ကအ်ကြိက်၊ မာတ် ၂၂
တွဵုရးကရေၚ် ပ္ဍဲဂၠံၚ်ဇၞော်အာယှ ကအ်ကြိက်−ဗြဝတဳဂှ် အကြာကရောၚ်ပၞာန်ကံၚ်ဇြဳပၞာန် ကရောၚ်ပၞာန်အံၚ်ဇေယျ မဗပေၚ်ကၠုၚ်ဇြဟတ်ဒပ်ဂှ်ကဵု ဂကောံဇြဟတ်ပၠန်ဂတး သၟဝ်သ္ကိုပ်သ္က KNLA တံ က္တဵုဒှ်ဒၟံၚ် ပေါဲဗ္ဒိုက်ၜါလ္ပာ် ဗွဲမသ္ကာတ်မြဟ်ရောၚ် တမ်ရိုဟ်ပရိုၚ် နူဂကောံဇြဟတ်ပၠန်ဂတးတံ ဟီုရ။
ပ္ဍဲပွိုၚ်ဍုၚ်ကအ်ကြိက်ဂှ် ဒပ်ကံၚ်ဇြဳပၞာန် ပလံၚ်ဗစိုပ်ဗပေၚ်ဒၟံၚ်ဇြဟတ် ကောန်ဒပ်စှ်ေနူတန်ဗ္တောန်ကွတ်ပၞာန်တံ ဇရေၚ်ကရောၚ်ပၞာန်အံၚ်ဇေယျ မဝေၚ်ဒၟံၚ်ပၞာန် ကဆံၚ်ကၟိန်ဍုၚ်ဂှ် ဟွံပိုတ်သ္ကုတ်တုဲ ထ္ပက်ဒၟံၚ်ပၞာန် လ္ပာ်ဂၠံၚ်ဇၞော်အာယှ ဗ္ဒါဲဍုၚ်ကအ်ကြိက်ရ။
နူဂိတုမာတ် ၁၃ စဵုကဵုဂိတုမာတ် ၂၁ ဂှ် အကြာကရောၚ်ပၞာန်အံၚ်ဇေယျ ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ်တံ သ္ကာတ်မြဟ်ဒၟံၚ် လၟေၚ်ဒဒှ်တ္ၚဲတုဲ လ္ပာ်ဒပ်ကံၚ်ဇြဳပၞာန် ဇီုကပိုက်ချိုတ်အာလဝ်တံ ဂၠိုၚ်ဒၟံၚ်ရောၚ် တမ်ရိုဟ်ပရိုၚ်ပၠန်ဂတးမွဲတၠ သ္ဂးရ။
ကရောၚ်ပၞာန်အံၚ်ဇေယျ ဒပ်ကံၚ်ဇြဳပၞာန်ဝွံ နွံဒၟံၚ်ပ္ဍဲသ္ကုတ်သၠုၚ်ကျာကဵု သ္ကုတ်သၟဝ်ကျာ ဍုၚ်ကအ်ကြိက်၊ နွံဒၟံၚ်လ္ပာ်သ္ကုတ်လ္တူ ဍာ်လဂေါဝ်တဝ်နဝ် ဂၠံၚ်ဇၞော်အာယှ ကအ်ကြိက်−ဗြဝတဳဂှ်တုဲ ဒပ်ပံၚ်ကောံပၠန်ဂတးတံ ကၟာတ်လဒဵုဗ္တိုက်ဒၟံၚ် ကရောၚ်ပၞာန်အံၚ်ဇေယျမွဲ မဖျေံလဝ်ဒပ်စိုပ်ဒၟံၚ် လ္ပာ်သ္ကုတ်လ္တူဍာ်လဂေါဝ်တဝ်နဝ်ဂှ်ရောၚ် တမ်ရိုဟ်ပရိုၚ်ဗလးတိတံ ဟီုရ။
ကရောၚ်ပၞာန်အံၚ်ဇေယျ ဒးဒုၚ်ကြတ်ဗ္တိုက်လဝ် ဗ္ဒါဲဍာ်လဂေါဝ်တဝ်နဝ် ဂၠံၚ်ဇၞော်အာယှဂှ် ဒပ်ကံၚ်ဇြဳပၞာန် သွက်ဂွံကဵုအရီုဗၚ်ပၞာန် ကုကရောၚ်ပၞာန်ဏံဂှ် ဗပေၚ်ကၠုၚ်ဒၟံၚ်ဇြဟတ် နူကဵုဍုၚ်ကအ်ကြိက်တုဲ က္တဵုဒှ်ဒၟံၚ်ပေါဲဗ္တိုက် ကုဂကောံဇြဟတ်ပၠန်ဂတးတံ ဗွဲမသ္ကာတ်မြဟ်ရ။
ကောန်ဒပ်သၟဝ်တဲကရောၚ်ပၞာန်အံၚ်ဇေယျ ဒပ်ကံၚ်ဇြဳပၞာန် မထ္ပက်ကၠုၚ်ဒၟံၚ်ကရောၚ်ပၞာန် ပ္ဍဲပွိုၚ်ဍုၚ်ကအ်ကြိက် ပွိုၚ်မွဲသၞာံပြၚ်ဂှ်ဝွံ အပ္ဍဲပေါဲဗ္တိုက်ဂှ် ဇီုကပိုက်ချိုတ်ကလိဂွံဝပ်တံ ဂၠိုၚ်ဒၟံၚ်တုဲ ဆက်အာဂတဟွံမာန် စိုတ်ဓာတ်စှ်ေကၠုၚ်တုဲ ဖျေံကၠုၚ်လွဟ် ဇရေၚ်ဂကောံဇြဟတ်ပၠန်ဂတးတံ နွံဒၟံၚ်ရ။
အတိုၚ်ဂလာန် ကောန်ဒပ်ကံၚ်ဇြဳပၞာန် မဖျေံကၠုၚ်လွဟ် လုပ်စိုပ်ကၠုၚ် ဇရေၚ်ဂကောံဇြဟတ်ပၠန်ဂတးတံဂှ်မ္ဂး ကောန်ဒပ်ကံၚ်ဇြဳပၞာန် နွံဒၟံၚ်ပ္ဍဲကရောၚ်ပၞာန်အံၚ်ဇေယျ ဗွဲမဂၠိုၚ်ဂှ်ဝွံ စိုတ်ဓာတ်စှ်ေကၠုၚ်ဒၟံၚ်တုဲ ပရေၚ်သၞာဲဒဴကဆံၚ်လ္တူဂမၠိုၚ် ဍဵုဍိုက်ပျဲပျာံဒၟံၚ်တံလေဝ် နွံဒၟံၚ်ရ။
သ္အာၚ်နူဂှ်ပၠန် ပ္ဍဲကရောၚ်ပၞာန်အံၚ်ဇေယျဂှ် ဟွံဂွံစၞစရုမ်မ်ဂပ်ပ်မွဲသာ် ဂွံစဒၟံၚ်ညိညရတုဲ ဒးကၠောဝ်ဗျဵုဒၟံၚ်ဂှ်ကီု၊ ပ္ဍဲကဵုပေါဲဗ္တိုက်တံဂှ် ဇီုကပိုက်ချိုတ်ဂၠိုၚ်ဒၟံၚ်တုဲ ရဲဟွံမိက်ဗ္တိုက်ပၞာန်တံ ဂၠိုၚ်ဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