ကျာ်ထဝ်၊ မာတ် ၁၆
ပ္ဍဲကဵုပွိုၚ်ဍုၚ်ကျာ်ထဝ် တွဵုရးဍုၚ်မန် ဒၞါဲဒပ်ပံၚ်ကောံပၠန်ဂတးတံ ချဳဒရာၚ်ဇြဟတ်ခိုဟ်ဒၟံၚ်ဂှ် လ္ပာ်ကံၚ်ဇြဳပၞာန် ဗ္တိုက်ကၠုၚ်ကဵုဒရုၚ်တံ သာကၠောန်ဂၠိုၚ်ကၠုၚ်ရောၚ် ဒပ်ပၠန်ဂတးဖျေံသ္ဇိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ စနူဂိတုမာတ်မံက်တုဲ အရိုဟ်ဒဒှ်တ္ၚဲ ထံၚ်ပရိုၚ်ကဵုဒရုၚ် အပ္ဍဲကွာန် မၞုံပွိုၚ်ဍုၚ်ကျာ်ထဝ်တံဂှ်တုဲ မ္ၚးနူကဵုဒပ်ပၠန်ဂတးတံဂှ် ဗ္တိုက်ကၠုၚ်ဒၟံၚ် သီုလ္တူကောန်အရာပ်တံ ဂၠိုၚ်ကၠုၚ်ရ။
တုဲကၠုၚ်ပ္ဍဲဂိတုမာတ် ၁၂ ကဵု ၁၃ တေံဂှ်လေဝ် ပ္ဍဲပွိုၚ်ဍုၚ်ကျာ်ထဝ် ကွာန်ကညေန်အိုၚ်၊ ကွာန်ဝါဒက်ကွေန် ကေုာံ ကွာန်မုက္ခမအ်တံ ဒးဒုၚ်ဗ္တိုက်ကဵုဒရုၚ်တုဲ ကောန်သ္ဂံၚ် PDF ၜါတၠကဵု ညးဍုၚ်ကွာန်ပန်တၠ ဇီုကပိုက်ကလိဂွံလဝ်ဝပ်ရ။
အတိုၚ်ဂလာန် ညးတာလျိုၚ်ဒပ်ပၠန်ဂတး ဖျေံသ္ဇိုၚ်ဒေသတံဂှ်မ္ဂး ပရေၚ်ကံၚ်ဇြဳပၞာန် ဗ္တိုက်ကၠုၚ်ကဵုဒရုၚ်တံဂှ် တၠကွတ်ပညာဍုၚ်ကြုက်တံ အာလဝ်က္ဍိုပ် အဓိကရောၚ် ဂွံတီကေတ် အတိုၚ်တမ်ရိုဟ်ပရိုၚ်အပ္ဍဲဒပ်တံ မပလံၚ်ဗစိုပ်နၚ်ဂှ်ရောၚ် သ္ဂးရ။
အတိုၚ်ဂလာန် တမ်ရိုဟ်ပရိုၚ်အပ္ဍဲဒပ်တံဂှ်မ္ဂး ပ္ဍဲဂိတုမာတ်မံက်ဏံဂှ် တၠကွတ်ပညာကောန်ဍုၚ်ကြုက်ပန်တၠ စိုပ်ကၠုၚ်လဝ် တမ်ဒပ်ခမရ စၟတ် ၂၀၇၊ ဒပ်အမၠံက် စၟတ် ၃၁၀ ဖျေံသ္ဇိုၚ်ကျာ်ထဝ်ဂှ်ရ။
တၠကွတ်ပညာကောန်ဍုၚ်ကြုက်တံဝွံ ကဵုမံၚ်တန်ဗ္တောန် နဲဂွံဒဳဒရုၚ်၊ နဲဂွံဗ္ဂပ်စုတ်မခတိုဟ်၊ နဲဂွံဂၠါဲပွန်သၞတံ အပ္ဍဲတမ်ဒပ်ဖျေံသ္ဇိုၚ်ကျာ်ထဝ်ဂှ် နွံဒၟံၚ်ရောၚ် သ္ဂးရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲကဵုတမ်ဒပ်ဖျေံသ္ဇိုၚ်ကျာ်ထဝ်ဂှ် ပလံၚ်ဗစိုပ်ကဵုလဝ်ဒရုၚ် ဟွံအောန်နူ ၁၀ ဖ္ဍိုက်တုဲ ဒှ်ဂကူဒရုၚ်မဖ္ဍိုက်မခတိုဟ် လွဟ်ဇၞော် ၆၀ မမ၊ လွဟ်ဇၞော် ၁၂၀ မမတံမာန်ဂှ်ဏောၚ် ဒပ်ပၠန်ဂတးတံ ဟီုရ။
ပ္ဍဲကဵုဒရုၚ်ဒပ်ကံၚ်ဇြဳပၞာန်တံ ရပ်စပ်ဒၟံၚ်တံဂှ် ပ္တိတ်နူဍုၚ်ကြုက် ဒှ်ဂၠိုၚ်အိုတ်တုဲ ဂကူဒရုၚ်တံဂှ်တှ်ေ Fixed Wings, Kamikaze Drone, CH-2, CH-4 တံသၟးဟွံက ဒရုၚ် CZ 55 UAW တံလေဝ် ပါလုပ်ကၠုၚ်ရ။
လ္ပာ်ဗွိုၚ်ဒပ်ပၞာန် မသ္ပလဝ် CDM တံဂှ်တှ်ေ ကံၚ်ဇြဳပၞာန် ဇြဟတ်မဍိုန်လျစှ်ေကၠုၚ်ဒၟံၚ်ဏံ ပ္ဍဲပရေၚ်ပၞာန်ဗလးတိတံဂှ် သၠုၚ်ပ္တိုန်ကၠုၚ်အသိၚ်ပရေၚ်ပၞာန်နကဵုဒရုၚ်တံ ဂၠိုၚ်ကၠုၚ်မာန်ဂှ်ရ ဒပ်ပၠန်ဂတးတံ ထေက်ကဵုဒးဒစးဒုၚ်ပလေဝ်ပလေတ်လဝ်ဂှ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−SAC