ကဠဝ်၊ မာတ် ၂၂
ကောန်ဂကောံ ကော်ပကောံဒၟံၚ်ကောန်ပၞာန်သ္ဂောံလုပ်ယိုက်ပၞာန် လ္ၚဵုတံဝွံ ကေတ်သြန်လာပ် မဟွံဗဗွဲကဵုသၞောဝ်တံဂှ်တုဲ ကော်ပကောံဒၟံၚ်ကောန်ပၞာန်တံရောၚ် ဒုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် သဵုဝေန် ဒုၚ်ဝန်ဟီုလဝ်ရ။
ပ္ဍဲဂိတုမာတ် ၂၀ တေံ အာစိုပ်လဝ် ဍုၚ်ကဠဝ် တွဵုရးသေံတုဲ အခိၚ်ဆဵုဂဗကဵု သၞာဲဒဴ၊ ကောန်ပၞာန် ကေုာံ ဂြောဝ်ဂတာညးတံ ပ္ဍဲကဵုဍုၚ်ဒပ်ကဠဝ်ဂှ် စပ်ကဵုပရေၚ်ကော်ပကောံကောန်ပၞာန်ကဵုယိုက်လျိုၚ်ပၞာန်တံတုဲ ဒုၚ်လဝ်ဝန် သာ်ဏံရ။
ဒုက္ဍိုပ်သ္ကိုပ်ပၞာန်ဂှ်တှ်ေ ဂကောံကော်ပကောံကောန်ပၞာန်လ္ၚဵုတံဂှ်ဝွံ ဟွံရေၚ်တၠုၚ် အတိုၚ်လၟေၚ်ကမၠောန်သၞောဝ်ဥပဒေတံဂှ်မွဲသာ် ပ္ဍဲအရာကော်ကဵုလုပ်ပၞာန်တံဂှ် ပရေၚ်စလာပ်တံ နွံဒၟံၚ်ရောၚ် ဟီုရ။
ဟိုတ်နူပရေၚ်သြန်ဟွံလုပ်သၞောဝ်တံဂှ်တုဲ ညးယိုက်ဝန်ပၞာန်လ္ၚဵုတံ ဒှ်ဒၟံၚ်အကြေပ်အဂြတ်တုဲ သီုကဵုဒးသောၚ်ကလးဒၟံၚ် ပြဒ္ဒညာ က္တဵုဒှ်ဒၟံၚ်ဟွံပိုတ်သ္ကုတ်သာ်ဏံဂှ်ရ ယဝ်ဂွံဆဵုကေတ်ကမၠောန်ဗၠေတ်မှာ ပ္ဍဲကဵုကဆံၚ်ကော်ပကောံညးယိုက်ဝန်ပၞာန်တံဂှ်မ္ဂး သွက်ဂွံကဵုသမ္တီ ကုညးမဆေၚ်စပ်တံ မွဲဒမြိပ်အခိၚ်ဂှ် စၞောန်ပ္ညုၚ်လဝ်ရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSDF ဂှ်တှ်ေ လ္ပာ်ကံၚ်ဇြဳပၞာန် ၜိုန်ဟီုဒၟံၚ် ဍိုက်ပေၚ်ကဵုဍာ်ဒကေဝ်နွံပၟိက်တံဂှ်မှ ကော်ပကောံသ္ဂောံလုပ်ပၞာန်ဂှ်ကီုလေဝ် သၟဝ်ဏံဂှ်တှ်ေ မ္ၚးနူကဵုကောန်ၚာ်သၟတ်အာယုက်ဟွံပေၚ်ဏီတံဂှ် ကော်ၚာ်သီုကဵုပရေၚ်ထတ်ယုက်ဟွံခိုဟ်တံလေဝ် ကော်ပကောံဒၟံၚ် နဒဒှ်ကောန်ဒပ်တၟိဂှ် ဟီုရ။
“ကံၚ်ဇြဳပၞာန်ဂှ်တှ်ေ ဍိုက်ပေၚ်ကဵုသၞောဝ်အစာံ မခုတ်လဝ်ဂမၠိုၚ် မပ္တံကဵုအာယုက်၊ ဇကုဇကောဝ်၊ ပရေၚ်ထတ်ယုက်၊ သမၠုၚ်ဒတဴတံဂှ်မှ ကော်အာကဵုလုပ်ပၞာန်ဏောၚ် ဟီုလဝ်ကီုလေဝ် ပ္ဍဲကဵုပေါဲဗ္တိုက် ကျဒၟံၚ်ပၞာန် အလုံဍုၚ်မွဲဂှ် ကောန်ပၞာန်ဇီုကပိုက်ကလိဂွံဝပ်တံ ပစူကၠုၚ်အလာံဗုကဵုတမ်ဒပ်တုဲ ဟိုတ်နူလၟိဟ်ကောန်ပၞာန် မဖျေံလွဟ်ဂြိပ်တိတ်အာတံ ပိုတ်သ္ကုတ်အာဂှ်တုဲ ကောန်ၚာ်သၟဝ်အာယုက် ၁၈၊ ကောန်ၚာ်ပရေၚ်ထတ်ယုက်ဟွံခိုဟ်တံဂှ်လေဝ် ပကောံဒၟံၚ် နဒဒှ်ကောန်ဒပ်တၟိတၟိတံဂှ်ရောၚ်” ဟီုရ။
