မတ်မလီု၊ မာတ် ၁၆
အပ္ဍဲဂိတုဖေဖဝ်ဝါရဳတုဲကၠုၚ်တေံ ဟိုတ်နူပရေၚ်ဗ္တိုက်ပၞာန်ကျာ နူဒပ်ကံၚ်ဇြဳပၞာန်တံတုဲ ပ္ဍဲကဵုတွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံဂှ် ကောန်အရာပ်ဂၠိုၚ်ကဵုစှော် ကလိဂွံအာလဝ်ဝပ်တုဲ သ္ၚိဒၟံၚ်ဂမၠိုၚ် ဇီုကပိုက်ဒးလဝ်နွံဂှ် ဇာဇၞိက်ပရေၚ်ဗ္စာရဏာပရေၚ်မၞိဟ် သ္ကုတ်သၠုၚ်ကျာဍုၚ်ဗၟာ SBHN လလောၚ်ပ္တိတ်လဝ်လိက်ဒုၚ်စဳရေၚ်ရ။
အတိုၚ်လိက်ဒုၚ်စဳရေၚ်ဂှ်မ္ဂး ပ္ဍဲဒေသတံဏံ ဟိုတ်နူပေါဲဗ္တိုက်ဗလးတိတံ က္တဵုဒှ်လဝ်တုဲ ဇီုကပိုက်ဒးအာလဝ် သ္ၚိဌာန်ဒြတ်ရတ်ညးဍုၚ်ကွာန်တံ နွံတုဲ ဟိုတ်နူပရေၚ်ဗ္တိုက်ပၞာန်ကျာတံတုဲလေဝ် ဇီုကပိုက်ဒးလဝ်တံ နွံကၠုၚ်တၟာဂလိုၚ်ဂှ် သ္ဂးရ။
အပ္ဍဲဂိတုဖေဖဝ်ဝါရဳတုဲကၠုၚ်တေံ ကံၚ်ဇြဳပၞာန် ဗ္တိုက်ထောံလဝ်မခတိုဟ် ပ္ဍဲတွဵုရးဍုၚ်မန် ပွိုၚ်ဍုၚ်ၜဳကလေၚ်ဂှ် ကွာန်ၜါကွာန်၊ ပ္ဍဲကဵုတွဵုရးကရေၚ် ပွိုၚ်ဍုၚ်လှာဒကှ်ဂှ် ဗ္တိုက်ထောံလဝ်မခတိုဟ် ဗ္ဒါဲကွာန်အနာန်ကွေန်ရ။ ဒှ်သာ်ဂှ်ရ သ္ၚိညးဍုၚ်ကွာန် ဟွံအောန်နူ ၂၆ မ ဒးလီုအာလဝ်တုဲ ကောန်အရာပ် ဟွံအောန်နူ ၁၃ တၠ ဇီုကပိုက်ကလိဂွံလဝ်ဝပ်ရ။
မွဲလ္ပာ်ဂှ်ပၠန်လေဝ် ဟိုတ်နူပန်ကဵုလွဟ်ဇၞော်၊ ဗ္တိုက်ထောံမခတိုဟ် နကဵုပၞာန်ကျာ ကေုာံ ဟိုတ်နူထောံမခတိုဟ် နကဵုဒရုၚ်တံဂှ်တုဲ ကောန်အရာပ်ဇီုကပိုက်ဒး နွံတၟာဂလိုၚ်ဂှ် ဂွံတီကေတ် အတိုၚ်လိက်ဒုၚ်စဳရေၚ်ဝွံရ။
နူဒပ်အမၠံက်ဂှ် ပန်ခ္ဍိုၚ်နၚ် အပ္ဍဲကွာန်(ကျခတ္တပင်အင်း) ပွိုၚ်ဍုၚ်ဍာ်ဗု ရးတၞၚ်သဳဂှ်တုဲ ညးဗြဴအာယုက် ၅၂ သၞာံမွဲတၠ ဒးအာကဝေက်မကမ်တုဲ ကလိဂွံအာဝပ်ဗွဲမသ္ကာတ်မြဟ် ဒးချိုတ်အာလဝ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲကဵုမွဲဒမြိပ်ဂၠံၚ်ထ္ပက်ကၠုၚ်ပၞာန်တံဂှ် ပွမကၠတ်ဂၠံက် ပၠံၚ်ၜး ပလီုပလာ် ဒြပ်ရတ်ညးဍုၚ်ကွာန်တံဒှ်တမ် ပြဝဒစဵုဒစး ကုအခေါၚ်အရာမၞိဟ်တံဂှ် ကၠောန်သ္ပဒၟံၚ် စၟအ်အ်ဒၞါဲရောၚ် သ္ဂးရ။
ပ္ဍဲဂိတုဖေဖဝ်ဝါရဳ ၁၀ တေံ ဒပ်ဍာ်ကံၚ်ဇြဳပၞာန် ဖျေံလဝ်ဂြၚ်တၟံ ဗ္ဒါဲဍုၚ်ဍာ်ဗုဂှ် သီကေတ်လဝ် ဂၠုၚ်တမ္ၚာပိမ နွံဗ္ဒါဲကြုၚ်ဇြာဒဳ ပွိုၚ်ဍုၚ်ဍာ်ဗုဂှ်တုဲ သီုကဵုရပ်ဒက်ဏာလဝ် ညးဍုၚ်ကွာန်လ္တူဂၠုၚ် ၂၀ တၠဂှ်လေဝ် လိက်ဒုၚ်စဳရေၚ်ဂှ် ထ္မံက်ထ္ၜးလဝ်ရ။
ပ္ဍဲကဵုအကာဲအရာသာ်ဏံဂှ် ကောန်ကွာန် နူကဵုဒေသပဋိပက္ခဒှ်ဒၟံၚ် နူသ္ကုတ်သၠုၚ်ကျာဏံဂှ်ဝွံ ဟိုတ်နူပေါဲဗ္တိုက်တုဲ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ဗွဲမဂၠိုၚ်ဝွံ နွံပၟိက်ဒၟံၚ်ကဵု ဇွောံမစၞစ၊ ဒၞါဲမံၚ် ကေုာံ ဂဥုဲဇဗတံရ။
ဟိုတ်ဂှ်ရ ဂကောံဗွိုၚ်ဍုၚ်သ္အာၚ်ဂမၠိုၚ် ဗွဲတၟေၚ် ကုလသမဂ္ဂ ကေုာံ ဂကောံအလဵုအသဳဂမၠိုၚ်ဝွံ သွက်ဂွံရေၚ်တၠုၚ်အာ ပရေၚ်ဗ္စာရဏာမၞိဟ် သွက်ညးဒးဆုဲပြံၚ်မံၚ်တန်တဴဒၟံၚ်အပ္ဍဲဍုၚ် IDP တံ ဗွဲမပြဟ်ဂှ် အစဳဇန်ပရေၚ်ဗ္စာရဏာမၞိဟ်မဒးရးမွဲ ဒးနွံဏောၚ်ဂှ် SBHN ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