ဗာန်မဝ်၊ မာတ် ၁၅
ပ္ဍဲကဵုဒေသ ဒှ်ဒၟံၚ်ပေါဲဗ္တိုက် အလုံဍုၚ်မွဲတံဂှ် ကောန်ထံၚ် နူကဵုထံၚ်စာတ်ဒေသတံဏံဂှ် ကံၚ်ဇြဳပၞာန် ဗ္ဂပ်စုတ်ကဵုလွဟ်တုဲ စကာဒၟံၚ်ကိစ္စပရေၚ်တဝ်စၞေဟ်တံ ဗွဲအဓမ္မရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန် စပ်ကဵုပရေၚ်ဍုၚ်ဗၟာ PPNM ရ။
ဗွဲတၟေၚ် ပ္ဍဲကဵုထံၚ် နူဒေသပေါဲဗ္တိုက်ဒှ်ဒၟံၚ်တံဂှ် ကောန်ထံၚ်ဒးဒၟံၚ်ထံၚ် နကဵုဒုဟ်ရာဇဝတ်တံဂှ် ဒပ်ပၞာန်သၟဝ်တဲကံၚ်ဇြဳပၞာန်တံ ဗ္ဂပ်ကဵုလွဟ်တုဲ ကဵုမၚ်မံၚ်ကၚ် သွက်ပၞာန်ဒုၚ်အပ္ဍဲထံၚ်ရ။
ပ္ဍဲကဵုဏံ ပ္ဍဲကဵုထံၚ်စာတ် ဗာန်မဝ်ကဵု မိုဝ်ညှေန် နူကဵုဒေသ ဒပ်ပၠန်ဂတးတံ ကဵု KIA တံ မထ္မံက်ဒၟံၚ်ပေါဲဗ္တိုက် အပ္ဍဲတွဵုရးကချေၚ်ဂှ် ဗ္ဂပ်ကဵုလွဟ် ကုကောန်ထံၚ်သၞာံဇမၠိၚ်တံဂှ်တုဲ ကဵုမၚ်ဒၟံၚ်ဂီုကၠီု ပ္ဍဲကၚ်ပၞာန်ဒုၚ်ထံၚ်ရောၚ် သ္ဂးရ။
သ္အာၚ်နူဂှ်ပၠန် ယဝ်ဒပ်ပၠန်ဂတးတံ ကၠုၚ်စိုပ်ဗ္တိုက်မ္ဂး ကောန်ထံၚ်ဗ္ဂပ်ကဵုလဝ်လွဟ်တံဂှ် သွက်ဂွံကဵုတဝ်စၞေဟ် ကရောံဒပ်ကံၚ်ဇြဳပၞာန်တံဂှ် ကဵုလဝ်အမိၚ်ရောၚ် PPNM သ္ဂးရ။
ကိုဝ်တိုက်ထောန်ဥူ ညးမၞုံအခေါၚ်ဟီုဂး ဇာဇၞိက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာဂှ်တှ်ေ ကံၚ်ဇြဳပၞာန်ဝွံ တန်တဴကဵုလၟိဟ်မၞိဟ် ဒးကေတ်တံဂှ်တုဲ အခါပကောံကၠုၚ်ညးယိုက်လျိုၚ်ပၞာန်တံဟွံဂွံဂှ် ပကောံကၠုၚ်လဝ်ကောန်ထံၚ်တံ နကဵုဟိုတ်ကာတၟေၚ်ဂှ် ဂွံဆဵုကေတ်ရောၚ် ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ကဆံၚ်ဗိုလ် ဒးဒုၚ်ရပ်လဝ် အပ္ဍဲထံၚ်လွိုၚ်ကဝ် ဟိုတ်နူဖံက်ပ္ကဝ်စေဝ်ပၞောန်ပၞာန်၊ စေဝ်ပၞောန်ဗၠာဲသၟိၚ်တံ ယဝ်လုပ်ဗ္တိုက်ကၠုၚ် အပ္ဍဲပေါဲဗ္တိုက်မ္ဂး ဖအောန်ဖျေံကဵုနူဒုဟ်ဒဏ်တုဲ ကလေၚ်ကဵုကဆံၚ်ဒၞါဲညးတံတြေံဂှ်တုဲ ကလေၚ်ရပ်စပ်စကာကၠုၚ်ဒၟံၚ် အပ္ဍဲပေါဲဗ္တိုက်တံ နွံဒၟံၚ်ရ။
ပွမကၠောန်ကၠုၚ် ကဵုကောန်ထံၚ်တံလုပ်ပၞာန် ဗွဲအဓမ္မသာ်ဏံဂှ်ကီု၊ ဗၠာဲသၟိၚ် ကေုာံ ကောန်ပၞာန် ဒးဒုၚ်ရပ်ဖျေံလဝ်ထံၚ်တံ သ္ဂောံဂွံအခေါၚ်ဗၠးနူဒုဟ်ဒဏ်တုဲ ကဵုလုပ်ယိုက်ဝန် ဇရေၚ်ကံၚ်ဇြဳပၞာန်ဂှ်ဝွံ ကလိလောန် ကမၠောန်ဟွံလုပ်သၞောဝ်တံ ပြာပြာကတ်တ်တုဲ ဗပေၚ်ဒၟံၚ်ဇြဟတ်ဒှ်သာ်ဂှ်ရ ဒစဵုဒစးအာ ဇၞော်ကဵုဇြဟတ်ရောၚ် လလောၚ်ပ္တိတ်လဝ်ရ။
ပ္ဍဲဍုၚ်ဗၟာ အပ္ဍဲကာလပၞာန်သီအဝဵု ပန်သၞာံပြၚ်ကၠုၚ်ဏံ ညးဒးဒုၚ်ရပ်လဝ် စပ်ကဵုလၟေၚ်ဒဒှ်ပရေၚ်သီအဝဵုတံဂှ် နွံကၠုၚ်ၜါဠက်ဒ္စါံလ္ၚီပြၚ်တုဲ ပ္ဍဲကဵုဏံ ၜါဠက်ပြၚ်ဂှ်ဝွံ ဒဵုကဵုအခိၚ်လၟုဟ် ဒးဒုၚ်ရပ်ထိၚ်လဝ်ဖိုဟ်ရောၚ် ဂွံတီကေတ် အတိုၚ်တၚ်နၚ်ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ်−သြၚ်လောန်တိုၚ်(မ်)
ဗီု−CJ