လ္ဂုၚ်၊ အံက်တဝ်ဗာ (၂)
လ္တူတၚ်ပ္တိုန်ထ္ၜး ပရေၚ်ဒက်ပ္တန်တွဵုရးဗၟာ သွက်သ္ဂောံထ္မံက်ရုပ်ရဴ ကုပရေၚ်တုပ်သၟဟ်ကောန်ဂကူ နူဗော်တောတက်ရးသေံ (SSPP) မပ္တိုန်ထ္ၜးလဝ်ဂှ် က္ဍိုပ်သ္ကိုပ်ပၞာန် ဟွံဒုၚ်တဲပုဟ်ဂှ် ညးမၞုံအခေါၚ်ဟီုဂး SSPP မတိုန်စိုပ်လဝ် ပေါဲသဳကၠဳပရေၚ်ၜိုဟ်လလမ် ဒုသ္ကိုပ်ဗိုလ်ဇၞော် သာၚ်သု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပေါဲသဳကၠဳပရေၚ်ၜိုဟ်လလမ် အလန်ဒုတိယ ကံၚ်ဇြဳပၞာန် ကော်ဘိက် ပ္ဍဲဂိတုသေပ်တေမ်ဗာ (၂၆) တုဲကၠုၚ်တေံဂှ် ညးစၞးနူဗော်တောတက်ရးသေံ (SSPP) မပါလုပ် ဒပ်ပၞာန်ညဳသၟဟ်ရးဝ (UWSA) ကေုာံ ဒပ်မဟာမိတ် ဒဳမဝ်ကရေတ်တေတ်ကောန်ဂကူ (NDAA) တံဝွံ ဆဵုဂဗလဝ်ကဵု က္ဍိုပ်သ္ကိုပ်ပၞာန် သ္ကိုပ်ဗိုလ်ဇၞော် မေန်အံၚ်လှာၚ်ရ။
ပ္ဍဲပေါဲဆဵုဂဗဂှ် ဗော်တောတက်ရးသေံ (SSPP) ပ္တိုန်ထ္ၜးလဝ် ပရေၚ်ဒက်ပ္တန်တွဵုရးဗၟာ၊ ပရေၚ်ပလေဝ်ပလေတ်သၞောဝ်သ္ဇိုၚ်၊ ပရေၚ်ချူဓဇက် သၞောဝ်သ္ဇိုၚ်တွဵုရးသေံ ကေုာံ ကိစ္စပရေၚ်ဒက်ပ္တန် ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳတံရ။
ဆ္ဂး ပ္ဍဲပေါဲသဳကၠဳဂှ် က္ဍိုပ်သ္ကိုပ်ပၞာန်ဝွံ တးပါဲထောံ လ္တူတၚ်ပ္တိုန်ထ္ၜး ပရေၚ်ဒက်ပ္တန်တွဵုရးဗၟာဂှ်တုဲ စပ်ကဵုအကာဲအရာဏံတုဲ ညးမၞုံအခေါၚ်ဟီုဂး ဗော်တောတက်ရးသေံ (SSPP) ဒုသ္ကိုပ်ဗိုလ်ဇၞော် သာၚ်သု ဟီုလဝ် သာ်ဏံရ။
“သွက်ပရေၚ်တုပ်သၟဟ်ကောန်ဂကူဂှ် ကၠာတေံတှ်ေ ကိစ္စၝောံဍုၚ်ဗၟာ (ဗမာပြည်မ) ရ၊ ၝောံဍုၚ်ဟီုဟီု တွဵုရးဟီုဟီု ကိစ္စတွဵုရးဗၟာ ပိုယ်တံပ္တိုန်ထ္ၜး သွက်သ္ဂောံအာ သၞောဝ်ဖေဝ်ဒရာ ကဆံၚ်တုပ်သၟဟ်ဂှ် ဟွံဒုၚ်တဲပုဟ်၊ အရာမိက်ဂွံဒှ်တံဂှ် နကဵုဗီုပြၚ် ထ္ပက်အဇာဂှ် ဟွံဂွံပုဟ်၊ ပဆုဲထောံ အခန်ဂှ်လေဝ် ဟွံဂွံပုဟ်၊ ဍေံတံဂှ်တှ်ေ နလၟေၚ်အခန်၊ ခံက်အၚ်၊ ၝောံပိုဒ် မဆေၚ်စပ်တံဂှ်ဟေၚ် သဳကၠဳအာမ္ဂး ဂွံရောၚ်၊ အာကဵုသၞောဝ် ၂၀၀၈ တုဲ ပလေဝ်အာ နလၟေၚ်အခန်၊ ၝောံပိုဒ်ဂှ်တှ်ေ ဂွံတွဵုဏောၚ်၊ ပွမကဵုလစွံစိုတ်လညာတ်တံတှ်ေ ဂွံဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲပေါဲသဳကၠဳဂှ် တၚ်နၚ်မိက်ဂွံပလေဝ် နူသၞောဝ်သ္ဇိုၚ်ဒက်ပ္တန် ၂၀၀၈ တံဂှ် ယဝ်ရပလေဝ်အာ နလၟေၚ်အခန်၊ ခံက်အၚ်၊ ၝောံပိုဒ်တံ ဂွံကီုလေဝ် ပ္ဍဲအကာဲအရာလၟုဟ်ဂှ် နကဵုကံၚ်ဇြဳပၞာန် ကၠောန်သ္ပပကောံပကေဝ်စွံလဝ် တၚ်နၚ်သၟးရမာန်တုဲ ကၠုၚ်စိုပ်အလဵုအသဳဂွံဒုၚ်ရုဲစှ်ဏံ၊ ကၠတ်ထဝ်တံမှဟေၚ် ပလေဝ်ပလေတ်မာန်ရောၚ်ဂှ် ညးဟီုရ။
နကဵုဗော်တောတက်ရးသေံ (SSPP) ဂှ် ပ္ဍဲပေါဲသဳကၠဳပွိုၚ်ပန်တ္ၚဲဂှ် ပ္တိုန်ထ္ၜးလဝ် ကိစ္စပရေၚ်ပလေဝ်ပလေတ် သၞောဝ်ဥပဒေ ကုဂကောံပရေၚ်သဳကၠဳ ပရေၚ်ၜိုဟ်လလမ်ကံၚ်ဇြဳပၞာန်တံဂှ်တုဲ ဟိုတ်နူသဳကၠဳလဝ် ပြေပြေလာဲလာဲဟွံမွဲဂှ်ရ ၜိုတ်စၟတ်သမ္တီဟေၚ် တုပ်စိုတ်ထ္ပက်လဝ်စၟတ်တဲမာန်ဂှ် သ္ဂးရ။
မွဲလ္ပာ်ပၠန်ဂှ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော်မေန်အံၚ်လှာၚ်ဝွံ ပ္ဍဲအရာပအပ်ကဵု အခေါၚ်အရာဖေဝ်ဒရာ ကောန်ဍုၚ်အရၚ်တံဂှ် အခေါၚ်အရာဖေဝ်ဒရာ မဒှ်ထေက်တံဂှ်ဟေၚ် ပအပ်ကဵုအာရောၚ် ရဴဝွံ ဟီုဂးကၠုၚ်လဝ် ပ္ဍဲကောံဓရီုကံၚ်ဇြဳပၞာန် မကၠောန်သ္ပလဝ် ပ္ဍဲနေဗျဳဒဝ် ပ္ဍဲဂိတုသေပ်တေမ်ဗာ (၂၇) တေံရ။
အခိၚ်လၟုဟ်ဂှ် ကံၚ်ဇြဳပၞာန် ဒးပံက်လဝ်မုက်ပၞာန် အလုံကၟိန်ဍုၚ်မွဲပြးဇးတုဲ ဆက်က္တဵုဒှ်ဒၟံၚ်ပေါဲဗ္တိုက် ကုဒပ်ပၞာန်ဗၠးၜး ကချေၚ် (KIA) ၊ ဗော်တောတက်ဂကူကရေၚ်ဍာဲ (KNPP) ၊ ဗော်သွးကောန်ဂကူရေၚ် KNU ၊ ဒပ်ပၠတရဴကောန်ဂကူချေၚ် (CNF) ၊ ဒပ်ပၞာန်ဗၠးၜးကောန်ဂကူတအာၚ် (TNLA) ၊ ဒပ်ပၞာန်ရခေၚ် (AA) တံ မပါလုပ် သီုကဵုဒပ်စဵုဒၞါညးဍုၚ်ကွာန် (PDF) တံရ။
ပရိုၚ်−သြၚ်လောန်တိုၚ်(မ်)