မတ်မလီု၊ မေ ၁၈
ပ္ဍဲတွဵုရးဍုၚ်မန်ဂှ် ပကောံဂွံလဝ်သၟတ် သွက်တန်ဗ္တောန်ကွတ်ပၞာန် လၟေၚ် ၁၃ ဗ္ဒါဲ ၁၄၀ တၠရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
သၟတ်ဒးဒုၚ်ပကောံပကောန်ပၞာန်တံဂှ် ပ္ဍဲဂိတုမေ ၁၇ တေံ ဂကောံက္ဍိုက်ပ် သ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ် ကံၚ်ဇြဳပၞာန်မခါန်ကၞက်ပ္တိုန်လဝ်ဂှ် အာစိုပ်ဆဵုဂဗလဝ် ပ္ဍဲဘာတန်ဗ္တောန် ဌာန်ဂအုပ်ပၞာန်ရးအဂၞဲ လ္တူဍုၚ်မတ်မလီုဂှ်ရ။
လ္ပာ်ကံၚ်ဇြဳပၞာန် လလောၚ်ပ္တိတ်လဝ် လၟိဟ်ကောန်ဒပ် ဒးဒုၚ်ပကောံပကောန်ပၞာန် ဟွံမွဲကီုလေဝ် အတိုၚ်ဗီုဓာတ်စၟတ်သမ္တီဂမၠိုၚ်မ္ဂး သၟတ်ဒးဒုၚ်ပကောံပကောန်ပၞာန်ဂှ် နွံဗ္ဒါဲ ၁၄၀ တၠရ။
သၟတ်ဒးဒုၚ်ပကောံပကောန်ပၞာန် သွက်တန်ဗ္တောန်ကွတ်ပၞာန် လၟေၚ် ၁၃ တံဂှ်ဝွံ ကြဴနူဒးဒုၚ်ရပ် ကုကံၚ်ဇြဳပၞာန် ဗွဲအဓမ္မတုဲဂှ် ညးဒးဒုၚ်ပကောံကၠုၚ်ကောန်ဒပ် ပါလုပ်ဂၠိုၚ်အိုတ်ရောၚ် ဂွံတီကေတ် အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံရ။
ကံၚ်ဇြဳပၞာန် ၜိုန်ဟီုဒၟံၚ် ဟွံကော်ညးအာယုက်ဟွံပေၚ်တအ် သ္ဂောံယိုက်လျိုၚ်ပၞာန်ဂှ်ကီုလေဝ် အပ္ဍဲဒေသဂှ်တှ်ေ မ္ၚးနူသၟတ်အာယုက်ဟွံပေၚ်ဂှ် သၟတ်ပရေၚ်ထတ်ယုက်ဟွံခိုဟ်တံဂှ်လေဝ် ပကောံကၠုၚ်ဒၟံၚ်ကောန်ဒပ်တၟိတံ နွံဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန်ဂှ် နူကဵုတန်ဗ္တောန်ကွတ်ပၞာန်ကံၚ်ဇြဳပၞာန် လၟေၚ် ၁ စဵုကဵု လၟေၚ် ၁၂ ဂှ် သၟတ်အပ္ဍဲဒေသ ဒးဒုၚ်ပကောံပလဝ်ကောန်ပၞာန် ဟွံအောန်နူ ၂၁၀၀ တၠရ။
ပရိုၚ်−သြၚ်လောန်တိုၚ်(မ်)
ဗီုရုပ်− MOI