မတ်မလီု၊ မာတ် ၁၆
ပ္ဍဲတွဵုရးဍုၚ်မန် အပ္ဍဲအခိၚ်ကာလသှ်လိက်တန်လုပ်တက္ကသိုလ်ဏံ ညံၚ်ပၟတ်ဟွံဂွံပၠိုတ် သွက်ဂွံရေၚ်တၠုၚ်အာဂှ် ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်ပ္တိုန်လဝ်ဂှ် ဟီုကၠုၚ်လဝ်ရ။
အပ္ဍဲဂိတုမာတ် ၁၄ တေံ ညး ဟီုကၠုၚ်လဝ်ကဵု ညးတာလျိုၚ်နူဌာနမဆေၚ်စပ် နွံသၟဝ်တဲညး ပ္ဍဲကဵုကောံဓရီုပ္ညဳပ္ညပ်ကမၠောန် မကၠောန်ဗဒှ်လဝ် ပ္ဍဲရုၚ်အလဵုအသဳ တွဵုရးဍုၚ်မန် လ္တူဍုၚ်မတ်မလီုရ။
သ္အာၚ်နူဂှ်ပၠန် အခိၚ်ကာလသှ်လိက်ဏံ ညံၚ်ကွးဘာဂမၠိုၚ် ဂွံအာကၠုၚ်ဌာနသှ်လိက်တံ ဂွံပြေပြံၚ်ဂှ် ဂလိုၚ်ပ္တိုန်လာၚ်ယာန်တံတုဲ သွက်ဂွံဗက်ဓရိပ်ဂှ်ကီု၊ ပ္ဍဲဒၞါဲကွဳစက်ထုဲဒၟံၚ်တံဂှ် သွက်ဂွံဖျေံလဝ်တာလျိုၚ် ဗၠာဲသၟိၚ်ထိၚ်ယာန်တံ ကေုာံ ညံၚ်ကမၠောန်စပ်ကဵုသ္ဘၚ်သၟာန်သှ်လိက်တံ ဂွံဂီုကၠီု သွက်ဂွံကၠောန်သ္ပအိုတ်ဂှ် ဟီုကၠုၚ်လဝ်ရ။
ညးဒေသတွဵုရးဍုၚ်မန်မွဲတၠဂှ်တှ်ေ ၜိုန်ရသ္ကိုပ်ဝန်ဇၞော်ကံၚ်ဇြဳပၞာန်ဏံ ဟီုကၠုၚ်ဒၟံၚ် သွက်ဂွံကၠောန် ညံၚ်ပၟတ်ဓာတ်လလဳဂွံမှာန်ဂှ်ကီုလေဝ် နတဲဏံ ဟိုတ်နူပၟတ်ဟွံမှာန်တုဲ ကွးဘာဂမၠိုၚ် ဗှ်လိက်ဟွံဂွံ ဒှ်ဒၟံၚ်အကာဲအရာဏံဏောၚ်ဂှ် ဟီုရ။
“နတဲဏံဂှ်တှ်ေ ဗီုညးဟီုဒၟံၚ်ဏံဂှ် မုဟွံဆေၚ်ရ။ ကွးဘာဂမၠိုၚ် ဂွံဗှ်လိက်ဟီုဂှ် ပၟတ်လေဝ်ဟွံမွဲပုဟ်။ ပၟတ်လေဝ် ဟွံရုမ်ပုဟ်။ ဟွံကဵုပၟတ်ပုဟ်လေဝ်။ ကောန်ၚာ်ဒးဗှ်လိက်တံ ဗီုလဵုဂွံဂွံပၟတ်ဂှ်ရော။ အရာညးမဟီုဒၟံၚ်ဏံဂှ်တှ်ေ မုမွဲမှ ဟွံစှ်ေကဵုနတဲပုဟ်။ ညးဂှ်တှ်ေ အရေဝ်သၟးရဏောၚ်။ အတိုၚ်ဟီုလဝ်ဂှ် မုမွဲမှဟွံဒှ်ကၠုၚ်ပုဟ်” သာ်ဝွံ သ္ဂးရ။
အပ္ဍဲဒေသဂှ် ဟိုတ်နူပၟတ်ကၠုၚ်ဟွံမှာန်တုဲ ကွးဘာဂမၠိုၚ် သ္ပပဓာန်ကဵုပၟတ်ပၞာၚ်၊ ပၟတ်ဗှ်လိက်၊ ပၟတ်စုတ်လဝ်ဇြဟတ်ဓာတ်တံဂှ်ရတုဲ ဒးဗှ်လ္ၚတ်ဒၟံၚ်လိက်အိုတ်ရ။
သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်ပ္တိုန်လဝ်ဂှ်တှ်ေ အပ္ဍဲအခိၚ်ကာလသှ်လိက်ဏံ ညံၚ်ပၟတ်ဟွံဂွံပိုတ်အာ သွက်ဂွံကၠောန်သ္ပအိုတ်ဂှ် ဟီုလဝ်ကီုလေဝ် အပ္ဍဲဒေသဂှ်တှ်ေ တြးကဵုဒၟံၚ်ပၟတ်ဓာတ်လလဳ နကဵုအလန်ရ။
သ္ဘၚ်သၟာန်သှ်လိက်တန်လုပ်တက္ကသိုလ်ဂှ် ကၠောန်ဗဒှ်အာ နူဂိတုမာတ် ၁၇ စဵုကဵု ၂၂ ဏောၚ်တုဲ ပ္ဍဲတွဵုရးဍုၚ်မန်ဂှ်တှ်ေ ကွးဘာလုပ်စိုပ်သှ်အာတံဂှ် ၉၃၀၀ ပြၚ် နွံရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−CJ