တဳဟဳရာန်၊ အံက်တဝ်ဗာ (၄)
ပေါဲထ္ၜးဆန္ဒ စပ်ကဵုမၞိဟ်ဗြဴမွဲတၠ မဒးချိုတ်အာလဝ် အခိၚ်ဒပ်ဗၠာဲသၟိၚ်တံ ရပ်ထိၚ်လဝ်ဂှ်ဝွံ သ္ကဵုကၟိန်ဍုၚ် က္တဵုဒှ်ကၠေံ ဟွံညိၚ်ဝတ်ရောၚ်ဂှ် ဥက္ကဌကၠတ်ထဝ်ပါလဳမာန် အဳရာန် ဟီုဂးကဵုလဝ်သတိတုဲ ကုမၞိဟ်မသ္ကဵုက္တဵုဒှ် အန္တရာယ်တံဂှ် သွက်ဂွံရပ်စပ်အာ ဗွဲမသ္ကာတ်မြဟ်ဂှ်လေဝ် ဖ္တိုက်ဖ္အောဝ်လဝ်ရ။
ပ္ဍဲဍုၚ်တဳဟဳရာန်ဂှ် ဂကောံဒပ်ဗၠာဲသၟိၚ်မၚ်ရံၚ်ဒ္ဂေတ်ဝတ်မွဲဂကောံဂှ် မၞိဟ်ဗြဴ အာယုက် (၂၂) သၞာံမွဲတၠ မလ္တက်ကျိုၚ်ကျဝ်လဝ် ကယျိုၚ်ဟွံကိတ်ညဳကဵု ဗီုပြၚ်ကယျိုၚ်ဘာသာဂးတုဲ အခိၚ်မရပ်ထိၚ်လဝ်ဂှ်ဟေၚ် သၟတ်ဗြဴဂှ် မ္ဒးချိုတ်အာလဝ်ရ၊ ဟိုတ်ဂှ်ရ ညးဍုၚ်ကွာန်အဳရာန်ဂၠိုၚ်ကဵုလ္ၚီတံဝွံ တုဲကၠုၚ် အပ္ဍဲပွိုၚ် (၂) သတ္တာဟတေံ တိတ်ဂၠံၚ် ထ္ၜးလဝ်ဆန္ဒအိုတ်ရ။
ပေါဲထ္ၜးဆန္ဒ ပရေၚ်ဒစဵုဒစးအလဵုအသဳ အလုံဍုၚ်တဳဟဳရာန် ဒၞါဲပြးဇး မက္တဵုဒှ်ဒၟံၚ်ဂှ် မံက်တိတ်ကၠုၚ်တုဲ ပ္ဍဲဍုၚ်တၞဟ်ဟ်တံလေဝ် က္တဵုဒှ်ပရေၚ်ဆဵုဂဗဇီုမုက် ကုဂကောံဒပ်ပရေၚ်ဂီုကၠီုတံရ၊ ဟိုတ်ဂှ်ရ သွက်ဂွံကၟာတ်ထောံ အေန်တာနိတ်ဂှ် အလဵုအသဳ စဳဇန်ဒၟံၚ်ဂှ်လေဝ် ထ္မံက်ထ္ၜးလဝ် ပ္ဍဲသဵုယှေဝ်မဳဒဳယျာ ပ္ဍဲဂိတုအံက်တဝ်ဗာ (၂) တေံရ။
ကၠာတေံဂှ်တှ်ေ ပေါဲထ္ၜးဆန္ဒတံဂှ် ၜိုန်ရရန်တၟံလဝ် သွက်ပရေၚ်ပြုပြေၚ်ပြံၚ်လှာဲတုဲ ထ္ၜးကၠုၚ်ဆန္ဒကီုလေဝ် အခိၚ်လၟုဟ်ဂှ် ပ္တဝ်အာဒၟံၚ်က္ဍိုပ် သွက်ဂွံပလှ်ဖျေံ အလဵုအသဳဂှ်လေဝ် မဵုဟာမာတ် ဘဂါဂါကာလဳဗာတ် ဟီုကဵု အမာတ်ကၠတ်ထဝ်တံရ။
“အရာပၟိက်ဇၞော် ပ္ဍဲပေါဲထ္ၜးဆန္ဒကၠာတေံဂှ်တှ်ေ နွံပၟိက်ဒၟံၚ် ကုပရေၚ်ပြုပြေၚ်ပြံၚ်လှာဲတုဲ ရန်တၟံသွက်ဂွံပလှ်ဖျေံသၞောတ်အလဵုအသဳ ဟွံသေၚ်ပုဟ်၊ နူကဵုပေါဲထ္ၜးဆန္ဒလၟုဟ် ကၟိန်ဍုၚ် ဟွံညိၚ်ဝတ်တုဲ ညံၚ်ဂွိုအ်သရိုဟ်အာဂှ် အာတ်မိက်ရ” သာ်ဝွံ မေဿတာ ကာလဳဗာတ် ဆက်ဟီုလဝ်ရ။
ညးထ္ၜးဆန္ဒတံဝွံ ဟိုတ်နူပြဝပ္ဍဵုပ္ဍိုက်ဒၟံၚ် လ္တူညးဗြဴတံဂှ်ရ ဒေါသတိတ်လဝ်အိုတ်တုဲ သွက်ဂွံပလှ်ဖျေံ ဂကောံမဆက်စပ်ကဵု ပရေၚ်ဘာသာ မအုပ်ဓုပ်လဝ် အဳရာန် နူကဵုသၞာံ ၁၉၇၉ ဂှ်တုဲ အသိၚ်ပေါဲထ္ၜးဆန္ဒ အလုံကၟိန်ဍုၚ်မွဲ သၠုၚ်တိုန်ကၠုၚ်လဝ်ရ။
တုဲကၠုၚ် ဂိတုသေပ်တေမ်ဗာ (၁၇) အခိၚ်ပေါဲထ္ၜးဆန္ဒ စလဝ်ဂှ်တုဲ ညးထ္ၜးဆန္ဒ အောန်အိုတ် (၄၁) တၠ ကေုာံ ကောန်ဒပ်ဗၠာဲသၟိၚ်တံ ချိုတ်အာလဝ် နွံဂှ် နူဌာနရုပ်ရမျာၚ် ကၟိန်ဍုၚ်အဳရာန်ပိုၚ် ထ္မံက်ထ္ၜးလဝ်ရ။
ဥက္ကဌကၠတ်ထဝ်ပါလဳမာန် မေဿတာ ကာလဳဗာတ်ဝွံ ပ္ဍဲဒပ်ပၟၚ်ပၟဲပရေၚ်ပၠန်ဂတး အေဿလာမ်မေတ်အရန်ဂှ် ဒှ်သ္ကိုပ်ဒပ်တြေံ သြဇာဇၞော်မွဲတုဲ ညးဝွံ ပ္ဍဲကဵုမၞိဟ်ပိတၠ သၞာဲဒဴကဆံၚ်သၠုၚ် မဒးရပ်စပ်သောၚ်ကလးကဵုဒၟံၚ် ဇၟာပ်ပ်ကိစ္စကၟိန်ဍုၚ် ပၟိက်မဇၞော်တံဂှ် ဒှ်ညးပါလုပ်ဒၟံၚ် မွဲတၠကီုရ။
Ref: Independent.ie