ဗရာတ်သေဲ၊ မေ ၂
မ္ၚးနူကဵုကောန်ဂကောံ ကၠတ်ထဝ်ယူရောပ်တံဂှ် စပ်ကဵုအခေါၚ်အရာမၞိဟ်တုဲ ပရေၚ်မကေတ်အရေဝ်ကၟာတ်လဒဵုလဝ် လ္တူသာပ်ကမ္မတဳယူရောပ်တံဂှ် ဒဒှ်ရကြုက် သ္ဂုတ်သွာတ်လဝ် သွက်ဂွံရုပ်သီအာဂှ် ဥက္ကဌကၠတ်ထဝ် ရိုဝ်ဗာတ်တာ မာတ်သဵုလာ ဟီုလဝ် ပ္ဍဲဂိတုဨပရဴ ၃၀ တေံရ။
ဟိုတ်နူအခေါန်ဖလှာ ဝါယှေန်တာန် မဖျေံစၟတ်လဝ် လ္တူဗၞိက်ပၠောပ်ပ္တိုန်ဍုၚ်အမေရိကာန်တံဂှ်တုဲ သွက်ဂွံဖအောန်ဖျေံ အရာမဇီုကပိုက်ဒးတံဂှ် ကြုက် ပ္တိတ်ဒၟံၚ်ဇြဟတ် ညံၚ်ပရေၚ်ဆက်ဆောံ ကုယူရောပ် စပ်ကဵုပရေၚ်ပိုန်ဒြပ်၊ ပရေၚ်ဍုၚ်ကွာန် သာတုဲဂွံခိုဟ်ကၠုၚ်ရ။
လ္တူသၞာဲဒဴကြုက် ဒးဒုၚ်စောဲစပ်လဝ် ဒဒှ်ရထိၚ်ဒဝ်လဝ် ဂကူဝဳဂါ မဿလေမ်တံ ကဵုဂအုံဗွဝ်ဂှ်တုဲ ဍုၚ်ပလိုတ်ဂမၠိုၚ် ကၟာတ်လဒဵုကေတ်လဝ်အရေဝ်ရ။
နဒဒှ်ကလေၚ်ခၠေဝ်ပလန်ဂှ် ကြုက် ကေတ်လဝ်အရေဝ် ကၟာတ်လဒဵုလဝ် ကောန်ဂကောံကၠတ်ထဝ်ယူရောပ် ပါလုပ်သီုကဵုသၞာဲဒဴတၞဟ်သ္အာၚ်ဂမၠိုၚ်ရ။
ပပ္တံနူသၞာံ ၂၀၂၁ တုဲ ပ္ဍဲကဵုစရၚ်မၞိဟ် ကြုက်ကေတ်လဝ်အရေဝ်ကၟာတ်လဒဵုလဝ် ၁၀ တၠဂှ် ပြဟ်ဟ်ဏံ ကောန်ဂကောံကၠတ်ထဝ်ယူရောပ် ပါလုပ်ဒၟံၚ် ၄ တၠရ။
နကဵုကမ္မတဳကၠတ်ထဝ်ညးတံ စပ်ကဵုဒတုဲဖဵုသၞာဲဒဴကြုက် ကေုာံ ယူရောပ်တံဂှ်တုဲ ဟွံဒးဂွိၚ်မွဲသာ် ဒဒှ်ရသဳကၠဳအာညးသ္ကအ်မာန်ရဏောၚ်ဂှ် ဥက္ကဌကၠတ်ထဝ် မာတ်သဵုလာ ဟီုရ။
ပရေၚ်ဆက်ဆောံကြုက် ကေုာံ ညးတံဝွံ ယှုက်ထုဲဒၟံၚ်ဖိုဟ်တုဲ သွာၚ်ဇဳပါလုပ်ဒၟံၚ်ရောၚ် ညးဟီုရ။
နဒဒှ်ခၠေဝ်ပၠန်ကၠုၚ် ကုပရေၚ်ကြုက် မကေတ်လဝ်အရေဝ်ဂှ်တုဲ ကၠတ်ထဝ်ယူရောပ် ဒေါအ်ဇူလဝ် တၚ်တုပ်စိုတ် ပရေၚ်ဓလိုက်တမ်ရိုဟ် ကုကြုက်ရ။
သမ္မတအမေရိကာန် ဒဝ်နေဝ်ထြာမ်ဂှ်တှ်ေ ကြဴနူစၞောန်ပျးကၠုၚ်အခေါန်ဖလှာ လ္တူကြုက် ဇၞော်ကဵုဇြဟတ်တုဲဂှ် နူဗေကျေန် ကော်ဘိက်ကၠုၚ်ကနေဒါ သွက်ဂွံပံၚ်တောဲကီုလေဝ် ကနေဒါ တးပါဲလဝ်ရ။
ကြဴနူဂှ်တုဲ ညံၚ်ပရေၚ်ဆက်ဆောံ စပ်ကဵုကေၚ်ကာပရေၚ်ပိုန်ဒြပ် ကုသမဂ္ဂယူရောပ် ဇြဟတ်ဂွံခိုဟ်ကၠုၚ်ဂှ် သၠုၚ်ပ္တိုန်အသိၚ် ပ္တိတ်ဒၟံၚ်ဇြဟတ်ရ။
Ref: Reuters