မတ်မလီု၊ မာတ် ၂၀
အသေအဟာန်တ္ၚဲတွဵုရးဍုၚ်မန် မရနုက်ကဵု ၅၁ ဝါ ပ္ဍဲဂိတုမာတ် ၁၉ ဂှ် ကံၚ်ဇြဳပၞာန် ရပ်စပ်ဇြဟတ်ဂီုကၠီု ဗွဲမဂၠိုၚ်ဂၠေၚ်တုဲ ကၠောန်ဗဒှ်လဝ် လ္တူဍုၚ်မလီု တွဵုရးဍုၚ်မန်ရ။
အသေအဟာန်ဏံဂှ် ကၠောန်ဗဒှ်လဝ် ပ္ဍဲခဠာတ်သၟိၚ်ဗရာံ ဗ္ဒါဲကၠတ်ထဝ်တွဵုရးဍုၚ်မန် လ္တူဍုၚ်မတ်မလီုဂှ်တုဲ ရပ်စပ်လဝ်ဇြဟတ်ဂီုကၠီု ဂၠိုၚ်ကဵုကၠံ ပါလုပ်သီုကဵုဒပ်ပၞာန်၊ ဗၠာဲသၟိၚ်၊ ပၞာန်မၚ်ကွာန် ကေုာံ သီုဗျူသဝ်ထဳတံရ။
ဂွံကၠောန်ဗဒှ်အသေအဟာန်ဂှ် ကၟာတ်လဝ်ဂၠံၚ် နူဂၠံၚ်ဇၞော်လ္တူ ဂၠံၚ်(လိမ္မော်စင်) စဵုကဵုဂၠံၚ်တၞၚ်သဳတုဲ ဗ္ဒါဲဒၞါဲကၠောန်ဗဒှ်အသေအဟာန်ဂှ်လေဝ် ဖျေံလဝ်စက်ဂျာန်ဗာဇၞော်ဇၞော် တၟာဂလိုၚ်ရ။
ညးဒေသမတ်မလီုမွဲတၠဂှ်တှ်ေ သွက်အသေအဟာန်တ္ၚဲတွဵုရးဍုၚ်မန်ဂှ် လ္ပာ်ကံၚ်ဇြဳပၞာန် ရပ်စပ်လဝ်ဇြဟတ်ဂီုကၠီုတၟာဂလိုၚ်ဂှ် ဂွံဆဵုကေတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပတေၚ်ဂြတ်လဝ်ဂီုကၠီုဂှ်တှ်ေ နူဏေံတေံ သာဂၠိုၚ်ရ။ နူဏေံတေံတှ်ေ ဍေံတံ ၚးတးပသောၚ်ဒၟံၚ်ဆေၚ်ဖျာဂမၠိုၚ်။ တုဲတှ်ေ ဂၠါဲမံၚ်မာၚ် နကဵုစက်ဂၠါဲမာၚ်တံဂှ်ရ။ တုဲပၠန် နူဏေံတေံဂှ် စုတ်မံၚ်သီုဂျာန်ဗာတံ ယာယဳရ။ ဟိုတ်နူပရေၚ်ဂီုကၠီုတုဲ နူဏေံတေံလေဝ်ဂၠိုၚ်၊ တ္ၚဲဏံလေဝ် ဂၠိုၚ်ကွေံကွေံ” သာ်ဝွံ သ္ဂးရ။
သ္အာၚ်နူဂှ်ပၠန် သွက်ဂီုကၠီု အသေအဟာန်တ္ၚဲတွဵုရးဍုၚ်မန်ဂှ် ကၟာတ်လဒဵုစၟဳတ်ဒၟံၚ် ဒၞါဲလုပ်တိတ်ဍုၚ်တံဂှ်ကီု၊ ထ္ၜးဇြဟတ်ဂေတ်ဒၟံၚ် အပ္ဍဲဍုၚ်ကီု ပ္ဍဲအရာစၟဳတ်တံဂှ်လေဝ် ကၠောန်ကၠုၚ်ဒၟံၚ် ဗွဲမတေၚ်ဂြတ်ရ။
အခိၚ်ကၠောန်ဗဒှ်အသေအဟာန်တ္ၚဲတွဵုရးဍုၚ်မန်ဂှ် ဂၠံၚ်ဇၞော်လ္တူ ဍုၚ်မတ်မလီု ဒးဒုၚ်ကၟာတ်လဒဵုလဝ်တုဲ ကွးဘာသှ်လိက်တန်လုပ်တက္ကသိုလ်ဂမၠိုၚ် ဒးရပ်စပ်အာကၠုၚ်လဝ် ဂၠံၚ်ဇၞော်သၟဝ်မွဲဓဝ်တုဲ ဂၠံၚ်ကၟာတ်အာကၠုၚ်ဟွံဂွံတံ က္တဵုဒှ်လဝ်ရ။
