မတ်မလီု၊ ဂျောန် ၁၂
ဟိုတ်နူပရေၚ်ဍဵုဍိုက်အပ္ဍဲဒပ်တုဲ ကောန်ဒပ်ကံၚ်ဇြဳပၞာန် ယိုက်ဒၟံၚ်လျိုၚ်ပၞာန်ဂမၠိုၚ် ဖျေံကၠုၚ်လွဟ်ကီု ဂြိပ်တိတ်ကၠုၚ်ကီုဂှ် ဂၠိုၚ်ကၠုၚ်ရောၚ် ညးတာလျိုၚ် ဒပ်ပၠန်ဂတးတအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ယိုက်လျိုၚ်ပၞာန်ညးဍုၚ်ကွာန်ဝွံ ဒးဒုၚ်ဍဵုဍိုက်သ္ပမာန် အပ္ဍဲကဵုဒပ်ကီု၊ ပရေၚ်စသုၚ်ဟွံပြေပြံၚ်ကီု၊ ပ္ဍဲကဵုကမၠောန်ပရေၚ်ပိုန်ဒြပ် သၞာဲဒဴဒပ်ပၞာန်တအ်ဂှ် ဒးဒုၚ်စကာဒၟံၚ် ဗွဲအဓမ္မရ။
သ္အာၚ်နူဂှ်ပၠန် အပ္ဍဲဒပ်ဂှ် ဟွံကဵုရပ်ဖုၚ်ကီု၊ ဟွံကဵုအခေါၚ်ဆက်စၠောံ သ္ၚိကၟိန်ဂြောဝ်ဂတာညးတံကီု၊ ဟွံဂွံသြန်ဂိတုပေၚ်ၚ်ကီု၊ ဟွံကဵုရပ်လှုဲတံဒှ်တမ် ဒၟါနူဟိုတ်တံဏံတုဲ ဂြိပ်တိတ်ဂၠိုၚ်ကၠုၚ်ရ။
သဝ်ဒါကိုဝ် သ္ကိုပ်ပရေၚ်ပၞာန် ဗျူဟာ ၃၃ ကရောၚ်ပၞာန်ဒဝ်ဏ ဒပ်ပၞာန်စဵုဒၞါညးဍုၚ်ကွာန် PDF ဂှ်တှ်ေ ကောန်ဒပ်ယိုက်လျိုၚ်ပၞာန် ဗွဲမဂၠိုၚ်ဝွံ ဟိုတ်နူဒးဒုၚ်စကာ ဟွံဗဗွဲကဵုသၞောဝ်ကဵု ဒးဒုၚ်ဍဵုဍိုက်ဒၟံၚ်တံဂှ်တုဲ သာတုဲဂြိပ်တိတ်ဂၠိုၚ်ကၠုၚ်ရောၚ် ဟီုရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ် ၜိုတ်က္ဍစိုပ်ဂှ်မ္ဂး တုဲကၠုၚ်နူဂိတုမေ စဵုကဵုဂိတုဂျောန် ၁၁ ဂှ် ကောန်ဒပ်ယိုက်လျိုၚ်ပၞာန် ဖျေံကၠုၚ်လွဟ် ဇရေၚ်ဂကောံပၠန်ဂတးဖျေံသ္ဇိုၚ်ရးတၞၚ်သဳကဵု တွဵုရးမန်ဂှ် နွံကၠုၚ် ဟွံအောန်နူကဵု ၁၂ တၠရ။
ပ္ဍဲကဵုလၟေၚ်ဒဒှ်ကောန်ဒပ်ယိုက်လျိုၚ်ပၞာန်ဂမၠိုၚ် ဖျေံကၠုၚ်လွဟ် လ္ၚဵုတံဂှ်တှ်ေ ဟိုတ်နူပရေၚ်ဂီုကၠီု ကောန်ဒပ်ယိုက်လျိုၚ်ပၞာန်တံကဵု ဂြောဝ်ဂတာညးတံတုဲ လ္ပာ်ဒပ်ပၠန်ဂတးတအ် ဟွံလလောၚ်ပ္တိတ်လဝ်လေဝ် နွံဒၟံၚ်ရ။
မွဲလ္ပာ်ဂှ်ပၠန် ကောန်ဒပ်ယိုက်လျိုၚ်ပၞာန်ဂမၠိုၚ်ဝွံ ကြဴနူစှ်ေတန်ဗ္တောန်တုဲဂှ် ဒးဒုၚ်ပလံၚ်ဒၟံၚ်မုက်ပၞာန် လွာဲဂှ်တုဲ ပရေၚ်ဇီုကပိုက်ချိုတ်တအ် ဂၠိုၚ်ဒၟံၚ်ရ။
ကောန်ဒပ်ယိုက်လျိုၚ်ပၞာန်ဂမၠိုၚ် ဂြိပ်တိတ်အာတံ နွံကီုလေဝ် လ္ပာ်ကံၚ်ဇြဳပၞာန်ဂှ်တှ်ေ ကြပ်ဇၟာပ်ဂိတု ပံက်ဒၟံၚ်တန်ဗ္တောန်ကွတ်ပၞာန် နွံဒၟံၚ်တုဲ ပ္ဍဲဂိတုဂျောန် ၁၆ ကၠုၚ်စိုပ်ဏံမ္ဂးလေဝ် သွက်ဂွံပံက်အာတန်ဗ္တောန်ကွတ်ပၞာန် လၟေၚ် ၁၃ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media