သ္အာၚ်နူဂှ်ပၠန် ကောန်ဂကောံကော်ကဵုလုပ်ပၞာန်တံဂှ်ဝွံ ပ္ဍဲဗလးတိဏံဂှ်တှ်ေ ရဲကဵုလှုဲမာန်တံကဵု ရဲမစုက်လုက်ကဵုညးတံဂှ် သ္ကဵုကဵုကၠုၚ်လှုဲတုဲ ကဵုဗၠးအာ နူကဵုပွမ္ဒးယိုက်ဝန်ပၞာန်တံဂှ်တုဲ ညးကဵုလှုဲဟွံမာန်တံဂှ်တှ်ေ ပကောံဒၟံၚ် နဒဒှ်ကောန်ဒပ်တၟိ ဗွဲအဓမ္မနွံရောၚ် ညးဆက်ဟီုရ။
ညးမဍိုက်ပေၚ်ကဵု ဍာ်ဒကေဝ်ကံၚ်ဇြဳပၞာန်တံ ခုတ်လဝ်ဂှ်မှဟေၚ် ပံက်တန်ဗ္တောန်တုဲ ဗ္တောန်ကဵုဒၟံၚ် ဗွဲမဗဗွဲကဵုသၞောဝ်ရောၚ် ဟီုဒၟံၚ်ကီုလေဝ် အပ္ဍဲဒေသဂှ်တှ်ေ ရပ်ကၠုၚ်ပဝ်တာ ဗွဲအဓမ္မကီု၊ ကဵုကဵုလှုဲတုဲ လိက်စုတ်မၞိဟ်စၞးတံကီု၊ လုပ်ရပ်ဒၟံၚ် စဵုကဵုအပ္ဍဲသ္ၚိတုဲ ကော်ပကောံဒၟံၚ်ကောန်ပၞာန်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ကောန်ၚာ်သၟတ် အဝဲဟွံစိုပ်ဏီ ၉၃ တၠဂှ် ဟိုတ်နူကော်ပကောံဒး သွက်ဂွံလုပ်ပၞာန် ဗၠေတ်မှာအာဂှ်တုဲ ပ္ဍဲဂိတုမာတ် ၁၉ တေံ ပ္ဍဲကဵုဒၞါဲစၟဳတ်ဍုၚ်လ္ဂုၚ်တံကဵု ပ္ဍဲဗ္ဒမ်ဇူဒီုတံဂှ် ကဵုကလေၚ်နုက်တိတ်လဝ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒ ကံၚ်ဇြဳပၞာန်ရ။
ကံၚ်ဇြဳပၞာန်ဝွံ ကြဴနူပၠောပ်ကၠုၚ်လမျီု သၞောဝ်ယိုက်လျိုၚ်ပၞာန်ဂှ်တုဲ အပ္ဍဲပွိုၚ်မွဲသၞာံပြၚ်ဂှ် ပံက်ကၠုၚ်လဝ်တန်ဗ္တောန်ကွတ်ပၞာန် နူလၟေၚ် ၁ စဵုကဵုလၟေၚ် ၁၁ တုဲ တန်ဗ္တောန်ကွတ်ပၞာန် လၟေၚ် ၁၁ ဂှ်တှ်ေ ပ္ဍဲဂိတုမာတ် ၁၇ တေံ ပံက်လဝ် ပ္ဍဲကဵုဌာန်ဂအုပ်ပၞာန်ရးဂမၠိုၚ်ရ။
အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး ကြဴနူဂယိုၚ်ပ္တိုန်ကၠုၚ် သၞောဝ်ယိုက်လျိုၚ်ပၞာန်တုဲ နူသၞာံ ၂၀၂၄ ဂိတုဨပရဴ စဵုကဵုသၞာံ ၂၀၂၅ ဂိတုဂျာန္နဝါရဳဂှ် သွက်ဂွံလုပ်ယိုက်လျိုၚ်ပၞာန်ဂှ် သၟတ် ဗ္ဒါဲ ၂၄၀၀၀ ဒးဒုၚ်ရပ်လဝ် ဗွဲအဓမ္မရ။
ပရိုၚ်−သြၚ်လောန်တိုၚ်(မ်)
ဗီု−MOI