မတ်မလီု၊ မာတ် ၁၈
ဟိုတ်နူပေါဲရုဲမာဲကံၚ်ဇြဳပၞာန် မကၠောန်ဗဒှ်အာဂှ်တုဲ အကြာညးစၞးဗော်လုပ်ပြိုၚ်အာတံကဵု ဂကောံပၠန်ဂတးတံ ဒှ်ကၠုၚ်ပဋိပက္ခမာန်ရောၚ် ဒပ်ပၠန်ဂတးဖျေံသ္ဇိုၚ်ဒေသမန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဂွံကၠောန်ဗဒှ်ပေါဲရုဲမာဲဂှ်တှ်ေ က္ဍိုပ်သ္ကိုပ်ပၞာန် စဳဇန်ဒၟံၚ် ပရေၚ်ပလေဝ်ပလေတ် မနွံပၟိက်တံဂှ်တုဲ ဟိုတ်နူကၠောန်အာတွဵုဏောၚ်ဂှ်ရ ညးဍုၚ်ကွာန်ကဵု အလဵုအသဳတံ သွက်ဂွံပံၚ်တောဲရေၚ်တၠုၚ်အာဂှ် ပ္ဍဲဂိတုမာတ် ၁၆ တေံ ဟီုကၠုၚ်လဝ် ပ္ဍဲအသေအဟာန်ပ္အပ်ပြာပ်တဆိပ်ကြာဂုန်တၟေၚ် မကၠောန်ဗဒှ်လဝ်ဂှ်ရ။
မွဲလ္ပာ်ဂှ်ပၠန် ပေါဲဗ္တိုက်ရပ်လွဟ်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ်လေဝ် က္တဵုဒှ်ဒၟံၚ် အလုံဍုၚ်မွဲတုဲ ရံၚ်ကဵုတၚ်နၚ်တံဂှ်မ္ဂး တိဍာ်ကံၚ်ဇြဳပၞာန် ထိၚ်ဒက်ဂွံလဝ် ပေၚ်ၚ်တံဂှ်လေဝ် ပိဂအုံမွဲဂအုံရဂှ် ကြပ်ဟွံပေၚ် ဒှ်ဒၟံၚ်ရ။
ဟိုတ်ဂှ်ရ ဒၟါနူဂီုကၠီုဒေသ သ္ဂောံကၠောန်ဗဒှ်ပေါဲရုဲမာဲမာန်ဂှ် ပေါဲဗ္တိုက်ၜါလ္ပာ် သာသ္ကာတ်မြဟ်ကၠုၚ်မာန်တုဲ ညးဒုၚ်ရုဲစှ်အာဂမၠိုၚ်လေဝ် ဒးဒုၚ်ကဵုဒုဟ်ဒဏ်မာန်ရောၚ် နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဟီုရ။
“ ဂွံကၠောန်ဗဒှ်ပေါဲရုဲမာဲမာန်ဂှ် ဂီုကၠီုဒေသ ဒးနွံဏောၚ်။ ဒှ်သာ်ဂှ်ရ ကံၚ်ဇြဳပၞာန် ကၠောန်ကၠုၚ်ပရေၚ်သ္အးဇ္ၚးတိဍာ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်မာန်ဂှ်တုဲ ပေါဲဗ္တိုက်ဆေၚ်မုက်ဒိဓဗတ် ကုဂကောံပၠန်ဂတးတံ ဂွံသ္ကာတ်မြဟ်ကၠုၚ်ဂှ် နွံဏောၚ်။ သ္အာၚ်နူဂှ်ပၠန် လ္ပာ်ပၠန်ဂတးတံဂှ်လေဝ် ညံၚ်ပေါဲရုဲမာဲဟွံဂွံဒှ် ပလီုအာဏောၚ်ဂှ်ရ ပေါဲဗ္တိုက်ဂှ်တှ်ေ သ္ကာတ်မြဟ်ကၠုၚ်မာန်ဏောၚ်။ သ္အာၚ်နူဂှ်ပၠန် ညးစၞးပါလုပ်အာပ္ဍဲပေါဲရုဲမာဲတံကဵု ဂကောံမရီုဗၚ်ကဵု ပ္ဍဲတိဍာ်ဆန္ဒမာဲညးတံ ဂွံကဵုမာဲဂွံတံဂှ်လေဝ် ပံၚ်တောဲကဵုကံၚ်ဇြဳပၞာန်ဂးတုဲ ဒးဒုၚ်ကဵုဒုဟ်ဒဏ် နူဂကောံပၠန်ဂတးတံ နွံကၠုၚ်မာန်ဏောၚ်ဂှ် အဲညာတ်ကေတ်ရ” သာ်ဝွံ သ္ဂးရ။
