မတ်မလီု၊ ဂျောန် ၁၂
ညးစၞးဗော်ဍုၚ်မန်တၟိ ဂကောံရပ်လွဟ်ကောန်ဍုၚ်အရၚ် မဒေါအ်လဝ်ပန်ပှော်၊ ညးစၞးဗော်ညဳသၟဟ်မန် ကေုာံ ညးစၞးဂကောံဗွိုၚ်မှာဇန်နာနာ ပံၚ်ကောံတုဲ ဒက်ပ္တန်လဝ် ဂကောံပံၚ်ကောံပရေၚ်ဂကူမန် MAU ပ္ဍဲဂိတုဂျောန် ၆ တေံရ။
ပရေၚ်ဒက်ပ္တန်ဂကောံဏံဂှ်ဝွံ အတိုၚ်တၚ်သ္ဂုတ်သွာတ် နူကဵုကောံဓရီုပရေၚ်ဂကူမန် သၞာံ ၂၀၂၅ မကၠောန်ဗဒှ်လဝ် ပ္ဍဲဍုၚ်မတ်မလီု ပ္ဍဲဂိတုဨပရဴမံက်တေံဂှ်မ္ဂး တုပ်လဝ်စိုတ် သွက်ဂွံဒက်ပ္တန်အာ ဂကောံပံၚ်ကောံကဆံၚ်ကောန်ဂကူမွဲတုဲ ဂွံထ္မံက်အာရုပ်ရဴရ။
ပ္ဍဲကဵုဒက်ပ္တန်ဏာ ဂကောံပံၚ်ကောံပရေၚ်ဂကူမန် MAU ဂှ် နဒဒှ်နာယကဂှ် သၚ်ပိဇကုပါလုပ်တုဲ ဂကောံဥက္ကဌ ကေုာံ ဂကောံညးအုပ်ကာတံဂှ်လေဝ် စုတ်လဝ်မွဲမွဲဂကောံ ပိတၠတုဲ ပ္ဍဲဂကောံကေၚ်ကာဂှ်တှ်ေ ၁၃ တၠ ပါလုပ်ရ။
ပ္ဍဲကဵုဂကောံဥက္ကဌဂှ် နာဲဝေန်လှ ကေတ်အာလျိုၚ် နဒဒှ်ဥက္ကဌဏောၚ်တုဲ နာဲတၠညးဂှ် ဒုက္ကဌ ၁ ကေုာံ နာဲမန်ရာဇာဂှ် ဒုဥက္ကဌ ၂ မဒှ်တုဲ ပ္ဍဲဂကောံညးအုပ်ကာဂှ်တှ်ေ နာဲသာန်တေန်ဂှ် ညးအုပ်ကာနာနာ၊ နာဲဝဏ္ဏမာန်ဂှ် ဖက်ဆောညးအုပ်ကာ ၁ ကေုာံ နာဲအံၚ်မ္ၚဵုဂှ် ဖက်ဆောညးအုပ်ကာ ၂ သာ်ဝွံ ခါန်ကၞက်ပ္တိုန်လဝ်ရ။
နာဲသာန်တေန် ညးမၞုံအခေါၚ်ဟီုဂး MAU ဂှ်တှ်ေ ဂကောံမပါလုပ်ဒၟံၚ် အတိုၚ်ကောံဓရီု မလးဖျေံလဝ်ဂှ်မ္ဂး ဂကောံညးကဵုညး ကဵုလဝ်တာလျိုၚ်တုဲ ဒက်ပ္တန်လဝ်ဂှ်ရ ကလေၚ်စကာလဝ်ယၟု အတိုၚ်တြေံရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ အတိုၚ်ကောံဓရီု မဖျေံစၟတ်လဝ်ဂှ်ရ ဒက်လဝ်ဂကောံ။ လၟေၚ်ကမၠောန်ဂတဂှ်တှ်ေ သတ္တာဟဂတဏံမှ သဳကၠဳဏောၚ်။ သတ္တာဟဏံ မုဟွံသဳကၠဳပုဟ်။ ဇဖန်ဆဵု ၜိုတ်ဆက်မိတ်ရဏောၚ်။ ဟိုတ်ဂှ်ရ အတိုၚ်ကောံဓရီုပရေၚ်ဂကူမန် မလးဖျေံလဝ်ဂှ်မ္ဂး ညအ်ဂှ် အတိုၚ်မကဵုလဝ်လျိုၚ် ဂကောံညးကဵုညးဂှ် မွဲမွဲဂကောံ ၅ တၠ၊ လ္ပာ်တေံဂှ်တှ်ေ ၉ တၠ၊ နကဵုဗော်ပိုယ်တံဂှ် ၅ တၠ ဗော်ဍုၚ်မန်တၟိဂှ် ၅ တၠ၊ ပံၚ်ဖျပ်လဝ်ညအ်ရ။ ပံၚ်ကောံလဝ်တုဲ ဒက်ပ္တန်လဝ်ဂကောံဏံ။ ပ္ဍဲအရာရုဲစှ်ယၟုဂှ်တှ်ေ ယၟုတြေံဂှ်ရဍိုက်ပေၚ်တုဲ ကလေၚ်စကာလဝ်ယၟုတြေံဂှ်” သာ်ဝွံ သ္ဂးရ။
သွက်ဂွံထ္မံရုပ်ရဴ လၟေၚ်ကမၠောန်ဂကောံဂတဏံဂှ် ညးစၞးဗော်ဍုၚ်မန်တၟိကဵု ညးစၞးဗော်ညးသၟဟ်မန်ဂှ် မွဲမွဲဗော် ပါလုပ်မသုန်တၠတုဲ နူဂကောံဗွိုၚ်မှာဇန်နာနာဂှ်တှ်ေ ညးစၞး ၉ တၠ အပံၚ်ဖအိုတ် (၁၉) တၠ ဒက်ပ္တန်လဝ် ကမ္မတဳကမၠောန်ရ။
နူကောံဓရီုပရေၚ်ဂကူမန် သၞာံ ၂၀၂၂ မကၠောန်ဗဒှ်လဝ် ပ္ဍဲဗ္ဒိုပ်ညဳသာတေံ မလးဖျေံလဝ်ဂှ်မ္ဂး ပ္ဍဲကဵုဂကောံသ္ဂောံဒက်ပ္တန်အာ ဂကောံပံၚ်ကောံပရေၚ်ဂကူမန်ဂှ် ညးစၞး ၁၁ တၠဓဝ် ပါလုပ်ကီုလေဝ် အခိၚ်လၟုဟ်ဂှ် သၠဲပ္တိုန်ဒက်ပ္တန်လဝ် စဵုကဵုညးစၞး ဒ္စါံတၠရ။
ပ္ဍဲကဵုဂကောံညးစၞး မပါလုပ်ဒၟံၚ် ပ္ဍဲ MAU ဂှ် ဗော်ဍုၚ်မန်တၟိဝွံ ဆဵုဂဗသဳကၠဳလဝ် ကုကံၚ်ဇြဳပၞာန်နွံတုဲ ဗော်ညဳသၟဟ်မန်ဂှ်တှ်ေ ဗလးဏာလဝ်ကောန်ဗော်ၜါတၠ နဒဒှ်ကောန်ဂကောံကံၚ်ဇြဳတုဲ ပါလုပ်ဒၟံၚ် ဒဵုကဵုအခိၚ်လၟုဟ်ရ။
