မတ်မလီု၊ ဂျောန် ၅
ပ္ဍဲကဵုပွိုၚ်ဍုၚ် အပ္ဍဲတွဵုရးဍုၚ်မန်တအ်ဂှ် ဂကောံပံၚ်ကောံ နူဌာနမဆေၚ်စပ်ကံၚ်ဇြဳပၞာန်တအ် ရပ်ဒၟံၚ်ယာန်ဟၟဲကဵုလာၚ်ဇြေန်သၟးဟွံက သီုကဵုဖျေံမံၚ်ထံၚ် ကုညးမဍိုက်ပါဗက် ယာန်ဟၟဲကဵုလာၚ်ဇြေန်တံဂှ်ရောၚ် ညးမစုက်လုက်ကဵု ဂကောံဒပ်ဗၠာဲသၟိၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ရပ်ဂွံယာန်လာၚ်ဇြေန်ဟွံမွဲတံဂှ်မ္ဂး သီကေတ်ကွဳစက်၊ ကွဳလိုန်ဓာတ် လာၚ်ဇြေန်ဟွံမွဲတံဂှ်တုဲ ရပ်ကၠုၚ်သီုကဵုညးမဍိုက်ယာန်လာၚ်ဇြေန်ဟွံမွဲတံဏံ မွဲတဲဓဝ်ဂှ်တုဲ ဖျေံမံၚ်ထံၚ် နကဵုသၞောဝ်ဗၞိက်ပၠောပ်၊ ဗၞိက်ပ္တိတ်ရ။
ပ္ဍဲအရာဖျေံဒဏ်ထံၚ် ကုညးမဍိုက်ပါဗက်ကၠုၚ် ကွဳလာၚ်ဇြေန်ဟွံမွဲတံဏံ နကဵုသၞောဝ်ဗၞိက်ပၠောပ်၊ဗၞိက်ပ္တိတ်ဂှ်လေဝ် ဖျေံမံၚ်အမိၚ် နကဵုဗီုပြၚ်ဂွံတုဲပြဟ် အပ္ဍဲပွိုၚ်မွဲတ္ၚဲဓဝ်ဂှ်တုဲ သဝ်အိုတ်ဂှ် ဖျေံမံၚ်ဒဏ်ထံၚ် မွဲဂိတုနွံတုဲ လျိုၚ်လေဝ်ဟွံကဵုဒုၚ်ပုဟ်ဂှ် ဂွံတီကေတ်ရ။
ကံၚ်ဇြဳပၞာန်ဝွံ ရပ်ဒၟံၚ်ကွဳလာၚ်ဇြေန်ဟွံမွဲ သီုဗ္တံသီုတ္ၚဲတုဲ ရပ်ဒၟံၚ် ပ္ဍဲကဵုဒၞါဲလုပ်တိတ်ဍုၚ်၊ ဒၞါဲယာန်ကွဳစက်အာကၠုၚ်ဂၠိုၚ်၊ ဒၞါဲဟွံခယျလဝ်တံဂှ်သၟးဟွံက ဗက်ရပ်ဒၟံၚ် စဵုကဵုသ္ၚိတုဲ ယဝ်ရပ်ဂွံမ္ဂး ရပ်ကော်ဏာမံၚ် သီုတၠသ္ၚိရ။
ညးဒေသတွဵုရးမန် ဟွံမိက်ထ္မံက်ယၟုမွဲတၠဂှ်တှ်ေ ဟိုတ်နူဗက်ရပ်ဒၟံၚ် ယာန်လာၚ်ဇြေန်ဟွံမွဲတံဂှ်တုဲ ပ္ဍဲကဵုဍုၚ်တအ်ဂှ် မၞိဟ်အာကၠုၚ် သောၚ်ဒၟံၚ်တုဲ ပရေၚ်ဇီုကပိုက် လ္တူဘဝပရေၚ်မၞိဟ် ပရေၚ်ပိုန်ဒြပ် နွံဒၟံၚ်ရောၚ် ဟီုရ။