ပေါဲရုဲမာဲဂှ် စဳဇန်လဝ် သွက်ဂွံကၠောန်အာ ပ္ဍဲသၞာံဏံ ပ္ဍဲဂိတုဒဳဇြေမ်ဗာတေံ ဟွံသေၚ်မ္ဂး ပ္ဍဲဂိတုဂျာန္နဝါရဳ သၞာံဂတတေံဂှ်ရောၚ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုပ္တိတ်ကၠုၚ်လဝ် ပ္ဍဲလၟေၚ်တရဴညး အာစိုပ်လဝ် ဍုၚ်ဗဴလာရုသ်ဂှ်ရ။
သ္အာၚ်နူဂှ်ပၠန် သွက်ဂွံလုပ်ပေါဲရုဲမာဲဂှ် ဗော်ပရေၚ်ဍုၚ်ကွာန် ၅၃ ဗော် ကဵုလဝ်စရၚ်တုဲ စပ်ကဵုကၠောန်ဗဒှ်ပေါဲရုဲမာဲဂှ်တုဲ ဍုၚ်ရုယှာကဵု ဍုၚ်ဗဴလာရုသ်တံ ဂွံကၠုၚ်စိုပ်သ္ၚဳဗဵုမာန်ဂှ် က္ဍိုပ်သ္ကိုပ်ပၞာန် ကော်ဘိက်လဝ် ဂကောံလ္ၚတ်ဂမၠိုၚ်ရ။
ကံၚ်ဇြဳပၞာန် သီကေတ်လဝ်အဝဵုကၟိန်ဍုၚ် နကဵုဇြဟတ်လွဟ်ဂှ်တှ်ေ ကလေၚ်ကၠောန်ဗဒှ်ကဵုပေါဲရုဲမာဲမွဲတုဲ လှဲပြံၚ်ကဵုအာ လျိုၚ်ကၟိန်ဍုၚ် ကုဗော်ဂွံအဝဵုတံဂှ်ဏောၚ် ဟီုကြီုဒၟံၚ်ရ။
ကိုဝ်အေမေန်ထောန် ညးဒုၚ်တာလျိုၚ် ဒပ်စဵုဒၞါညးဍုၚ်ကွာန် ခရိုၚ်သဓီု PDF ဂှ်တှ်ေ သီအဝဵုတုဲမှ ပေါဲရုဲမာဲ က္တဵုကၠောန်ကၠုၚ်ဏံဂှ်ဝွံ ဟွံလုပ်သၞောဝ်တုဲ ဒှ်ဒၟံၚ်မွဲလ္ပာ်ဓဝ်ရောၚ် ဟီုရ။
“ကံၚ်ဇြဳပၞာန်ဂှ်တှ်ေ ထ္ၜးဟိုတ်ကဵုပရေၚ်လီမာဲ ပ္ဍဲပေါဲရုဲမာဲ ၂၀၂၀ တေံဂှ်တုဲ ဍေံတံ သီဏာလဝ်အဝဵုရ။ သီအဝဵုတုဲမှ ပေါဲရုဲမာဲ က္တဵုကၠောန်ကၠုၚ်ဏံဂှ်တှ်ေ ဒှ်ပေါဲရုဲမာဲလုပ်သၞောဝ်ဟွံသေၚ်ပုဟ်လေဝ်။ ဒှ်ဒၟံၚ်ပေါဲရုဲမာဲ လ္ပာ်ဍေံတံ ကၠောန်ကၠုၚ်မွဲလ္ပာ်ဓဝ်ရဏောၚ်။ စပ်ကဵုပရေၚ်ဏံတုဲ အရာက္တဵုဒှ်ကၠုၚ်မာန်ဂှ်တှ်ေ နကဵုပိုယ်တံ မုဒှ်ကၠုၚ်မာန်ရောဟီုဂှ် ဟီုဟွံမာန်ပုဟ်” သာ်ဝွံ သ္ဂးရ။
ညးလ္ၚတ်တံဂှ်တှ်ေ နကဵုကံၚ်ဇြဳပၞာန် ဂွံဒှ်ဗဗွဲဓဝ်ဂှ် ပ္ဍဲကဵုတိဍာ်ဍဵုဍိုက်ဂွံတံဂှ်တှ်ေ သာ်လဵုဒှ်ဒှ် ကၠောန်ကၠုၚ်ပေါဲရုဲမာဲမာန်ဂှ်ရ ပရေၚ်ဖံက်ပ္ကဝ်အခေါၚ်အရာမၞိဟ်တံ နွံကၠုၚ်တၟာဂလိုၚ်မာန်ရောၚ် ထံက်ထ္ၜးလဝ်ရ။
ပ္ဍဲတွဵုရးဍုၚ်မန်ဂှ် ဗော်ညဳသၟဟ်မန်ကဵု ဗော်ညးဗြဴမန်တံ နွံတုဲ ဗော်ပရေၚ်ဍုၚ်ကွာန် ဖျေံသ္ဇိုၚ်ၝောံဍုၚ် မပ္တံကဵုဗော်ကျခိုၚ်ယျေ ဒပ်ပၞာန်နွံလက္ကရဴတံ၊ ဗော်တစည ကေုာံ ဗော်ညးဍုၚ်ကွာန်တံဂှ်လေဝ် ဂွံစန်ဒက်အာအပ္ဍဲတွဵုရး နွံဒၟံၚ်ရ။
