မတ်မလီု၊ မာတ် ၁၈
ပ္ဍဲတွဵုရးဍုၚ်မန် ဟိုတ်နူသၞောဝ်ယိုက်လျိုၚ်ပၞာန် မပၠောပ်လဝ်လမျီုဂှ်တုဲ အပ္ဍဲပွိုၚ်မွဲသၞာံပြၚ်ကၠုၚ်ဏံ ညးဒးဒုၚ်ပကောံပကောန်ပၞာန် နွံကၠုၚ် စဵုကဵု ၂၀၀၀ ပြၚ်ဂှ် ဂွံတီကေတ် အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်လဝ်ရ။
ကံၚ်ဇြဳပၞာန် ဒးကျဒၟံၚ်ပၞာန် ဇၟာပ်ပေါဲဗ္တိုက် မက္တဵုဒှ်ဒၟံၚ်အလုံဍုၚ်မွဲ ဟိုတ်နူပၞာန်ပၠန်ဂတးညးဍုၚ်ကွာန်ဂှ်ဝွံ ဂွံကလေၚ်ဗပေၚ်ဇြဟတ်ဒပ်ဂှ် ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ ဂှ် စပၠောပ်လဝ်လမျီု သၞောဝ်ယိုက်လျိုၚ်ပၞာန်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်လဝ်ဂှ်မ္ဂး ပ္ဍဲတွဵုရးဍုၚ်မန်ဂှ် တန်ဗ္တောန်ကွတ်ပၞာန် နူလၟေၚ် ၁ စဵုစိုပ်လၟေၚ် ၁၀ ဂှ် ညးဒးဒုၚ်ပကောံပကောန်ပၞာန် နွံကၠုၚ်လဝ် စဵုကဵု ၁၉၀၀ ပြၚ်ရ။
သွက်တန်ဗ္တောန်ကွတ်ပၞာန် လၟေၚ် ၁၁ ကၠုၚ်စိုပ်ဏံ သၟတ်ဒးဒုၚ်ပကောံပလဝ်ကောန်ပၞာန် ၁၀၀ ပြၚ်ဂှ်တှ်ေ ပ္ဍဲဂိတုမာတ် ၁၆ တေံ ထပ်ပလံၚ်ဗစိုပ်လဝ် ဇရေၚ်ဌာန်ဂအုပ်ပၞာန်ရးအဂၞဲ ဖျေံသ္ဇိုၚ်မတ်မလီုဂှ်တုဲ ညးဒးဒုၚ်ပကောံပလဝ်ကောန်ပၞာန် နွံကၠုၚ်လဝ် စဵုကဵု ၂၀၀၀ ပြၚ်ရ။
ညးမစုက်လုက်ကဵုကံၚ်ဇြဳပၞာန် ဟွံမိက်ထ္မံက်ယၟုမွဲတၠဂှ်တှ်ေ ညးဒးဒုၚ်ပကောံပလဝ်ကောန်ပၞာန် သွက်တန်ဗ္တောန်ကွတ်ပၞာန် လၟေၚ် ၁၁ ဗွဲမဂၠိုၚ်ဂှ်ဝွံ ဒးဒုၚ်ရပ်လဝ် ဗွဲအဓမ္မရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဗ္ၜူတုဲ စဴကၠုၚ်နူကေတဳဗဳတံ ရဲသုၚ်စောဲဂဥုဲၜူမာဲတံ၊ ရဲသုၚ်အရက်တံ ရဲစဴကၠုၚ်နူဝိုၚ်ဝေၚ်တံဂှ်တှ်ေ ကော်ဏာဟဂှ်ရ။ အတေံညိ အဏံညိဂှ် မုဟွံဟီုပုဟ်။ ကော်ပ္တိုန်ဏာကွဳစက်ဟဂှ်ရ။ သီသီုဖုၚ်တုဲ ကဵုတိုန်လဝ်ကာတံဂှ်ရ။ တုဲတှ်ေ ပလံၚ်ဏာသွက်ဂွံလုပ်ပၞာန်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန် ရပ်ဒက်ကော်ဏာလဝ် သၟတ်တိတ်မ္ၚးအခိၚ်ဗ္တံတံနွံတုဲ လ္ၚဵုတံဂှ်တှ်ေ လုပ်စိုပ်ရပ်ဒက်စဵုကဵုအပ္ဍဲသ္ၚိတုဲ ပလံၚ်ဗစိုပ်ဒၟံၚ် တန်ဗ္တောန်ကွတ်ပၞာန်တံလေဝ် နွံဒၟံၚ်ရ။
မွဲလ္ပာ်ဂှ်ပၠန် သ္ကိုပ်အုပ်ဓုပ်ကွာန်အရာပ် သၟဝ်တဲကံၚ်ဇြဳပၞာန်တံဝွံ ဂွံလိၚ်စုတ်မၞိဟ်စၞး သွက်တန်ဗ္တောန်ကွတ်ပၞာန် လၟေၚ် ၁၁ ဂှ်ဂးတုဲ ဗက်ဒၟံၚ်လှုဲ အကြာအရာပ်လ္တူဍုၚ်တံ နွံရ။
ဟိုတ်နူသၞောဝ်ယိုက်လျိုၚ်ပၞာန် ကံၚ်ဇြဳပၞာန်တုဲ သၟတ်အဝဲဍောတ်သွတ်ဂမၠိုၚ် တိတ်အာဍုၚ်သ္အာၚ်ကဵုဂအုံဗွဝ်တံ ဂၠိုၚ်တိုန်ဒၟံၚ်တုဲ ဒးဆေၚ်ဒၟံၚ်မုက်ကဵုပြဒ္ဒညာ ကောန်ကလောန်အောန်တံ ဇၞော်ကဵုဇြဟတ်ရ။
ပ္ဍဲတွဵုရးဍုၚ်မန်ဂှ်တှ်ေ ကဵုဒၟံၚ်တန်ဗ္တောန်ကွတ်ပၞာန် ပ္ဍဲကဵုဘာတန်ဗ္တောန်ပ္ကတ်ပ္ကေၚ်သ္ဇိုၚ်ပၞာန် စၟတ် ၉ ဖျေံသ္ဇိုၚ်ပွိုၚ်ဍုၚ်သဓီု ကဵု ဘာတန်ဗ္တောန်ဒပ်ပၞာန် စၟတ် ၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုတံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−MOI