မတ်မလီု၊ ဂျောန် ၁၃
ဥူအံၚ်ကျဳတုၚ် မဒှ်သ္ကိုပ်ဝန်ဇၞော်တွဵုးဍုၚ်မန် ကံၚ်ဇြဳပၞာန်မခါန်ကၞက်ပ္တိုန်လဝ်ဂှ် ထ္ၜးဟိုတ်ကဵုကိုန်စဳမာန်တုဲ တက်ဂအာၚ်သွံစဒၟံၚ်တိဗ္ၚ အပ္ဍဲတွဵုရးဍုၚ်မန်ဂှ် ဟီုကၠုၚ် လ္တူတိဝါဗ္ၚတံဂှ် ဟွံဂွံအခေါၚ်မွဲသာ် လ္ပရပ်စပ်နဲတၞဟ်သ္အာၚ်ညိ မဒှ်ရ။
တုဲကၠုၚ်ဂိတုဂျောန် စၟတ်တ္ၚဲ ၁၀ တေံ ပ္ဍဲကဵုကောံဓရီု ဂကောံကောပ်ကာဲတိဗ္ၚ တွဵုရးဍုၚ်မန် မကၠောန်ဗဒှ်လဝ် ပ္ဍဲရုၚ်အလဵုအသဳ လ္တူဍုၚ်မတ်မလီုဂှ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်မခါန်ကၞက်ပ္တိုန်လဝ်ဂှ် ဟီုကၠုၚ်လဝ် ကုဌာနမဆေၚ်စပ် သၟဝ်တဲညးဂမၠိုၚ်ရ။
ဟွံဂွံအခေါၚ်မွဲသာ် ပွမရပ်စပ်နဲတၞဟ်သ္အာၚ် လ္တူတိဗ္ၚတံဂှ် သွက်ဂွံစၟဳတ်ရေၚ်တၠုၚ်အာ ဗွဲမဗဗွဲကဵု SOP မဖျေံစၟတ်လဝ်ဂှ်တုဲ ဂကောံပွိုၚ်ဍုၚ်ခရိုၚ်ဂမၠိုၚ် သွက်ဂွံစှ်ေနတဲ ရေၚ်တၠုၚ်အာဂှ်ကီု ဟိုတ်ဟွံမွဲမွဲသာ် ပွမသၠးစွံလဝ်တိဝါဗ္ၚ ညံၚ်ဟွံဂွံမွဲတုဲ သွက်ဂွံကောပ်ကာဲဂှ် စၞောန်ပ္ညုၚ်လဝ်ရ။
သ္အာၚ်နူဂှ်ပၠန် ပြဒ္ဒညာတိဗ္ၚ အပ္ဍဲတွဵုရးဍုၚ်မန်တံဂှ်လေဝ် သွက်ဂွံစၟဳတ်ရေၚ်တၠုၚ်အာ ဗွဲမဗဗွဲကဵုလၟေၚ်ကမၠောန်၊ သၞောဝ်ဥပဒေ၊ နဲဥပဒေ ဂှ်ကီု၊ ဂဗုတ်မပ္တိုန်ထ္ၜးကၠုၚ်တံဂှ်လေဝ် ကောန်ဂကောံမဆက်စပ်ဂမၠိုၚ် သွက်ဂွံပူဗိုၚ်သဳကၠဳအာ ဗွဲမဗဗွဲကဵုသၞောဝ်တိဗ္ၚ၊ နဲသၞောဝ်ဥပဒေတံဂှ် ဟီုလဝ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ် ၜိုန်ရသ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် မခါန်ကၞက်ပ္တိုန်လဝ်ဂှ် ဟီုမံၚ် ဟွံဂွံအခေါၚ်မ္ဂး လ္ပရပ်စပ်တိဗ္ၚ နကဵုနဲတၞဟ်သ္အာၚ်တံဂှ်ကီုလေဝ် အလဵုညးတအ် ဝးပ္ကဝ်သၞောဝ်တုဲ တက်ဂအာၚ်သွံစဒၟံၚ်တုဲ ကၠောန်ဒၟံၚ်ပၟိက်စိုတ်ဏောၚ်ဂှ် ပါ်ပါဲလဝ်ရ။