ပ္ဍဲတွဵုရးဍုၚ်မန် ပေါဲဗ္တိုက်သီဍုၚ် ဟွံဂွံဒှ်ကၠုၚ်ဏီဂှ်တှ်ေ ယဝ်ဆက်ဒှ်ဒၟံၚ်အတိုၚ်လၟုဟ်မ္ဂး ကံၚ်ဇြဳပၞာန် ကၠောန်ကၠုၚ်ပေါဲရုဲမာဲ လှဲလှဲလးလးမာန်ရောၚ် ဇြဟတ်ရာမညဖေဝ်ဒရာခေတ်တၟိ NRFF သ္ၚဳဂၠိပ်လဝ်ရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ကရောၚ်ပၞာန်ရာမညဂှ်တှ်ေ ပေါဲရုဲမာဲဝွံ ဒှ်သွက်ကံၚ်ဇြဳပၞာန်ကဵု သၞောတ်တၠအဝဵုပၞာန် အာယုက်ဂွံဂၠိၚ်ဏောၚ်ဂှ်ရ ကေတ်အာအရေဝ် လ္တူညးမပါလုပ်ပ္ဍဲပေါဲရုဲမာဲဏံ ပိုတ်တ်သ္ကုတ်တ်ဏောၚ်ဂှ် ဟီုရ။
“ပေါဲရုဲမာဲပ္တောံဏံဂှ်တှ်ေ သွက်ဂွံကဵုမာဲရုဲစှ်ညးစၞးသ္ပစၞး ကုညးဍုၚ်ကွာန်တံဟွံသေၚ် ဒှ်ပေါဲရုဲမာဲပတောံ ညံၚ်ကံၚ်ဇြဳပၞာန်ကဵု သၞောတ်တၠအဝဵုပၞာန်တံ အာယုက်ဂွံဂၠိၚ်ဏောၚ်ဂှ်ရ ပါလုပ်ကဵုဇြဟတ် ပ္ဍဲပေါဲရုဲမာဲ မဒှ်ပၞော်ယီု သွက်ကံၚ်ဇြဳပၞာန် ညံၚ်ကံၚ်ဇြဳပၞာန် အယုက်ဂွံဂၠိၚ်ဂှ်တုဲ ဂွံဒုၚ်ရုဲစှ်ကဵုဒှ် ဟွံဂွံဒုၚ်ရုဲစှ်ကဵုဒှ် နကဵုဂကောံပၠန်ဂတးပိုယ်တံ စၟတ်ကေတ် နဒဒှ်လေံထံက်ကံၚ်ဇြဳပၞာန်တုဲ ကေတ်အာအရေဝ် ပိုတ်တ်သ္ကုတ်တ်ဏောၚ်ဂှ်ရ ပဋိပက္ခတံ ဒှ်ကၠုၚ်မာန်ဏောၚ်” သာ်ဝွံ သ္ဂးရ။
ကမ္မတဳဗ္တိုက်သရိုဟ်ပေါဲရုဲမာဲပတောံ ကံၚ်ဇြဳဖေဝ်ဒရာဍုၚ်မန်ဂှ်လေဝ် ညံၚ်ဟွံဂွံသ္ပစၟတ်သမ္တီ ကုပေါဲရုဲမာဲကံၚ်ဇြဳပၞာန်ဂှ်ကဵု ညံၚ်ဟွံဂွံကဵုအရီုဗၚ်တံဂှ် ကၠောန်အာ သီုပရေၚ်ဍုၚ်ကွာန်၊ သီုကဵုနဲကလုတ်တမာန်တံဏောၚ်ဂှ် လလောၚ်တြးလဝ်ရ။
ညးလ္ၚတ်တံဂှ်တှ်ေ နကဵုကံၚ်ဇြဳပၞာန် ဆက်ကၠောန်အာ အတိုၚ်အစဳဇန်မဖျေံစၟတ်လဝ်တံဂှ်တုဲ ဂကောံပၠန်ဂတးတံလေဝ် ဗီုဂွံဂှ် ဆက်ပၠန်ဂတးအာဏောၚ်ဂှ် သ္ၚဳဂၠိပ်လဝ်ရ။
ဟိုတ်ဂှ်ရ စပ်ကဵုပေါဲရုဲမာဲ ကံၚ်ဇြဳပၞာန် မကလိလောန်ဒၟံၚ်အမှုရာဇဝတ်ပၞာန်ဏံ ကၠောန်အာဂှ်တုဲ ဍုၚ်ဒဳမဝ်ကရေဇြဳတံဂှ် သ္ပအာစၟတ်သမ္တီဟွံသေၚ်တုဲ ဇီုကပိုက်ကၠုၚ်ကဵု လ္တူပၠန်ဂတးတံ ဗွဲမဇၞော်ကဵုဇြဟတ် ဟွံသေၚ်ပုဟ်ဂှ် ဂကောံပၠန်ဂတးတံ ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