ပ္ဍဲကဵုဂကောံ MAU မဒက်ပ္တန်လဝ် ပ္ဍဲအကာဲအရာလၟုဟ်ဂှ် ဂကောံရပ်လွဟ်မန် မပၠန်ဂတးဒၟံၚ် သၞောတ်တၠအဝဵုပၞာန် ကဵု ဂကောံပရေၚ်ဍုၚ်ကွာန်မန်တအ် ဟွံပါလုပ်တုဲ အကြာညးဍုၚ်ကွာန်ဂမၠိုၚ် ဒှ်ဒၟံၚ်ဓဝိၚ် ဖေက်စုက်လုက်ကဵုကံၚ်ဇြဳပၞာန်ဂၠိုၚ်ဂှ်လေဝ် နွံဒၟံၚ်ပၠန်ရ။
မွဲလ္ပာ်ဂှ်ပၠန် ဒက်ပ္တန်လဝ်ဂကောံပံၚ်ကောံပရေၚ်ဂကူမန် MAU သွက်ဂွံပညဳလစွံစိုတ် ညံၚ်ဂွံလုပ်ပြိုၚ် ပ္ဍဲပေါဲရုဲမာဲကံၚ်ဇြဳပၞာန် မကၠောန်ဗဒှ်အာ အပ္ဍဲကၞောတ်သၞာံဏံဂးတုဲ ရမျာၚ်ပါ်ပါဲဒၟံၚ်တံလေဝ် မံက်တိတ်ဒၟံၚ်ရ။
နာဲသာန်တေန် မဒှ်ကောန်ဗော်ညဳသၟဟ်မန် ဗော်မဒတူလိုၚ်ဒၟံၚ် နဒဒှ်ဗော်ပရေၚ်ဍုၚ်ကွာန်ဂှ်တှ်ေ ဂကောံပရေၚ်ဂကူမန် MAU ဝွံ မုဟွံဆေၚ်ကဵုပေါဲရုဲမာဲပုဟ်ဂှ် ဟီုရ။
“ပေါဲရုဲမာဲဂှ် ဆေၚ်ကဵုဗော်ညဳသၟဟ်မန်ရဏောၚ်။ ဗော်ပိုယ်တံရဂှ် သွက်ပေါဲရုဲမာဲဂှ် မုဟွံဂွံချပ်လဝ်ဏီပုဟ်။ ပ္ဍဲကဵုဍေံတံ (ကမ္မယှေန်ပေါဲရုဲမာဲ) ဂှ် မုသၞောဝ်မွဲမှ ဟွံဂွံတိတ်ဏီတုဲ ဗော်ပိုယ်တံရဂှ် ဟွံဂွံချပ်လဝ်ဏီပုဟ်တှ်ေ ဂကောံဏံတှ်ေ လ္ပဟီုရ၊ ဂကောံဏံဂှ် ဟွံဆက်စပ်ကဵုပေါဲရုဲမာဲပုဟ်” သာ်ဝွံ သ္ဂးရ။
အခိၚ်လၟုဟ် နကဵုကမ္မတဳကမၠောန် ဂကောံပံၚ်ကောံပရေၚ်ဂကူမန် MAU စပ်ကဵုလၟေၚ်ကမၠောန်ဂတဂမၠိုၚ်တုဲ ပ္ဍဲကဵုကောံဓရီုဂတတေံမှ ဆက်သဳကၠဳအာဏောၚ်ဂှ် ဂွံတီကေတ် နူကဵုဂကောံဏံရ။
ကြဴနူပၞာန်သီအဝဵုတုဲ အကာဲအရာပရေၚ်ဍုၚ်ကွာန်မန်ဂှ်ဝွံ ဂကောံသဳကၠဳပညဳဒၟံၚ်ကဵုကံၚ်ဇြဳပၞာန် သွက်ဂွံသောၚ်ကလးပြဒ္ဒညာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ကဵု ဂကောံမဒစဵုဒစးပၠန်ဂတးဒၟံၚ် သၞောတ်တၠအဝဵုပၞာန် နွံရ။
ပရိုၚ်−သြၚ်လောန်တိုၚ်(မ်)
ဗီုရုပ်−NMSP