“လၟုဟ်ရပ်တုဲမ္ဂး လ္တူဍုၚ်ဂှ် သောၚ်ဒၟံၚ်ဟဂှ်ရ။ တ္ၚဲရပ်ဒက်ဂၠိုၚ်ဂှ်တှ်ေ ကွဳစက်နူရးတံဂှ်လေဝ် ဟွံတိုန်၊ ကွဳစက်တံဏံ သီုဖအိုတ်ဂှ် ဒှ်ဒၟံၚ်လာၚ်ဇြေန်ဟွံမွဲသၟးရ။ ကွဳစက်နူရးတံဂှ် ဟွံတိုန်တှ်ေ အဏံဂှ် ပရေၚ်သွံရာန်ဟွံခိုဟ်ပုဟ်။ အခက်အခုဲနွံတၟာဂလိုၚ်ရ။ လ္ပာ်ပရေၚ်ထတ်ယုက်ကီု ပရေၚ်ဘာသာကီု ပရေၚ်ဂိယဲတံကီု အရာအိုဿီု ခက်ခုဲအာအိုတ်ရ” သာ်ဝွံ သ္ဂးရ။
ကံၚ်ဇြဳပၞာန် ရပ်ဒက်ကၠုၚ်ဒၟံၚ် ယာန်လာၚ်ဇြေန်ဟွံမွဲတံဂှ်တုဲ ယဝ်ဒးဒုၚ်ရပ်မ္ဂး ကွဳစက်ဇကုမပိုၚ်ပြဳလဝ်ဂှ် ဒးဒုၚ်သီတုဲ သီုကဵုဖျေံဒၟံၚ်ထံၚ် သီုမၞိဟ်ဂှ်ရ ညးဒေသဗွဲမဂၠိုၚ် ဒးဂဗဒၟံၚ်ကဵုအကာဲအရာ ဒးဂိၜါဝါရောၚ် ညးဆက်ဟီုရ။
ရပ်ဒက်ယာန်လာၚ်ဇြေန်ဟွံမွဲတံဂှ်တုဲ ဖျေံဒၟံၚ်ဒဏ်ထံၚ်ဂှ်ဝွံ ဟိုတ်နူအမိၚ်က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ပ္ဍဲကဵုကောံဓရီုပညဳပညပ်ကမၠောန် ဂကောံကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုမေ ၂၀ တုဲကၠုၚ်တေံရ။
အပ္ဍဲဒေသဂှ်တှ်ေ ကံၚ်ဇြဳပၞာန် ၜိုန်ရပ်ဒၟံၚ် ယာန်လာၚ်ဇြေန်ဟွံမွဲ ဇၞော်ကဵုဇြဟတ်ကီုလေဝ် ရဲနူကဵုဗွိုၚ်ကံၚ်ဇြဳပၞာန်၊ ညးမစုက်လုက်ကဵုဒပ်ပၞာန်၊ ကောန်ဒပ်ဗၠာဲသၟိၚ်၊ သ္ဇိၚ်ဝန်နူဌာနမဆေၚ်စပ်ဂမၠိုၚ် ၜိုန်ဍိုက်ဒၟံၚ်ကွဳလာၚ်ဇြေန်ဟွံမွဲတံဂှ်ကီုလေဝ် ဟွံရပ်ဒက်ဂှ်ရ အကြာညးဒေသတံဂှ်တှ်ေ ပရေၚ်ပါ်ပါဲဂမၠိုၚ် သၠုၚ်တိုန်ဒၟံၚ်ရ။
ပ္ဍဲတွဵုရးဍုၚ်မန်ဂှ် ရပ်ဒၟံၚ်ယာန်ဟၟဲကဵုလာၚ်ဇြေန် နကဵုကိုန်စဳမာန်တုဲ ဒဵုကဵုအခိၚ်လၟုဟ် ရပ်ဂွံလဝ် ကွဳစက်၊ ကွဳလိုန်ဓာတ် လာၚ်ဇြေန်ဟွံမွဲ၊ သီုကဵုကွဳသၠာပိ အပံၚ်ဖအိုတ် ဂၠိုၚ်ကဵုကၠံ နွံတုဲ ကုညးမဍိုက်ဗက်ယာန်လာၚ်ဇြေန်ဟွံမွဲတံဂှ်တှ်ေ ဆက်ကေတ်ဒၟံၚ်အရေဝ် နကဵုသၞောဝ်ဗၞိက်ပၠောပ်၊ ဗၞိက်ပ္တိတ်ရောၚ် ဂွံတီကေတ် ဇရေၚ်ညးမစုက်လုက်ကဵုကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