဏံ ဒက်ပ္တန်ဒပ်မ္ဂး မွဲလ္ပာ်တေံ ညံၚ်ဂွံချဳဒရာၚ်ပရေၚ်ပၞာန် နဗ္ၜတ်အလုံဍုၚ်မွဲဂှ် ဒးဂိုတ်ဂ္စါန်ကၠုၚ်လဝ် ကဆံၚ်ပထမတုဲ ကဆံၚ်ဒုတိယဂှ်တှ်ေ ဝေၚ်အာပၞာန်ထ္ပက်စှ်ေကဵုမဟာဗျူဟာတံဂှ်တုဲ ဝေၚ်ကၠုၚ်လဝ်ပေါဲဗ္တိုက်သီဍုၚ်သီဗ္ဒိုပ်တံမာန်လဝ်ရောၚ် သ္ဂးရ။
ဟိုတ်ဂှ်ရ ကဆံၚ်တတိယဏံ နဗ္ၜတ်အလုံဍုၚ်မွဲ ဂွံဝေၚ်အာပၞာန်ဇၞော်မွဲ မဖအိုတ်ကၠေံပရေၚ်ပၞာန်သီအဝဵုဏံဂှ် ဝန်ဇၞော်ကာစဵုဒၞါ ဥူယဳမန် ဟီုကၠုၚ်လဝ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ဂွံပလေဝ်သွက်ပၞာန်ဏံဂှ် နွံမံၚ်ပၟိက်တၟာဂလိုၚ်ဏီတုဲ နကဵု NUG ဂွံဂွံဓဝ်ပတှ်ေ ဂကောံရပ်လွဟ်ကောန်ဍုၚ်အရၚ်တံဂှ် ဒက်ပ္တန်ဟွံမာန်ဏီပုဟ်ဂှ် ဟီုရ။
“လ္ပာ်ပိုယ်ဂှ်တှ်ေ ဂွံပလေဝ်ပလေတ်ဂှ် နွံပၟိက်ဒၟံၚ်တၟာဂလိုၚ်ဏီဏောၚ်။ ဇြဟတ်မၞိဟ် နွံၜိုတ်ဒးရးကီုလေဝ် ဇြဟတ်လွဟ်ဂှ် ဗပေၚ်ဟွံမာန်ပုဟ်။ မွဲပၠန်ဂှ် ပၟိက်ဇၞော်ဂှ်တှ်ေ အပ္ဍဲပွိုၚ်ပိသၞာံ ပန်သၞာံဏံ NUG ဒက်ပ္တန်ကၠုၚ်ဓဝ်ပတှ်ေ ဂကောံရပ်လွဟ်ကောန်ဍုၚ်အရၚ်တံ ဟွံမာန်ဏီပုဟ်။ ဂကောံပရေၚ်ဍုၚ်ကွာန် NUG NUCC တံဏံဂှ် ၜိုတ်မူဖေဝ်ဒရေဝ်(မူအပြောံ) အခိၚ်ကာလပၠန်ဂတးဏံ မူကောန်ဍုၚ်အရၚ်သီုဖအိုတ် မဒုၚ်တဲမာန်မွဲ ဂွံဍိုက်ပေၚ်ဂှ် ချူခၞံကဵုဟွံမာန်ပုဟ်။ အရာတံဏံ ပၟိက်ဇၞော်ကွေံကွေံဏောၚ်” သာ်ဝွံ သ္ဂးရ။
ပ္ဍဲကာလပၠန်ဂတးဏံ ဂွံဂွံတၚ်တုပ်စိုတ် ကုကောန်ဍုၚ်အရၚ်တံမွဲ ယဝ်သဳကၠဳကၠုၚ်ဟွံမာန်၊ ယဝ်ဒက်ပ္တန်ဓဝ်ပတှ်ေဟွံမာန်မ္ဂး ဂွံဝေၚ်အာပၞာန်ထ္ပက်တုပ်ပ်ဂှ် အခက်အခုဲနွံဂၠိုၚ်ဏောၚ်ဂှ် ဆက်ဟီုရ။
ဟိုတ်ဂှ်ရ နဗၞတ်အလုံဍုၚ်မွဲ ယဝ်ဝေၚ်ပၞာန် ဗွဲမညဳသၟဟ်ဟွံမာန်မ္ဂး ပၠန်ဂတးဏံ ဂၠိၚ်သ္ၚောဲကၠုၚ်ဏောၚ်တုဲ ပၟတ်ပၞာန်အပ္ဍဲဍုၚ်လေဝ် သာဂဵုထၞာန်ကၠုၚ်တုဲ ညးဍုၚ်ကွာန်တံ ဒှ်ဒဒိုက်ဂၠိုၚ်ဏောၚ်ဂှ် နာဲနဂါ ဟီုလဝ်ရ။
NUG ဂှ်တှ်ေ ပ္ဍဲအရာချူခၞံသၞောဝ်သ္ဇိုၚ် စပ်ကဵုပရေၚ်အပြံၚ်အလှာဲလွေဟ်ဖေဝ်ဒရာဂှ် ပံၚ်ကောံချူဒၟံၚ် ကရောံဇြဟတ်ပၠန်ဂတး တၚ်ရန်တၟံတုပ်တံဂှ်ရောၚ် ဟီုပ္တိတ်ကၠုၚ်လဝ် ပ္ဍဲကဵုဂလာန်ဗ္ကန်ဖျန်ဇရေၚ်ညးဍုၚ်ကွာန် မလလောၚ်ပ္တိတ်လဝ် ပ္ဍဲဂိတုမာတ် ၄ တေံဂှ်ရ။
သမ္မတယာယဳ ဒူဝါလယှဳလဂှ်တှ်ေ နကဵု NUG ဒက်ပ္တန်လဝ်ဓဝ်ပတှ်ေ ကုဂကောံရပ်လွဟ်ကောန်ဍုၚ်အရၚ်တံ ဒဵုဗ္ၜတ်မွဲမွဲတုဲယျဂှ် သၞာံဏံမံက်တေံ ဟီုပ္တိတ်ကၠုၚ်လဝ်ရ။
ပ္ဍဲကဵုဂကောံရပ်လွဟ်ကောန်ဍုၚ်အရၚ်မဟာမိတ် NUG တံဂှ် ဗော်သွးကောန်ဂကူကရေၚ် KNU ၊ ဒပ်ပၠတရဴကောန်ဂကူချေၚ် CNF ကေုာံ ဗော်တောတက်ကောန်ဂကူကရေၚ်ဍာဲ KNPP တံ ပါလုပ်ဒၟံၚ် အဓိကတုဲ ကုဂကောံရပ်လွဟ်ကောန်ဍုၚ်အရၚ်တၞဟ်သ္အာၚ်တံဂှ်လေဝ် ပံၚ်တောဲဒၟံၚ်ပရေၚ်ပၞာန်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−NUG