ကျာ်မြဟ်၊ မာတ် ၂၁
သ္ဇိုၚ်ဝန်ထံၚ် သၟဝ်တဲကံၚ်ဇြဳပၞာန် ပ္ဍဲကဵုထံၚ်ကျာ်မြဟ် တွဵုရးဍုၚ်မန်တံဂှ် ပရေၚ်ဒ္ဂေတ်လီုစလာပ်တံ သာပရေံကၠုၚ်ရောၚ် ဂကောံညးဗြဴကောန်ထံၚ်ပရေၚ်ဍုၚ်ကွာန် WOPP လလောၚ်ပ္တိတ်လဝ် ပ္ဍဲဂိတုမာတ် ၁၈ တေံရ။
ကောန်ဒပ် မျေတ်တ်ထောန် ကေုာံ သ္ဇိုၚ်ဝန်ထံၚ် ပွိဖျူဝေန် မယိုက်ဒၟံၚ်တာလျိုၚ် ပ္ဍဲထံၚ်ကျာ်မြဟ်ဂှ်ဝွံ ထပိုတ်ကေတ်ကၠုၚ်ဒၟံၚ် သြန်လှုဲနူကဵုဂြောဝ်ဂတာကောန်ထံၚ်ပရေၚ်ဍုၚ်ကွာန်တံ မပလံၚ်ဗစိုပ်နၚ်ဂှ်တုဲ မွဲကိုဋ်မ္ဂး ကေတ်ဒၟံၚ် ၜါဠက်ဒ္ကေဝ်၊ ပိကိုဋ်မ္ဂး ကေတ်ဒၟံၚ် စဵုကဵုတြဴဠက်ဒ္ကေဝ်ရောၚ် သ္ဂးရ။
သ္အာၚ်နူဂှ်ပၠန် ကောန်ထံၚ်မျေတ်တ်ထောန်ဝွံ ကေတ်ဂၞန် ID ကေုာံ Wave Money Password တံဂှ်တုဲ အခိၚ်ပ္တိတ်ကဵုလှုဲမ္ဂး မွဲကိုဋ်တှ်ေ ထပိုတ်ကေတ်ဒၟံၚ်စဵုကဵုပိဠက်ဒ္ကေဝ် ကၠောန်သ္ပကၠုၚ်ဒၟံၚ်ရ။
ဂကောံညးဗြဴကောန်ထံၚ်ပရေၚ်ဍုၚ်ကွာန် WOPP ဂှ်တှ်ေ အခိၚ်လၟုဟ် ဟိုတ်နူၚုဟ်ဗၞိက်က္ဍၚ်တုဲ အခိၚ်ပရေၚ်စသုၚ်မံၚ်စံၚ်ကြေပ်ဂြတ်ဒၟံၚ်ဂှ် သြန်နူကဵုဂြောဝ်ဂတာညးတံ မပလံၚ်ဗစိုပ်နၚ် သီုကဵုဍာ်ပဠက်ညးတံဂှ် သွက်ဂွံစသုၚ်ရဂှ် ဒှ်ဒၟံၚ်အကာဲအရာ ဟွံဂွံရပ်စပ်ပေၚ်ၚ်ရောၚ် ကဵုလဝ်သမ္တီရ။
ဟိုတ်ဂှ်ရ သ္ဇိုၚ်ဝန်ဒ္ဂေတ်လီု ပ္ဍဲထံၚ်ကျာ်မြဟ်တံဂှ် နကဵုညးတာလျိုၚ်ဂမၠိုၚ် သွက်ဂွံစၟဳတ်ကေတ်ကဵုအရေဝ်ကီု၊ ယဝ်ရဆက်ကၠောန်သ္ပ ကလိလောန်ဒၟံၚ်မ္ဂး သွက်ဂွံဒေါအ်ဒေၚ်ကဵုဂှ် ပံၚ်တောဲရေၚ်တၠုၚ်အာ ကုဂကောံအဖဝ်မိတ်ဂမၠိုၚ်ဏောၚ် ဟီုကၠုၚ်လဝ် ပ္ဍဲတၚ်လလောၚ်တြးဂှ်ရ။
ပ္ဍဲထံၚ်ကျာ်မြဟ် တွဵုရးဍုၚ်မန်ဂှ် ကောန်ထံၚ်ဗြဴ၊ တြုံ ဒးထံၚ်ဒၟံၚ် နကဵုၝောံပိုဒ်ပရေၚ်ဍုၚ်ကွာန်၊ သီုကဵုၝောံပိုဒ်တၞဟ်သ္အာၚ်တံဂှ် နွံဒၟံၚ် ဂၠိုၚ်ကဵုလ္ၚီရ။
ပရိုၚ်−သြၚ်လောန်တိုၚ်(မ်)
ဗီု− Social Media