ကြုၚ်ဒဵု၊ ဂျောန် ၁၁
ဘာဗ္တောန်လိက် ကွာန်ပါၚ်ယာပ် ပယျဵုတွဵုရးကရေၚ်ကဵု တွဵုရးဍုၚ်မန်ဂှ် ဒးဒုၚ်ထောံမခတိုဟ်တုဲ အ္စာၝောံဗ္တောန်လိက် ကေုာံ ကွးဘာဂမၠိုၚ် မပါလုပ် ကောန်အရာပ် ၅ တၠ ချိုတ်အာလဝ်တုဲ ၂၀ တၠပြၚ် ဇီုကပိုက်ကလိဂွံလဝ်ဝပ်ရောၚ် ခရိုၚ်ဒူပလာယာ KNU လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဂျောန် ၉ အခိၚ်လဒေါဝ်တ္ၚဲ ၜိုတ် ၁ နာဍဳ ၄၅ မိနေတ်ဂှ် ဒပ်ကျာနေဗျဳဒဝ်ကံၚ်ဇြဳပၞာန် ဗ္တိုက်ဂြာတ်လဝ်မခတိုဟ် ဂကူဗုမ်ကလက်သတာ နကဵုက္ၜၚ်ကျာဂျက်ဖိုက်တာမွဲဖ္ဍိုက် ပ္ဍဲကဵုကွာန်ပါၚ်ယာပ် ပယျဵုတွဵုရးကရေၚ် ပွိုၚ်ဍုၚ်ကအ်ကြိက်ကဵု တွဵုရးဍုၚ်မန် ပွိုၚ်ဍုၚ်ကျာ်မြဟ်ဂှ် သ္ဂးလဝ် ပ္ဍဲတၚ်လလောၚ်တြးဂှ်ရ။
ဟိုတ်နူဒပ်ကံၚ်ဇြဳပၞာန် ထောံဂြာတ်မခတိုဟ်နကဵုက္ၜၚ်ကျာတုဲ ကောန်ၚာ်သၟတ် ၃ တၠ၊ အ္စာၝောံ မွဲတၠကဵု မၞိဟ်တြုံအာယုက် ၆၀ သၞာံမွဲတၠ အပံၚ်ဖအိုတ် ၅ တၠ ချိုတ်အာလဝ်တုဲ ကွးဘာ ၁၈ တၠ မပါလုပ်ဂှ် ၂၂ တၠ ဇီုကပိုက်ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။
အပ္ဍဲပရေၚ်ဗ္တိုက်ကဵုပၞာန်ကျာဂှ် စမြိုၚ်ဘာမွဲမ၊ သ္ၚိဒၟံၚ် ၁၀ မ လီုလာ်အာလဝ်တုဲ ဂၠဴမွဲလေဝ် ဒးလွဟ်ဇၞော်တုဲ ချိုတ်အာလဝ်ရောၚ် ထ္မံက်ထ္ၜးလဝ်ရ။
ကောန်ၚာ်လမျီုဒးအိုတ်အာကဵု ကောန်ၚာ်ကလိဂွံလဝ်ဝပ်တံဂှ်တှ်ေ ဒှ်ကွးဘာသၟတ် နူ Grade 1, 2 တုဲ မိမကွးဘာဂမၠိုၚ်ဝွံ အာကၠောန်စဒၟံၚ် ပ္ဍဲဍုၚ်သေံဂှ်ရ ဒှ်ညးဒးမံၚ်စံၚ်ဒၟံၚ် ကုမိနော်ပါနော် မသကလောကောဒေံတံရောၚ် ခရိုၚ်ဒူပလာယာ KNU သ္ဂးရ။
အခိၚ်ဒပ်ကံၚ်ဇြဳပၞာန် ဗ္တိုက်ကဵုပၞာန်ကျာဂှ် ဒှ်အခိၚ်ဗ္တောန်ဒၟံၚ်လိက်တုဲ ပ္ဍဲကဵုကွာန်ပါၚ်ယာပ်ဂှ် ပေါဲဗ္တိုက်ပရေၚ်ပၞာန်ဟွံမွဲမွဲသာ် နကဵုတၚ်ရန်တၟံနွံနွံ ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုရ။
ဒပ်ကံၚ်ဇြဳပၞာန်ဝွံ ဒၞါဲပွန်ပၞာန်ဟွံသေၚ် မပ္တံကဵုစမြိုၚ်ဘုတ်ဘာ၊ ဘာဗ္တောန်လိက်၊ ရုၚ်ဂဥုဲဗ္ဒမ်ဂဥုဲညးဍုၚ်ကွာန် ကေုာံ ဒၞါဲညးဍုၚ်ကွာန်ကောန်အရာပ် မံၚ်တန်တဴတံဂှ် နကဵုတၚ်ရန်တၟံနွံနွံ ဗက်ထောံမံၚ်မခတိုဟ် ဗ္တိုက်ဒၟံၚ်ရောၚ် ခရိုၚ်ဒူပလာယာ KNU လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်- CJ