ထဝါဲ၊ မာတ် ၂
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဒေသ(အရှေ့တော) ပွိုၚ်ဍုၚ်ထဝါဲ ရးတၞၚ်သဳဂှ်တုဲ ညးဒေသနူကဵုကွာန်ပန်ကွာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
ကရောၚ်ပၞာန်ကံၚ်ဇြဳပၞာန် ဇြဟတ်နွံဗ္ဒါဲ ၂၀၀ ဂှ်ဝွံ စနူဂိတုမာတ် ၁၈ အခိၚ်ဇိုၚ်သဝ်တ္ၚဲ ၜိုတ် ၆ နာဍဳဂှ်တုဲ ထ္ပက်ကၠုၚ်ကရောၚ်ပၞာန် နူကဵုပွိုၚ်ဍုၚ်ထဝါဲ ကွာန်(စည်ပင်ကောက်) တုဲ လုပ်စိုပ်ကၠုၚ် လ္ပာ်ကွာန်ပကာရဳရ။
ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ်ဂှ်တုဲ ညးဒေသ နူကဵုကွာန်(စည်ပင်ကောက်၊ ဇလွန်း၊ လိုင်းတောင်၊ ကတက်) တံဝွံ ထောံလသာဌာန်ဒၟံၚ်တုဲ ဒးဂြိပ်ဒဴဒၟံၚ် ဒၞါဲဗၠးဘဲတံရ။
ဒၟါနူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဟွံမွဲကီုလေဝ် ယဝ်ဆက်အာဂတမ္ဂး ပေါဲဗ္တိုက်တံ သာသ္ကာတ်မြဟ်ကၠုၚ်မာန်ရောၚ် ညးတာလျိုၚ် ဒပ်ပၠန်ဂတးဖျေံသ္ဇိုၚ်ဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ဝွံ ဒှ်တမ်ဒပ် ခမရ စၟတ် ၄၀၂ ဖျေံသ္ဇိုၚ်ထဝါဲတုဲ ပ္ဍဲကရောၚ်ပၞာန်ဏံဂှ် ကောန်ဒပ်စှ်ေနူတန်ဗ္တောန်ကွတ်ပၞာန် ဗွဲမဂၠိုၚ်ဂၠေၚ် ပါလုပ်ဒၟံၚ်ရောၚ် သ္ဂးရ။
တုဲကၠုၚ်ဂိတုမာတ်မံက်တေံဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကဵုပွိုၚ်ဍုၚ်ထဝါဲ ကွာန်(သပြား၊ ပကာရီ၊ ဘဲမတ်တပ်၊ ဝကုန်း၊ သင်္ကန်းကုန်း) တံဂှ်တုဲ ညးဒေသဂၠိုၚ်ကဵုလ္ၚီ ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ပ္ဍဲရးတၞၚ်သဳဂှ် အပ္ဍဲကာလသီအဝဵုဏံ မ္ၚးနူကဵုပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ဗ္တိုက်ပၞာန်ကျာတံတုဲ ညးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်တံ ဂၠိုၚ်တိုန်ကၠုၚ် စဵုကဵုထပှ်ဠက်ဘာ်ပြၚ်ဂှ် ဂွံတီကေတ် နူလိက်ဒုၚ်စဳရေၚ် ဂကောံသုတေသန FG5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီု−CJ