လိုၚ်ဗၠဲ၊ မေ ၁၈
ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်ပၞာန်ဒုၚ်ပန် နွံပ္ဍဲပွိုၚ်ဍုၚ်ထဝါဲ ရးတၞၚ်သဳကဵု ပွိုၚ်ဍုၚ်လိုၚ်ဗၠဲ တွဵုရးကရေၚ် ပယျဵုသေံ−ဗၟာဂှ် ဒပ်ပံၚ်ကောံဇြဟတ်ပၠန်ဂတးတံ သီဂွံလဝ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
ဒပ်ပံၚ်ကောံ ဂကောံဇြဟတ်ပၠန်ဂတးဂမၠိုၚ်ဝွံ ပ္ဍဲဂိတုမေ ၉ ဂှ် ဗ္တိုက်သီဂွံလဝ် ဗ္ဒိုပ်(တခေါဘီခွီး) နွံပွိုၚ်ဍုၚ်လိုၚ်ဗၠဲ တွဵုရးကရေၚ်ကဵု ဗ္ဒိုပ်ဗျူဟာထဳခဳ နွံပွိုၚ်ဍုၚ်ထဝါဲ ရးတၞၚ်သဳရ။
ပ္ဍဲဂိတုမေ ၁၃ ဂှ်လေဝ် ကလေၚ်သီဂွံလဝ် ဗ္ဒိုပ်ဗျူဟာ(တာလယ်) ကံၚ်ဇြဳပၞာန် နွံပွိုၚ်ဍုၚ်လိုၚ်ဗၠဲ တွဵုရးကရေၚ် ပယျဵုသေံ−ဗၟာဂှ်တုဲ ဗ္ဒိုပ်ဗျူဟာ(တာလယ်) ဝွံ သွက်ဒပ်ပၞာန်ဂှ် လ္ဂောံကဵုပရေၚ်ပၞာန်မ္ဂး ဒှ်ဗ္ဒိုပ်ဒပ်ပၟိက်ဇၞော်ဗွဲမလောန်မွဲရ။
ဗ္ဒိုပ်ဗျူဟာ(တာလယ်) မစဖျေံလဝ်သ္ဇိုၚ် ပ္ဍဲသၞာံ ၁၉၈၉ ဂှ် ဂွံပွိုၚ် ၃၆ သၞာံလအ်တုဲ ဒပ်ပၠန်ဂတး သၟဝ်သ္ကိုပ်သ္က ဒပ်ပၞာန်ဗၠးၜးကောန်ဂကူကရေၚ် KNLA တံ ကလေၚ်သီဂွံလဝ်ရ။
ပ္ဍဲဂိတုမေ ၁၆ ဂှ်လေဝ် သီဂွံလဝ် ဗ္ဒိုပ်ကံၚ်ဇြဳပၞာန် ဗ္ဒိုပ်(မော်ကွီးလု) နွံပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ်တုဲ အပ္ဍဲပေါဲဗ္တိုက်သီဗ္ဒိုပ်ဂှ် ကောန်ဒပ်ကံၚ်ဇြဳပၞာန်သီုဖအိုတ် ဂြိပ်တိတ်အာလဝ်ရောၚ် ဗော်သွးကောန်ဂကူကရေၚ် KNU ဗဟဵု သ္ဂးရ။
စပ်ကဵုအကာဲအရာ ဗ္ဒိုပ်ဒပ်ပၞာန်ပန် နူပယျဵုသေံ−ဗမာ ဒးဒုၚ်ဗ္တိုက်သီဂှ်တုဲ လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် မမိက်ကဵုမွဲမွဲဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီုရုပ်− KNU