နေဗျဳဒဝ်၊ မာတ် ၂၁
နကဵုဒပ်ပၞာန် ကောန်ၚာ်သၟတ်အယုက်ဟွံပေၚ်ဏီတံဂှ် ညံၚ်ဟွံဂွံပကောံဒး ကဵုလုပ်ပၞာန်ဂှ်ကီု၊ ဗၠေတ်မှာတုဲ ညးဒးဒုၚ်ပကောံပလဝ်ကောန်ပၞာန် နကဵုဟိုတ်နာနာသာ် ယဝ်နွံမ္ဂးလေဝ် ကဵုဒၟံၚ်အခေါၚ်တိတ် ဗွဲမပြဟ်ရောၚ် ကံၚ်ဇြဳပၞာန် ဟီုရ။
ညးတာလျိုၚ်ကံၚ်ဇြဳပၞာန် ဟီုကၠုၚ်လဝ် ပ္ဍဲကဵုအသေအဟာန် နူကဵုဒပ်ပၞာန်မကၠောန်ဗဒှ်ကဵုလဝ် ပ္ဍဲဂိတုမာတ် ၁၉ တေံ မဒှ်အသေအဟာန် ကဵုအခေါၚ်ကောန်ၚာ်အဝဲဟွံစိုပ်ဏီတံ နုက်တိတ်နူဒပ်ပၞာန်တုဲ သ္ဂောံကလေၚ်ပအပ်ပြာပ် ဇရေၚ်မိမညးတံဂှ်ရ။
နကဵုဒပ်ကံၚ်ဇြဳပၞာန် ညံၚ်ကောန်ပၞာန်ကောန်ၚာ် အာယုက်ဟွံပေၚ်ဏီတံ ဟွံဂွံသှ်ေၜက် အပ္ဍဲဒပ်ပၞာန်ဂှ် ဒဒှ်ရဆက်ရေၚ်တၠုၚ်အာဏောၚ်ဂှ်ကီု၊ ညးတာလျိုၚ် မကော်ပကောံဒးဗၠေတ်မှာအာတံဂှ်လေဝ် ကေတ်ဒၟံၚ်အရေဝ် ဗွဲမဗဗွဲကဵုစေဝ်ပၞောန်ပၞာန်ဏောၚ်ဂှ် သ္ဂးရ။
ကောန်ၚာ်သၟတ်အဝဲဟွံစိုပ်ဏီ နွံအပ္ဍဲဒပ်ပၞာန်တံဂှ် ဌာနပၞာန်ရးမဆေၚ်စပ်ဂမၠိုၚ် စၟဳတ်ချိုတ်တ်ပၠိုတ်တ်တုဲ ကဵုလဝ်အခေါၚ်နုက်တိတ်တုဲ စၟဳတ်ဂွံဆဵုကေတ်လဝ် ကောန်ပၞာန်အာယုက်ဟွံပေၚ်ဏီ ၉၃ တၠဂှ်တုဲ ကလေၚ်လှဲပြံၚ်ကဵုလဝ် ဇရေၚ်မိမညးတံရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒရ။
ကံၚ်ဇြဳပၞာန် ကၠောန်ဗဒှ်ကဵုအသေအဟာန်တုဲ ကဵုကၠုၚ်အခေါၚ်ကုညးအဝဲဟွံစိုပ်ဏီတံ နုက်တိတ်နူဒပ်ပၞာန်ဂှ်ကီုလေဝ် လ္ပာ်ဏံဂှ်တှ်ေ ညးအဝဲဟွံစိုပ်ဏီတံ ကၠေံဂၠိုၚ်ကၠုၚ်ကီု၊ ပရေၚ်ကော်ပကောံကၠုၚ်ကောန်ပၞာန် ဗွဲအဓမ္မတံလေဝ် ဂၠိုၚ်ဒၟံၚ်ဂှ် ညးဍုၚ်ကွာန်ဒေသမတ်မလီုမွဲတၠ ဟီုရ။
နကဵုကံၚ်ဇြဳပၞာန် အသေအဟာန်ပအပ်ပြာပ်လှဲပြံၚ်ကဵု ဇရေၚ်မိမ လအာတုပ်သာ်ဏံဂှ် နူသၞာံ ၂၀၁၂ စဵုစိုပ်တ္ၚဲဏံ ကၠောန်ဗဒှ်ကၠုၚ်လဝ် ပ္ဍဲၝောံခန်တိုက်လိက်မြဝတဳ၊ ဗ္ဒိုပ်ဇူဒီု ကေုာံ ဒၞါဲစၟဳတ်ဍုၚ်လ္ဂုၚ် နကဵုအသေအဟာန် ၁၈ ဝါတုဲ၊ နကဵုအစဳဇန်ဒပ်ပၞာန်ဂှ် ပန်ဝါ၊ အပံၚ်ဖအိုတ် ၂၂ ဝါ နွံလဝ်တုဲ လၟိဟ်အပံၚ်ဖအိုတ် ၜိုတ် ၁၁၅၀ တၠ လှဲပြံၚ်ပအပ်ကဵုလဝ်မာန်ရောၚ် သ္ဂးလဝ်ရ။
မွဲလ္ပာ်ဂှ်ပၠန် ပ္ဍဲဂိတုမာတ် ၁၇ တေံ ကံၚ်ဇြဳပၞာန် ထပ်ပံက်ကၠုၚ်လဝ် တန်ဗ္တောန်ကွတ်ပၞာန် လၟေၚ် ၁၁ ပ္ဍဲကဵုဘာတန်ဗ္တောန် နွံပ္ဍဲဌာန်ဂအုပ်ပၞာန်ရး မဆေၚ်စပ်တံဂှ်ရ။
သၞောဝ်ယိုက်လျိုၚ်ပၞာန်ဂှ် ဥူတာန်ယှိုဲ တၠအဝဵုပၞာန်တြေံ စၞောန်ပျးကၠုၚ်လဝ် ပ္ဍဲသၞာံခရေတ် ၂၀၀၀ တေံတုဲ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ပၠောပ်ကၠုၚ်လဝ်လမျီု ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ တေံရ။
လ္ပာ်ကံၚ်ဇြဳပၞာန်ဂှ်တှ်ေ ညးတိုန်စိုပ်လဝ်တန်ဗ္တောန်ကွတ်ပၞာန် လၟေၚ် ၁၁ တံဝွံ ရံၚ်ကဵုသၞောဝ်ယိုက်လျိုၚ်ပၞာန်မ္ဂး ဒှ်ညးဍိုက်ပေၚ်ကဵုဍာ်ဒကေဝ်တံရောၚ် တြးလဝ်ဝါဒရ။
ပရိုၚ်−သြၚ်လောန်တိုၚ်(မ်)
ဗီု−MOI