အသေအဟာန်ဏံဂှ် ညးအုပ်ကာဂကောံကံၚ်ဇြဳပၞာန်သီအဝဵု သ္ကိုပ်ဗိုလ်ဇၞော် အံၚ်လေန်ဒိုဲ၊ ကောန်ဂကောံကံၚ်ဇြဳပၞာန်တံ မပါလုပ် ဝန်ဇၞော်ကၟိန်ဍုၚ် ကံၚ်ဇြဳပၞာန်ခါန်ပ္တိုန်လဝ်တံကဵု ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်တံ တိုန်စိုပ်လဝ်ရ။
ပ္ဍဲအသေအဟာန်တ္ၚဲတွဵုရးဍုၚ်မန်ဂှ် ဗ္ဒမ်ထ္ၜးပျးဌာနမဆေၚ်စပ်ဂမၠိုၚ်၊ ဗ္ဒမ်ထ္ၜးပျး သွံတြးဗၞိက်ပ္တိတ် MSME တံ၊ ကဏ္ဍဝါဗ္ၚ၊ ကဏ္ဍကွတ်စက် ကေုာံ ကဏ္ဍပရေၚ်ဒုၚ်ကာတံဂှ်လေဝ် ထ္ၜးပျးဒၟံၚ်တုဲ ဗၞိက်တိတ်နူပွိုၚ်ဍုၚ်နာနာ အပ္ဍဲတွဵုရးတံဂှ်လေဝ် ကဵုထ္ၜးလဝ်ရ။
တၠကမၠောန် SME မွဲတၠဂှ်တှ်ေ ပ္ဍဲတ္ၚဲတွဵုရးဍုၚ်မန်ဂှ် ဟိုတ်နူကံၚ်ဇြဳပၞာန် ပတေၚ်ဂြတ်လဝ်ဂီုကၠီုဂှ်တုဲ ကၟုဲထဳကၠုၚ်ဟွံဂွံ ၚုဟ်ဗ္ဒမ်ဖျာတံဂှ်လေဝ် က္ဍၚ်ဂှ်တုဲ ဟွံဒှ်ထ္ၜးပျး ဗၞိက်ပ္တိတ်နူဒေသတံပုဟ်ဂှ် ဟီုရ။
“တ္ၚဲတွဵုရးဍုၚ်မန်ဂှ် ကၟုဲဂမၠိုၚ် ဟွံကၠုၚ်ပုဟ်။ ကဵုၚုဟ်ဗ္ဒမ်ဖျာ မ္ဒးအိုတ်လဝ်ဂှ်တှ်ေ ကျအာဟဂှ်ရဏောၚ်။ ၚုဟ်ဗ္ဒမ်ဆေၚ်ဖျာသၟးဂှ် အိုတ်ဟွံအောန်ပုဟ်။ ဟဂှ်ရ ဟွံအာ” သာ်ဝွံ ဟီုရ။
ပ္ဍဲကဵုအသေအဟာန် တ္ၚဲတွဵုရးဍုၚ်မန်ဂှ် ဗှ်လဝ်သီုလိက်သဝဏ် နူကဵုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မပလံၚ်ဗစိုပ်နၚ်ဂှ်တုဲ ကုညးမစုက်လုက်ကဵုကံၚ်ဇြဳပၞာန် အပ္ဍဲတွဵုရးတံဂှ်လေဝ် ပအပ်ကဵုလဝ် လာပ်စိစောန်ပရေၚ်မၞိဟ်ရ။
အသေအဟာန် တ္ၚဲတွဵုရးဍုၚ်မန် မရနုက်ကဵု ၅၁ ဝါဏံဂှ် ၜိုန်သ္ဘၚ်သၟာန်သှ်လိက်တက္ကသိုလ်နွံဒၟံၚ်ကီုလေဝ် လ္ပာ်ကံၚ်ဇြဳပၞာန် ဓဇက်လဝ်အစဳဇန် သွက်ဂွံကၠောန်ဗဒှ်အာ စဵုကဵုဂိတုမာတ် ၂၁ ရ။
ပရိုၚ်−သြၚ်လောန်တိုၚ်(မ်)
ဗီု−CJ