ရေဝ်၊ မာတ် ၁၈
ဗ္ဒိုပ်မုက်ပၞာန်မွဲ နွံဗ္ဒါဲကွာန်နှေဟ်ခရေၚ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ဒးဒုၚ်ထောံလဝ်မခတိုဟ် နကဵုဒရုၚ်တုဲ ကောန်သ္ဂံၚ်ၜါတၠ ပြဟ်လလုဲအာလဝ်ရောၚ် ညးတာလျိုၚ်ဒပ်ဒမၠုက်ရေဝ် YGF သ္ပဒတန်လဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၁၅ အခိၚ်လဒေါဝ်တ္ၚဲ ၜိုတ် ၂ နာဍဳဂှ် လ္ပာ်ကံၚ်ဇြဳပၞာန်တံ ထံၚ်ကၠုၚ်ပရိုၚ်နကဵုဒရုၚ် ကုဗ္ဒိုပ်မုက်ပၞာန် ဒပ်ဒမၠုက်ရေဝ် YGF ဂှ်တုဲ ထောံလဝ်မခတိုဟ်ဗ္တိုက်လဝ်ရ။
ဟိုတ်နူဒးဒုၚ်ဗ္တိုက်လဝ်ကဵုဒရုၚ်တုဲ နူဒပ် YGF ဂှ် သ္ဂံၚ်ယျေဝ်ဇြာနဳအံၚ်၊ ကောန်သ္ဂံၚ် လေန်န်တံ ပြဟ်လလုဲအာလဝ်တုဲ ကွဳစက်မွဲဖ္ဍိုက် လီုအာလဝ်ရ။
ကြဴနူဗ္ဒိုပ်မုက်ပၞာန် ဒးဒုၚ်ဗ္တိုက်တုဲဂှ် ကောန်ဒပ်ဒမၠုက်ရေဝ်ဂမၠိုၚ် ဆုတ်ကလေၚ်အာလဝ်လွာဲဂှ်တုဲ ကမ္မဌာန်ကောန်သ္ဂံၚ်ၜါတၠဏံဂှ်တှ်ေ ကၠောန်သ္ပလဝ်ပ္ဍဲဂိတုမာတ် ၁၆ တေံရ။
ဒပ်ဒမၠုက်ရေဝ် YGF ဖျေံသ္ဇိုၚ်ဒေသရေဝ်ဂှ်ဝွံ ဒှ်ဒပ်နွံသၟဝ်တဲကရောၚ်ပၞာန်ဒဝ်ဏ ဒပ်ပၞာန်စဵုဒၞါညးဍုၚ်ကွာန် PDF တံမွဲတုဲ စဒက်ပ္တန်လဝ် ပ္ဍဲသၞာံ ၂၀၂၁ ဂိတုမေ ၁၉ တေံရ။
ဒပ်ဒမၠုက်ရေဝ် YGF ဝွံ အခိၚ်လၟုဟ် ပံၚ်တောဲကဵုဂကောံဇြဟတ်ပၠန်ဂတးတံတုဲ လုပ်မံၚ်ပေါဲဗ္တိုက်ပၠန်ဂတးတၠအဝဵုပၞာန် ပ္ဍဲတွဵုရးဍုၚ်မန်ကဵု ရးတၞၚ်သဳတံရ။
ပရိုၚ်−သြၚ်လောန်တိုၚ်(မ်)
ဗီု− YGF