ရေဝ်၊ အံက်တဝ်ဗာ (၆)
ပ္ဍဲအရာပ်သဳရိဇြေယျာ၊ ဍုၚ်ရေဝ်၊ တွဵုရးဍုၚ်မန်ဂှ် ပ္ဍဲဂိတုအံက်တဝ်ဗာ (၅) ပယျာံဂယး ၜိုတ် (၁၀) နာဍဳဂှ် သ္ကိုပ်အုပ်ဓုပ်အရာပ် ကံၚ်ဇြဳပၞာန်တံ မခါန်ကၞက်လဝ် ဒးဒုၚ်ပန်ပှော်ကဵု သေနာတ်တုဲ ချိုတ်အာလဝ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်(မ်) ရ။
ကုဥူမေန်တုၚ်ဥူ သ္ကိုပ်အုပ်ဓုပ် အရာပ်သဳရိဇြေယျာ ကံၚ်ဇြဳပၞာန် မခါန်ကၞက်လဝ်ဂှ် ဂကောံပၠန်ဂတးတွဵုရးဍုၚ်မန် MSRO ပန်ပှော်လဝ် ပ္ဍဲကဵုဆေၚ်ဍာ်လက်ဖက် မၞုံဗ္ဒါဲသ္ၚိဒၟံၚ်ညး နကဵုသေနာတ်ရ။
ဟိုတ်နူဒးဒုၚ်ပန်ပှော်လဝ် ကဵုသေနာတ်ဂှ်ရ ဥူမေန်တုၚ်ဥူဝွံ ပ္ဍဲကဵုဂၞဴဍောတ် ကေုာံ ဒၞါဲဇုတ်သ္ကဲတံဂှ် ကလိဂွံလဝ် ဝပ်သေနာတ် (၃) လစုတ်တုဲ အဃောမပလံၚ်ဗစိုပ်ဒၟံၚ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ရေဝ်ဂှ် ချိုတ်အာလဝ်ရ။
ညးဒုၚ်တာလျိုၚ် ဂကောံပၠန်ဂတးတွဵုရးဍုၚ်မန် နာဲအဂ္ဂဂှ် သ္ကိုပ်အုပ်ဓုပ် ဥူမေန်တုၚ်ဥူဝွံ ပံၚ်တောဲကဵု ဒပ်ပၞာန်တုဲ ဘပဠဒၟံၚ် ညးဍုၚ်ကွာန်တံကီု၊ ရေၚ်တၠုၚ်ကဵုဒၟံၚ် ပရိုၚ်တံကီုဂှ်ရ ဒးပသောၚ်လဝ်ရောၚ် ဟီုရ။
သ္ကိုပ်အုပ်ဓုပ် ဥူမေန်တုၚ်ဥူ မဒးချိုတ်အာဂှ်ဝွံ နူကဵု ၂၀၁၀ တေံရ ဒှ်ညးမသ္ပဒၟံၚ် သ္ကိုပ်အုပ်ဓုပ်အရာပ်တုဲ ကြဴနူဒပ်ပၞာန်သီအဝဵုတုဲဂှ် ဒၟါနူဗက်ကၠောန်ကဵုဒၟံၚ် အတိုၚ်ဒပ်ကံၚ်ဇြဳပၞာန် စကာဂှ်ရ ဒယှ်တှ်ဒၟံၚ် နကဵုယၟုပရေံပရေံရ။
ပ္ဍဲကွာန်ကြုၚ်လံၚ်၊ ပွိုၚ်ဍုၚ်ရေဝ်ဂှ် တုဲကၠုၚ် ပ္ဍဲဂိတုအံက်တဝ်ဗာ (၄) တေံလေဝ် ဂကောံပၠန်ဂတးတွဵုရးဍုၚ်မန် MSRO ပန်ပှော်ပသောၚ်လဝ် ကိုဝ်အံၚ်မျေတ် မဒှ်ဒေၚ်ချေဝ် ရေၚ်တၠုၚ်ဒၟံၚ် နဒဒှ်ညးကဵုပရိုၚ် ကံၚ်ဇြဳပၞာန်တံဂှ်ရ။
ပရိုၚ်−သြၚ်လောန်တိုၚ်(မ်)