မတ်မလီု၊ မာတ် ၁၈
အလုံဍုၚ်မွဲ အပ္ဍဲဂိတုဖေဖဝ်ဝါရဳတုဲကၠုၚ်တေံ ဂကောံပၞာန်တံ ကလိလောန်ဝးပ္ကဝ်လဝ်အခေါၚ်အရာမၞိဟ် ၆၀၄ ဂဗုတ် နွံလဝ်ရောၚ် ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ NUG ကံက်ကပှ်လဝ်တၚ်နၚ်တုဲ ထ္မံက်ထ္ၜးလဝ်ရ။
အတိုၚ်စၟတ်သမ္တီ ထ္မံက်ပ္တိတ်လဝ် ပ္ဍဲဂိတုမာတ် ၁၅ တေံဂှ်မ္ဂး အခေါၚ်အာကၠုၚ်ဗွဲမဗၠးၜး၊ ပလီုပလာ်စမြိုၚ်ဘာသာ၊ ကဵုဆုဲပြံၚ်ဒၞါဲ ဗွဲအနိၚ်အပိုၚ်၊ ရပ်ဒက်ဟွံဗဗွဲကဵုသၞောဝ် ကေုာံ စကာကမၠောန်ဗွဲအဓမ္မတံဂှ်ဝွံ ကၠောန်ကၠုၚ်လဝ် ဂၠိုၚ်ကဵုစှော်ရ။
သ္အာၚ်နူဂှ်ပၠန် ဒးဒုၚ်ဂစိုတ်ဟွံမွဲကဵုသၞောဝ်သၞောတ်ကီု၊ ဒးဒုၚ်ပလီုပလာ်ပိုန်ဟာန်ဒြတ်ရတ်ဂမၠိုၚ် ကေုာံ ဟိုတ်နူပရေၚ်ဝးပ္ကဝ်တၞဟ်သ္အာၚ်တံတုဲလေဝ် ဂကောံပၞာန်တံ ကလိလောန်ဝးပ္ကဝ်အခေါၚ်အရာမၞိဟ်တံဂှ်တှ်ေ နွံကၠုၚ်လဝ် စဵုကဵု ၁၀၀ ဝါပြၚ်ရ။
ပရေၚ်ဝးပ္ကဝ်လဝ်အရာတၞဟ်ဟ်တံဂှ်တှ်ေ ပေါဲဗ္တိုက်က္တဵုဒှ်ဟွံမွဲမွဲသာ် ဂကောံပၞာန် ပန်ဗ္တိုက်နၚ်လွဟ်ဇၞော် ကုညးဍုၚ်ကွာန်တံ နကဵုပၞာန်ကျာတုဲ ဒှ်အာလဝ် စဵုကဵု ၁၃၇ ဝါဂှ်ရ ပရေၚ်ဝးပ္ကဝ်သာ်ဏံဂှ်တှ်ေ ကလိလောန်လဝ် ဂၠိုၚ်အိုတ်ရ။
ပရေၚ်ပကီုပရာပ်စပ်ကဵုလိၚ် မပါလုပ် အခေါၚ်စဳရေၚ်ဂဗုတ် ဗွဲမဗၠးၜးတံ ဒးဆောံလေၚ်အာကီု၊ အခေါၚ်ရှ်ေသှ်ေပတှ်ေဗွဲမဗၠးၜးကီု၊ ပလံၚ်ဓရိုဟ်ဏာ နဒဒှ်ကောန်ပၞာန်ကောန်ၚာ်၊ ဍဵုဍိုက်ပျဲပျာံ ကေုာံ ဗ္တိုက်ကၠုၚ်သေန်တာစပ်ကဵုလ္ပာ်ဂဥုဲတံဂှ်လေဝ် နွံလဝ်သၟဝ် ၁၀ ဝါရ။
အတိုၚ်စၟတ်သမ္တီ NUG ဂှ်မ္ဂး ရးသက်ကိုၚ်ဝွံ ဒးဒုၚ်ဝးပ္ကဝ်အခေါၚ်အရာမၞိဟ်ဂၠိုၚ်အိုတ်တုဲ နွံကၠုၚ်လဝ် စဵုကဵု ၁၂၄ ဝါရ။ ပ္ဍဲကဵုဏံ ပရေၚ်ဒးဒုၚ်ဗ္တိုက်ကဵုပၞာန်ကျာဂှ် နွံလဝ် ၆၈ ဝါတုဲ ဒှ်ဒေသ ဒးဒုၚ်ဗ္တိုက်လဝ်ဂၠိုၚ်အိုတ်ရ။
အပ္ဍဲဂိတုဖေဖဝ်ဝါရဳဏံ ဟိုတ်နူဒးဒုၚ်ဗ္တိုက်ကဵုပၞာန်ကျာ ကံၚ်ဇြဳပၞာန်တံဂှ်တုဲ သ္ၚိညးဍုၚ်ကွာန် ၂၁၉ မ၊ ဘာဗ္တောန်လိက် ၁၂ မ၊ စမြိုၚ်ဘာသာ ၂၇ မ ကေုာံ စမြိုၚ်ပရေၚ်ထတ်ယုက် ၁၅ မ လီုလာ်ဆောံလေၚ်အာလဝ်ရ။ ဟိုတ်နူပရေၚ်ဗ္တိုက်ဏံတုဲ လၟိဟ်မၞိဟ် ၁၄၂ တၠ ချိုတ်အာလဝ်တုဲ ညးဇီုကပိုက်ကလိဂွံဝပ် နွံလဝ် ၃၆၈ တၠရ။
မွဲလ္ပာ်ဂှ်ပၠန် အပ္ဍဲဒေသကချေၚ်၊ သက်ကိုၚ်၊ မဂွဵု ကေုာံ ရးဒေသမန္တလေဝ်တံဂှ် လၟေၚ်ဒဒှ်ဂကောံပၞာန်တံ ကလိလောန်ပြိုက်ဂစိုတ်လဝ် ကဵုဂအုံဗွဝ်ဂှ်တှ်ေ နွံလဝ် ၁၀ တုဲ ညးဒးချိုတ်အာလဝ် ၇၀ တၠ နွံဂှ် စၟတ်သမ္တီဂှ် ထ္မံက်ထ္ၜးလဝ်ရ။
နကဵုဌာနဝန်ဇၞော်အခေါၚ်အရာမၞိဟ် NUG ဂှ်မ္ဂး တၚ်ပ္တဝ်က္ဍိုပ် အလုံညးဍုၚ်ကွာန်မွဲ ညံၚ်သ္ဂောံဂွံကဆံၚ်တုပ်သၟဟ်၊ ပရေၚ်ၜိုဟ်လလမ် ကေုာံ ပရေၚ်ဗဗွဲဓဝ်တံဂှ် ရပ်စပ်အာခိုၚ်ၚ်ဗိုန်န်တုဲ ဂွံကဵုဒုဟ်ကေတ်အရေဝ် ကုပရေၚ်ကံၚ်ဇြဳပၞာန်တံ မကလိလောန်လဝ်တံမာန်ဂှ် ရေၚ်တၠုၚ်အာဏောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− CJ