“အခေါၚ်ရပ်စပ်တိဗ္ၚဟွံမွဲပုဟ်ဟီုဂှ် ဍေံတံရ ဝးပ္ကဝ်သၞောဝ်ဏံတုဲ သွက်ကိုန်စဳမာန်ဍုၚ်တၟိဂးတုဲ ဗဝ်တိတုဲ မွဲဂအာၚ်ဂှ် သွံစဒၟံၚ် ၁၄၀၀၊ ၁၅၀၀ ရ။ အလဵုညးတအ်ရ ဟီုလဝ် သိုၚ်သ္ၚိပ္ဍဲတိဗ္ၚဟွံဂွံ။ အတိုၚ်သၞောဝ်တိဗ္ၚမ္ဂး ဟွံကၠောန်ဗ္ၚမ္ဂး ဒးကလေၚ်ပအပ်ကဵုကၟိန်ဍုၚ်ဏောၚ်ဂးလဝ်တုဲတှ်ေ အရာကၟိန်ဍုၚ်ပိုၚ်ပြဳလဝ်ဂှ် သွံစလဝ်ဟီုတှ်ေ ကၟိန်ဍုၚ်ဂှ် ဗီုဍေံတံ မိက်ဂွံကၠောန် ကၠောန်ဂွံဟာ။ ညအ်ဂှ် ဒှ်သၞောတ်တၠအဝဵုပၞာန်ရ” သာ်ဝွံ သ္ဂးရ။
သ္အာၚ်နူဂှ်ပၠန် အရာမကလိဂွံဒၟံၚ်အခေါၚ်ရပ်စပ်တိဗ္ၚ နကဵုဂၠံၚ်ဍာန်တၞဟ်ဟ်ဂှ်ဝွံ ခရိုဝ်နဳမစုက်လုက်ကဵုကံၚ်ဇြဳပၞာန်တံရဟေၚ် ကဵုသြန် ကုဌာနသၟဝ်တဲကံၚ်ဇြဳပၞာန် အဆံၚ်ၚ်တုဲ ကလိဂွံမံၚ်အခေါၚ်ရပ်စပ် ဂၠံၚ်ဍာန်တၞဟ်သ္အာၚ်တံဏောၚ်ဂှ် ညးဆက်ဟီုရ။
မွဲလ္ပာ်ဂှ်ပၠန် ၜိုန်ရသ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ် ဟီုမံၚ် ဟွံဂွံအခေါၚ်မ္ဂး လ္ပရပ်စပ်တိဗ္ၚ နကဵုနဲကဲတၞဟ်သ္အာၚ်တံဂှ်ကီုလေဝ် ပ္ဍဲဍုၚ်မတ်မလီုဂှ်တှ်ေ တိဝါဗ္ၚညးဒေသတံဂှ် အလဵုညးတအ် သီကေတ်တုဲ ကိုန်စဳမာန်ဍုၚ်တၟိလှိုၚ်ဂးတုဲ တက်ဂအာၚ် သွံစဒၟံၚ်ရ။
ပ္ဍဲဍုၚ်မုဟ်ဍုၚ်ဂှ်လေဝ် သွက်ဂွံသိုၚ်ခၞံသၞေဟ်က္ၜၚ်ကျာဍုၚ်နာနာ ကေုာံ သၞေဟ်ကဆံၚ်ဂၠးတိတံဂှ်ဂးတုဲ တိဗ္ၚတအ်ဂှ် ကဵုသြန်လေဲတုဲ သီကေတ်ဒၟံၚ်နွံတုဲ ပ္ဍဲပွိုၚ်ဍုၚ်ၜါသွာၚ်ဂှ်လေဝ် ဒက်ပ္တန်ရုၚ်စက်ချးတၟဟ်ဏောၚ်ဂးတုဲ ကဵုသြန်လေဲတုဲ သီကေတ်ဒၟံၚ်နွံရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ/ MOI